సినిమా అవకాశాల పేరిట దారుణం….

సినిమా అవకాశాల పేరిట దారుణం.
*అనాథ యువతిపై సామూహిక అత్యాచారం.
*గదిలో బంధించి రెండు రోజుల పాటు పైశాచికం.
*జూబ్లీహిల్స్ మెట్రో స్టేషన్ వద్ద తలదాచుకుంటున్న అభాగ్యురాళ్లపై వల.
* తీవ్ర గాయాలతో పోలీసులను ఆశ్రయించిన బాధితురాలు.. నిందితుల కోసం గాలింపు.
హైదరాబాద్, మహా.
హైదరాబాద్ మహా నగరంలో మరో దారుణం వెలుగుచూసింది. సినిమా అవకాశాల పేరిట అమాయక యువతుల జీవితాలతో ఆడుకుంటున్న కీచకుల ఆగడాలు రోజురోజుకూ మితిమీరిపోతున్నాయి. తాజాగా జూబ్లీహిల్స్ ప్రాంతంలో ఆశ్రయం పొందుతున్న ఓ అనాథ యువతిని సినీ పరిశ్రమలో అవకాశాలు ఇప్పిస్తామని నమ్మించి, రెండు రోజుల పాటు నిర్బంధించి సామూహిక అత్యాచారానికి పాల్పడిన అమానుష ఘటన నగరంలో కలకలం రేపుతోంది. ఒంటిపై తీవ్ర గాయాలతో నరకయాతన అనుభవించిన బాధితురాలు పోలీసులను ఆశ్రయించడంతో ఈ దారుణ ఘటన ఆలస్యంగా వెలుగులోకి వచ్చింది.
పోలీసులు, బాధితురాలు తెలిపిన ప్రాథమిక వివరాల ప్రకారం.. ఇద్దరు అనాథ యువతులు కొంతకాలంగా జూబ్లీహిల్స్‌ మెట్రో స్టేషన్‌ పరిసర ప్రాంతాల్లో తలదాచుకుంటూ జీవనం సాగిస్తున్నారు. ఒంటరిగా, దిక్కుతోచని స్థితిలో ఉన్న వీరి దైన్యాన్ని గమనించిన కొందరు దుర్మార్గులు పక్కా ప్రణాళికతో వారిని లక్ష్యంగా చేసుకున్నారు. తాము సినీ రంగానికి చెందిన వారమని, సినిమాల్లో షూటింగ్స్, క్యారెక్టర్ ఆర్టిస్టులుగా మంచి అవకాశాలు ఇప్పిస్తామని వారికి వల వేశారు. అనాథలైన ఆ యువతులు వారి మాయమాటలు నమ్మి మోసపోయారు. మెరుగైన జీవితం దొరుకుతుందన్న ఆశతో నిందితులు చెప్పిన మాటలను విశ్వసించారు.
పథకం ప్రకారం నిందితులు అభాగ్యురాలిని సికింద్రాబాద్‌లోని ఓ గదికి తీసుకెళ్లారు. అక్కడికి వెళ్లిన తర్వాత కీచకులు తమ అసలు స్వరూపాన్ని బయటపెట్టారు. యువతిని ఆ గదిలో బంధించి, రెండు రోజుల పాటు అత్యంత పాశవికంగా లైంగిక దాడికి పాల్పడ్డారు. బాధితురాలు ఎంత ప్రాధేయపడినా, కన్నీరుమున్నీరుగా విలపించినా కనికరించకుండా పైశాచిక ఆనందం పొందారు. అనంతరం ఈ నెల 16వ తేదీన ఎవరికీ అనుమానం రాకుండా ఉండేందుకు ఒక ర్యాపిడో బైక్‌ను బుక్ చేసి, తీవ్ర గాయాలతో ఉన్న బాధితురాలిని అందులో ఎక్కించి అక్కడి నుంచి పంపించివేశారు.
రెండు రోజుల పాటు జరిగిన అమానుష కాండలో బాధితురాలి ఒంటిపై తీవ్ర గాయాలయ్యాయి. ప్రాణాపాయ స్థితి నుంచి బయటపడిన ఆ యువతి చివరకు ధైర్యం చేసి జూబ్లీహిల్స్‌ పోలీస్ స్టేషన్‌ను చేరుకుని తనకు జరిగిన ఘోరమైన అన్యాయంపై ఫిర్యాదు చేసింది. బాధితురాలి దయనీయ పరిస్థితిని చూసిన పోలీసులు వెంటనే అప్రమత్తమై కేసు నమోదు చేసి దర్యాప్తు ముమ్మరం చేశారు. వైద్య పరీక్షల నిమిత్తం యువతిని ఆసుపత్రికి తరలించారు. నిందితులు ఎవరు, ఎక్కడి నుంచి వచ్చారు అనే కోణంలో మెట్రో స్టేషన్, సికింద్రాబాద్ పరిసరాల్లోని సీసీటీవీ ఫుటేజీలను పోలీసులు నిశితంగా పరిశీలిస్తున్నారు. కామాంధులను పట్టుకునేందుకు ప్రత్యేక పోలీసు బృందాలను రంగంలోకి దించినట్లు సమాచారం.