శ్రీకాకుళం టీడీపీలో పెను ప్రకంపనలు.

•  వైఎస్సార్‌సీపీ గూటికి గుండ లక్ష్మీదేవి!
•  40 ఏళ్ల అనుబంధానికి తెర.
•  వైఎస్ జగన్ సమక్షంలో ఫ్యాన్ తీర్థం పుచ్చుకున్న మాజీ ఎమ్మెల్యే.
•  శ్రీకాకుళం మేయర్ అభ్యర్థిగా బరిలోకి దింపాలని వైఎస్ జగన్ కీలక నిర్ణయం.

అమరావతి, మహా.

రాష్ట్రంలో స్థానిక సంస్థల ఎన్నికల వేళ ఉత్తరాంధ్ర రాజకీయాల్లో అనూహ్య పరిణామం చోటుచేసుకుంది. శ్రీకాకుళం జిల్లాలో తెలుగుదేశం పార్టీ ఆవిర్భావం నుంచి ఆ పార్టీకి కంచుకోటగా నిలిచిన ‘గుండ’ కుటుంబం టీడీపీకి గుడ్‌బై చెప్పింది. సుమారు నాలుగు దశాబ్దాల సుదీర్ఘ అనుబంధాన్ని తెంచుకుంటూ శ్రీకాకుళం మాజీ ఎమ్మెల్యే, టీడీపీ సీనియర్ నాయకురాలు గుండ లక్ష్మీదేవి గురువారం వైఎస్సార్ కాంగ్రెస్ పార్టీలో చేరారు. తాడేపల్లిలోని వైఎస్సార్‌సీపీ కేంద్ర కార్యాలయంలో మాజీ ముఖ్యమంత్రి, పార్టీ అధినేత వైఎస్ జగన్‌మోహన్‌రెడ్డి ఆమెకు, ఆమె ముఖ్య అనుచరులకు పార్టీ కండువాలు కప్పి సాదరంగా ఆహ్వానించారు.

నాలుగు దశాబ్దాల సేవకు దక్కని గౌరవం.

దివంగత ఎన్టీఆర్ పిలుపుతో 1985లో రాజకీయాల్లోకి వచ్చిన గుండ కుటుంబానికి శ్రీకాకుళం నియోజకవర్గంలో తిరుగులేని ప్రజాబలం ఉంది. లక్ష్మీదేవి భర్త, దివంగత గుండ అప్పలసూర్యనారాయణ టీడీపీ తరఫున నాలుగుసార్లు ఎమ్మెల్యేగా, రెండుసార్లు మంత్రిగా సేవలందించారు. అనంతరం 2014 ఎన్నికల్లో గుండ లక్ష్మీదేవి శ్రీకాకుళం ఎమ్మెల్యేగా ఘనవిజయం సాధించారు. అయితే 2024 అసెంబ్లీ ఎన్నికల్లో ఆమెకు టికెట్ నిరాకరించినప్పటికీ పార్టీ ఆదేశాలకు కట్టుబడి పనిచేశారు.

కానీ, ఇటీవల తన భర్త అప్పలసూర్యనారాయణ అనారోగ్యంతో బాధపడుతున్నప్పుడు కనీసం పరామర్శకు కూడా టీడీపీ అధిష్టానం రాకపోవడం, ఆయన మరణానంతరం శ్రీకాకుళంలో విగ్రహం ఏర్పాటు చేయకుండా సొంత పార్టీలోని ప్రత్యర్థి వర్గమే అడ్డుకుని దిమ్మెలను ధ్వంసం చేయడం ఆమెను తీవ్రంగా కలచివేసింది. దీనికితోడు తాజా స్థానిక ఎన్నికల్లో శ్రీకాకుళం మేయర్ పీఠాన్ని ఆశించిన ఆమెకు.. కూటమి పొత్తులో భాగంగా ఆ స్థానాన్ని జనసేనకు కేటాయించడంతో తీవ్ర నిరాశ ఎదురైంది. పార్టీలో జరుగుతున్న వరుస అవమానాలపై అధిష్టానానికి ఫిర్యాదు చేసినా పట్టించుకోకపోవడంతో బుధవారం టీడీపీకి రాజీనామా చేసిన ఆమె, ధర్మాన సోదరుల చర్చలతో గురువారం వైఎస్సార్‌సీపీలో చేరారు.

శ్రీకాకుళం మేయర్ అభ్యర్థిగా గుండ లక్ష్మీదేవి!

శ్రీకాకుళం పట్టణంలో బలమైన సామాజిక వర్గానికి చెందిన లక్ష్మీదేవి రాకతో పార్టీకి తిరుగులేని బలం చేకూరుతుందని వైఎస్సార్‌సీపీ అంచనా వేస్తోంది. ఈ నేపథ్యంలో జిల్లా నేతలతో చర్చించిన వైఎస్ జగన్.. రాబోయే శ్రీకాకుళం మున్సిపల్ కార్పొరేషన్ ఎన్నికల్లో వైఎస్సార్‌సీపీ మేయర్ అభ్యర్థిగా గుండ లక్ష్మీదేవిని బరిలోకి దింపాలని నిర్ణయించారు. ప్రస్తుతం జరుగుతున్న విడతలో కాకుండా డిసెంబర్‌లో శ్రీకాకుళం కార్పొరేషన్ ఎన్నికలు జరిగే అవకాశం ఉండటంతో, ఇప్పటి నుంచే క్షేత్రస్థాయిలో పార్టీ శ్రేణులను సమాయత్తం చేయాలని జగన్ దిశానిర్దేశం చేశారు. అంతేకాకుండా, ప్రస్తుతం జరుగుతున్న ఎంపీటీసీ, జెడ్పీటీసీ ఎన్నికల్లోనూ ఆమె వర్గానికి తగిన ప్రాధాన్యత ఇవ్వాలని జిల్లా నేతలకు సూచించారు.

నిబద్ధతతో పనిచేస్తా: గుండ లక్ష్మీదేవి.

వైఎస్సార్‌సీపీలో చేరిన అనంతరం గుండ లక్ష్మీదేవి మీడియాతో మాట్లాడుతూ భావోద్వేగానికి గురయ్యారు. “తెలుగుదేశం పార్టీ కోసం మా కుటుంబం 40 ఏళ్లపాటు రక్తం ధారపోసింది. కానీ మాకు చివరకు కన్నీళ్లు, అవమానాలే మిగిలాయి. నా భర్త విగ్రహాన్ని కూడా పెట్టుకోనివ్వకుండా అడ్డుకున్నారు. కూటమి ప్రభుత్వ పాలనలో ప్రజలు తీవ్ర ఇబ్బందులు పడుతున్నారు. ప్రజలకు మంచి చేయాలనే సంకల్పంతోనే వైఎస్ జగన్ నాయకత్వంపై నమ్మకంతో వైఎస్సార్‌సీపీలో చేరాను. ఏ పార్టీలో ఉన్నా క్రమశిక్షణ, నిబద్ధతతో పనిచేయడం మా కుటుంబ నైజం. జగన్ అప్పగించిన బాధ్యతలను నెరవేరుస్తూ శ్రీకాకుళంలో వైఎస్సార్‌సీపీ జెండా ఎగురవేస్తాం” అని ఆమె ధీమా వ్యక్తం చేశారు.