- వారం రోజుల పాటు విచారణపై స్టే విధించిన సుప్రీంకోర్టు
- హైకోర్టు డివిజన్ బెంచ్‌లో అప్పీల్ చేసుకునేందుకు అనుమతి
- ఎఫ్ఐఆర్‌ను రద్దు చేయలేదని స్పష్టం చేసిన ధర్మాసనం
న్యూఢిల్లీ, మహా : సీఎంఆర్‌ఎల్-ఎక్సాలాజిక్ అవినీతి కేసులో కేరళం మాజీ ముఖ్యమంత్రి, ప్రస్తుత ప్రతిపక్ష నేత పినరయి విజయన్‌తో పాటు ఆయన కుటుంబ సభ్యులకు సుప్రీంకోర్టులో భారీ ఊరట లభించింది. విజయన్, ఆయన కుమార్తె వీణ, అల్లుడు పీఏ మహమ్మద్ రియాస్‌లపై కేరళ విజిలెన్స్ విభాగం చేస్తున్న దర్యాప్తుపై వారం రోజుల పాటు స్టే విధిస్తూ అత్యున్నత న్యాయస్థానం మధ్యంతర ఉత్తర్వులు జారీ చేసింది. దసరా సెలవుల సందర్భంగా ప్రత్యేకంగా సమావేశమైన జస్టిస్ జాయ్‌మాల్య బాగ్చి, జస్టిస్ వి. మోహనలతో కూడిన ధర్మాసనం ఈ పిటిషన్‌ను విచారించింది. ఎఫ్ఐఆర్‌ను సవాలు చేసేందుకు పిటిషనర్లకు అవకాశం నిరాకరిస్తూ కేరళ హైకోర్టు డివిజన్ బెంచ్ ఇచ్చిన ఉత్తర్వులను సుప్రీంకోర్టు పక్కనపెట్టింది. ఈ కేసులో వారం రోజుల్లోగా హైకోర్టు డివిజన్ బెంచ్‌ను ఆశ్రయించి అప్పీల్ చేసుకునేందుకు వారికి అనుమతి ఇచ్చింది.
కోచిన్ మినరల్స్ అండ్ రూటైల్ లిమిటెడ్ (సీఎంఆర్‌ఎల్) నుంచి వీణకు చెందిన ఎక్సాలాజిక్ సొల్యూషన్స్ సంస్థకు ఎలాంటి సేవలు అందించకుండానే రూ. 2.78 కోట్లకు పైగా అక్రమంగా చెల్లింపులు జరిగాయనే ఆరోపణలపై ఈ కేసు నమోదైంది. ఈడీ ఇచ్చిన సమాచారం ఆధారంగా కేరళ విజిలెన్స్ అండ్ యాంటీ కరప్షన్ బ్యూరో (వీఏసీబీ) ఎఫ్ఐఆర్ నమోదు చేసింది. అయితే, తాము ఎఫ్ఐఆర్‌ను రద్దు చేయడం లేదని, కేవలం దర్యాప్తును మాత్రమే వారం పాటు నిలిపివేస్తున్నట్లు ధర్మాసనం స్పష్టం చేసింది. ఈ సందర్భంగా ఎన్‌ఫోర్స్‌మెంట్ డైరెక్టరేట్ (ఈడీ) తీరుపై కూడా కోర్టు కీలక వ్యాఖ్యలు చేసింది. “చట్టబద్ధమైన పరిమితులను దాటి జోక్యం చేసుకోవద్దు” అని హెచ్చరించింది. తదుపరి మధ్యంతర ఉత్తర్వులపై కేరళ హైకోర్టు స్వతంత్రంగా నిర్ణయం తీసుకోవచ్చని తెలిపింది.
