వియన్నా, ఆస్ట్రియా: తెలుగు సంగం ఆస్ట్రియా ఆధ్వర్యంలో అధ్యక్షురాలు శ్రీమతి శ్రీలత కొమటి రెడ్డి మరియు ఎగ్జిక్యూటివ్ కమిటీ సభ్యుల సమన్వయంతో అక్టోబర్ 17న వియన్నాలో బతుకమ్మ–దసరా వేడుకలు ఘనంగా నిర్వహించారు. ఆస్ట్రియాలో నివసిస్తున్న తెలుగు కుటుంబాలు పెద్ద సంఖ్యలో పాల్గొని సంప్రదాయబద్ధంగా బతుకమ్మను నిర్వహించి, దసరా పండుగను ఆనందోత్సాహాలతో జరుపుకున్నారు.
తెలుగు సంస్కృతి, సంప్రదాయాలను విదేశాల్లోనూ పరిరక్షించాలనే ఉద్దేశంతో నిర్వహించిన ఈ వేడుకల్లో మహిళలు బతుకమ్మ పాటలు, నృత్యాలతో సందడి చేయగా, చిన్నారులు, యువత సాంస్కృతిక కార్యక్రమాల్లో ఉత్సాహంగా పాల్గొన్నారు. సంప్రదాయ తెలుగు వంటకాలతో ఏర్పాటు చేసిన పొట్లక్ భోజనం, సంగీత కార్యక్రమాలు, లక్కీ డ్రా ప్రత్యేక ఆకర్షణగా నిలిచాయి.
కార్యక్రమ విజయానికి తెలుగు సంగం ఆస్ట్రియా ఎగ్జిక్యూటివ్ కమిటీ సభ్యులు, వాలంటీర్లు, అలంకరణ బృందం, రిజిస్ట్రేషన్ బృందం మరియు సభ్యులు సమిష్టిగా కృషి చేశారు. స్పాన్సర్లు, శ్రేయోభిలాషులు అందించిన సహకారం కూడా వేడుకల నిర్వహణకు తోడ్పడింది.
ఈ సందర్భంగా అధ్యక్షురాలు శ్రీలత కొమటి రెడ్డి మాట్లాడుతూ, విదేశాల్లో నివసిస్తున్నప్పటికీ తెలుగు సంస్కృతి, సంప్రదాయాలను భావితరాలకు అందించడం, తెలుగు వారందరినీ ఒకే కుటుంబంలా కలిపి ఉంచడం తమ సంఘం ప్రధాన లక్ష్యమని తెలిపారు. సభ్యులు, ఎగ్జిక్యూటివ్ కమిటీ, వాలంటీర్లు, స్పాన్సర్లు అందించిన సహకారానికి ఆమె కృతజ్ఞతలు తెలిపారు.
“కలిసి పనిచేశాం… కలిసి సంబరాలు జరుపుకున్నాం… కలిసి మధుర జ్ఞాపకాలను సృష్టించుకున్నాం” అనే స్ఫూర్తితో వేడుకలు ఆనందంగా ముగిశాయి. ఆస్ట్రియాలో తెలుగు సంస్కృతి, సంప్రదాయాల పరిరక్షణకు తెలుగు సంగం ఆస్ట్రియా తన కార్యక్రమాలను కొనసాగించనుంది.
