ఆదిచుంచనగిరిలో ‘శ్రీగురు భైరవైక్య మందిరం’ ఆవిష్కరణ: ఆధ్యాత్మికత, సేవలకు ఇది నిలువుటద్దమన్న ప్రధాని మోదీ

• ఆధ్యాత్మిక చైతన్యానికి ప్రతీక ఆదిచుంచనగిరి.
•  ‘శ్రీగురు భైరవైక్య మందిరాన్ని’ ఆవిష్కరించిన ప్రధాని మోదీ.
• భారతీయ సనాతన ధర్మం, సేవా సంప్రదాయాలకు నిలువుటద్దం.
• జ్ఞానానికి, ఆధ్యాత్మిక విలువలకు నివాళిగా నూతన మందిరం.
•  ప్రధాని మోదీ ఉద్వేగభరిత ప్రకటన.

మాండ్యా, మహా.

భారతీయ ఆధ్యాత్మిక వైభవాన్ని, తరతరాలుగా వస్తున్న సేవా తత్పరతను చాటిచెప్పే దిశగా కర్ణాటకలోని మాండ్యా జిల్లాలో బుధవారం ఒక చారిత్రక ఘట్టం ఆవిష్కృతమైంది. ప్రసిద్ధ పుణ్యక్షేత్రమైన శ్రీ ఆదిచుంచనగిరి మహాసంస్థాన మఠం వేదికగా బుధవారం ఉదయం శ్రీగురు భైరవైక్య మందిరాన్ని ప్రధాని నరేంద్ర మోదీ ఘనంగా ఆవిష్కరించారు. ఈ పవిత్ర మందిరం కేవలం ఒక కట్టడం మాత్రమే కాదని, మన భూమి యొక్క సనాతన ఆధ్యాత్మిక విలువలకు, అపారమైన జ్ఞాన సంపదకు మరియు దశాబ్దాలుగా కొనసాగుతున్న సేవా సంప్రదాయాలకు ఒక గొప్ప నివాళి అని ఈ సందర్భంగా ప్రధాని కొనియాడారు.
మఠానికి చేరుకున్న ప్రధానికి మఠాధిపతులు పూర్ణకుంభంతో స్వాగతం పలికారు. అనంతరం ఆయన మఠంలోని అత్యంత పవిత్రమైన జ్వాలా పీఠాన్ని దర్శించుకుని, శ్రీ కాలభైరవ స్వామి దేవాలయంలో ప్రత్యేక ప్రార్థనలు నిర్వహించారు. కాలభైరవ స్వామికి హారతి ఇచ్చి మొక్కులు తీర్చుకున్న ప్రధాని, కాసేపు ఆధ్యాత్మిక చింతనలో గడిపారు. ఈ సందర్భంగా ప్రధాని మాట్లాడుతూ.. “ఆదిచుంచనగిరి వంటి క్షేత్రాలు భారతీయ ఆత్మకు నిదర్శనాలని, ఇక్కడి మఠం సమాజానికి అందిస్తున్న విద్యా, సామాజిక సేవలు అమోఘమని” అభినందించారు. మన పూర్వీకులు అందించిన జ్ఞానం మరియు ఆధ్యాత్మిక పునాదులే దేశాభివృద్ధికి అసలైన ఊతమని ఆయన అభిప్రాయపడ్డారు.
అంతకుముందు బెంగళూరు విమానాశ్రయంలో ముఖ్యమంత్రి సిద్ధరామయ్య ప్రధానికి ఘనస్వాగతం పలికారు. ప్రధాని రాకతో ఆదిచుంచనగిరి క్షేత్రం ఆధ్యాత్మిక శోభతో వెలిగిపోయింది. మఠాధిపతుల ఆశీర్వచనాలు తీసుకున్న అనంతరం ప్రధాని తన పర్యటనను ముగించుకుని తిరుగు ప్రయాణమయ్యారు.