- రక్షణ మంత్రి రాజ్నాథ్ సింగ్ కీలక సమీక్ష.
- పశ్చిమాసియా ఉద్రిక్తతల వేళ త్రివిధ దళాధిపతులతో అత్యవసర భేటీ..
- రాజ్యసభలో నేడు ప్రధాని మోదీ ప్రకటన?
ఢిల్లీ, మహా.
పశ్చిమాసియాతో పాటు అంతర్జాతీయంగా, ప్రాంతీయంగా నెలకొన్న తీవ్ర సైనిక ఉద్రిక్తతల నేపథ్యంలో భారత ప్రభుత్వం మరింత అప్రమత్తమైంది. దేశ భద్రత, త్రివిధ దళాల సైనికపరమైన సన్నద్ధతపై రక్షణ శాఖ మంత్రి రాజ్నాథ్ సింగ్ మంగళవారం దిల్లీలో అత్యంత కీలకమైన సమీక్షా సమావేశాన్ని నిర్వహించారు. రోజురోజుకూ మారుతున్న భౌగోళిక రాజకీయ పరిణామాలు, పొంచి ఉన్న సవాళ్లను ఎదుర్కోవడానికి మన సాయుధ బలగాలు ఎంత మేర సన్నద్ధంగా ఉన్నాయన్న అంశంపై ఈ ఉన్నతస్థాయి భేటీలో సుదీర్ఘంగా చర్చించారు. దేశ రాజధాని న్యూదిల్లీలో జరిగిన ఈ అత్యున్నత స్థాయి భద్రతా సమావేశంలో రక్షణ రంగానికి చెందిన అగ్రశ్రేణి అధికారులు పాల్గొన్నారు. చీఫ్ ఆఫ్ డిఫెన్స్ స్టాఫ్ (సీడీఎస్) జనరల్ అనిల్ చౌహాన్, వాయుసేన ప్రధానాధికారి ఎయిర్ చీఫ్ మార్షల్ అమర్ ప్రీత్ సింగ్, ఆర్మీ చీఫ్ జనరల్ ఉపేంద్ర ద్వివేది, నౌకాదళాధిపతి అడ్మిరల్ దినేశ్ కే త్రిపాఠితో పాటు రక్షణ పరిశోధన, అభివృద్ధి సంస్థ (డీఆర్డీఓ) ఛైర్మన్ సమీర్ కామత్ తదితరులు ఈ భేటీకి హాజరయ్యారు. ఈ సందర్భంగా భద్రతా బలగాల చేతిలో ఉన్న ఆయుధ సంపత్తి, భవిష్యత్ వ్యూహాలను రక్షణ మంత్రికి వారు వివరించినట్లు తెలుస్తోంది.
మరోవైపు, పశ్చిమాసియాలో ఇజ్రాయెల్, ఇరాన్ తదితర దేశాల మధ్య జరుగుతున్న భీకర యుద్ధం వల్ల ప్రపంచంతో పాటు భారత్పై పడుతున్న ప్రతికూల ప్రభావం గురించి సోమవారం లోక్సభలో ప్రధానమంత్రి నరేంద్ర మోదీ సుదీర్ఘంగా వివరించిన విషయం తెలిసిందే. ప్రస్తుత అంతర్జాతీయ పరిస్థితులు అత్యంత ఆందోళనకరంగా ఉన్నాయని ఆయన సభ దృష్టికి తీసుకొచ్చారు. ఈ క్రమంలోనే పశ్చిమాసియా సైనిక ఉద్రిక్తతలు, దాని వల్ల దేశ ఇంధన భద్రతపై పడే ప్రభావాలపై మంగళవారం సాయంత్రంలోగా ప్రధాని మోదీ రాజ్యసభలోనూ కీలక ప్రకటన చేసే అవకాశాలు మెండుగా ఉన్నాయి. సరిగ్గా ఈ పరిణామాల నేపథ్యంలోనే రక్షణ మంత్రి రాజ్నాథ్ సింగ్ ఉన్నతస్థాయి సైనిక సమీక్షను నిర్వహించడం దేశవ్యాప్తంగా తీవ్ర ప్రాధాన్యాన్ని సంతరించుకుంది. పశ్చిమాసియా పరిణామాల సెగ మన దేశ ఆర్థిక, రక్షణ వ్యవస్థలపై పడకుండా కేంద్రం ముందస్తు వ్యూహాలతో అడుగులు వేస్తున్నట్లు ఈ వరుస పరిణామాలు స్పష్టం చేస్తున్నాయి.
