యాదగిరిగుట్ట భూములపై పూర్తి హక్కులు ఆలయానివే.
* అతిథిగృహాలు, భూ కేటాయింపుల్లో ‘తిరుమల’ మోడల్: సీఎం రేవంత్ రెడ్డి.
* మఠాలు, కుల సంఘాల స్థలాలపై పారదర్శక పాలసీకి ఆదేశం.
* వారం రోజుల్లోగా ఆలయ నిర్మాణ నాణ్యతపై సమగ్ర నివేదికకు డెడ్లైన్.
హైదరాబాద్, మహా.
ప్రముఖ పుణ్యక్షేత్రమైన యాదగిరిగుట్ట శ్రీ లక్ష్మీనరసింహస్వామి ఆలయ సమగ్ర అభివృద్ధి, భూ కేటాయింపులపై తెలంగాణ ముఖ్యమంత్రి రేవంత్ రెడ్డి కీలక నిర్ణయాలు తీసుకున్నారు. ఆలయ పరిధిలో స్థలాలు ఎవరికి కేటాయించినప్పటికీ, ఆయా భూములపై పూర్తి యాజమాన్య హక్కులు మాత్రం దేవస్థానానికే ఉండేలా కఠిన నిబంధనలు అమలు చేయాలని అధికారులను ఆదేశించారు. యాదగిరిగుట్ట అభివృద్ధిపై ఉన్నతాధికారులతో ముఖ్యమంత్రి ప్రత్యేక సమీక్షా సమావేశం నిర్వహించారు. ఈ సందర్భంగా భక్తుల వసతులు, భూముల పరిరక్షణపై పలు కీలక దిశానిర్దేశాలు చేశారు. ముఖ్యంగా హరే రామ హరే కృష్ణ ఫౌండేషన్కు భూమి కేటాయింపు విషయంలో స్పందిస్తూ.. ఆ స్థలాన్ని ప్రస్తుత మార్కెట్ రేటు ప్రకారమే కేటాయించాలని స్పష్టం చేశారు. ఆలయ పరిధిలో వివిధ మఠాలు, కుల సంఘాలకు స్థలాలు ఇచ్చే అంశంపై పారదర్శకమైన, నిర్దిష్ట నిబంధనలతో కూడిన ఒక స్పష్టమైన పాలసీని తక్షణమే రూపొందించాలని అధికారులకు సూచించారు.
దేశంలోనే అత్యంత ప్రసిద్ధ పుణ్యక్షేత్రమైన తిరుమలలో అనుసరిస్తున్న నిబంధనలు, విధానాలను యాదగిరిగుట్టలోనూ అమలు చేసేలా క్షుణ్ణంగా అధ్యయనం చేయాలని ముఖ్యమంత్రి అధికారులకు సూచించారు. కొండపై భక్తుల వసతి కోసం నిర్మించతలపెట్టిన అతిథిగృహాలు, కాటేజీల నిర్మాణంలోనూ పూర్తిగా తిరుమల మోడల్నే అనుసరించాలని స్పష్టం చేశారు. ఈ క్రమంలో గెస్ట్హౌస్ల నిర్మాణం చేపట్టేందుకు ఆసక్తి చూపే దాతలు, వివిధ సంస్థల వివరాలతో కూడిన ఒక సమగ్ర జాబితాను సిద్ధం చేయాలని, ఆ తర్వాత వారందరికీ విడతలవారీగా నిర్మాణ అనుమతులు మంజూరు చేయాలని చెప్పారు. అలాగే, ఆలయ పరిసరాల్లో నిలిచిపోయిన భూ సేకరణ ప్రక్రియను వేగవంతం చేసేందుకు అవసరమైన నిధులను తక్షణమే విడుదల చేయాలని సంబంధిత అధికారులను సీఎం రేవంత్ రెడ్డి ఆదేశించారు.
యాదగిరిగుట్ట పరిసర ప్రాంతాలను కేవలం ఆధ్యాత్మిక కేంద్రంగానే కాకుండా పర్యాటకంగానూ మరింత అభివృద్ధి చేసేందుకు పబ్లిక్-ప్రైవేట్ భాగస్వామ్యం (పీపీపీ) పద్ధతిలో ఒక ప్రత్యేక టూరిజం సర్క్యూట్ను ఏర్పాటు చేయాలని ముఖ్యమంత్రి ప్రతిపాదించారు. దీనివల్ల భక్తులకు మరింత మెరుగైన అనుభూతి దక్కుతుందన్నారు. ఇక గత ప్రభుత్వ హయాంలో జరిగిన యాదగిరిగుట్ట ఆలయ పునర్నిర్మాణ పనులు, వాటి నాణ్యతపై అప్పట్లో నిపుణుల కమిటీ సమర్పించిన నివేదికను మరోసారి క్షుణ్ణంగా పరిశీలించాలని అధికారులను ఆదేశించారు. ఆ నివేదికలోని అంశాల ఆధారంగా వారం రోజుల్లోగా తనకు ఒక సమగ్ర నివేదికను అందజేయాలని అధికారులకు డెడ్లైన్ విధించారు.
