సీబీడీటీ చైర్మన్ పదవీ కాలం మరో ఆరు నెలలు పొడిగింపు.
*కేంద్ర ప్రభుత్వం కీలక నిర్ణయం.
* డిసెంబర్ 31 వరకు విధుల్లో కొనసాగింపు.
*క్యాబినెట్ నియామకాల కమిటీ అధికారిక ఆమోదం.
ఢిల్లీ, మహా.
పాలనా వ్యవహారాలకు సంబంధించి కేంద్ర ప్రభుత్వం మరో కీలక నిర్ణయం తీసుకుంది. కేంద్ర ప్రత్యక్ష పన్నుల (సీబీడీటీ) చైర్మన్ రవి అగర్వాల్ పదవీ కాలాన్ని మరో ఆరు నెలల పాటు పొడిగిస్తూ ఉత్తర్వులు జారీ చేసింది. వాస్తవానికి ఇవాళ్టితో ఆయన పదవీ కాలం ముగియాల్సి ఉండగా.. సరిగ్గా అదే సమయంలో కేంద్రం ఈ కీలక నిర్ణయం తీసుకోవడం గమనార్హం. రవి అగర్వాల్ను కాంట్రాక్ట్ ప్రాతిపదికన మరో ఆరు నెలల పాటు సీబీడీటీ చైర్మన్గా తిరిగి నియమించేందుకు గాను క్యాబినెట్ నియామకాల కమిటీ (ఏసీసీ) తన అధికారిక ఆమోదం తెలిపింది. ఈ తాజా నిర్ణయంతో జూలై 1, 2026 నుంచి డిసెంబర్ 31, 2026 వరకు లేదా తదుపరి ఉత్తర్వులు వచ్చేంత వరకు ఆయన సీబీడీటీ చైర్మన్గా బాధ్యతల్లోనే కొనసాగనున్నారు.
1988 బ్యాచ్కు చెందిన ప్రతిష్టాత్మక ఐఆర్ఎస్ అధికారి అయిన రవి అగర్వాల్ జూన్ 2024లో మొదటిసారిగా సీబీడీటీ చైర్మన్గా అత్యున్నత బాధ్యతలను చేపట్టారు. అంతకుముందు ఆయన జూలై 2023 నుంచి సీబీడీటీ సభ్యుడిగా అడ్మినిస్ట్రేషన్ విభాగంలో సమర్థవంతంగా విధులు నిర్వర్తించారు. దేశంలో ఆదాయపు పన్ను శాఖకు అత్యున్నత విధాన రూపకల్పన సంస్థ అయిన సీబీడీటీలో ఒక చైర్మన్తో పాటు మొత్తం ఆరుగురు సభ్యులు ఉంటారు. ప్రస్తుతం దేశవ్యాప్తంగా ప్రత్యక్ష పన్ను వసూళ్లు అత్యంత స్థిరంగా పెరుగుతున్న తరుణంలో, కేంద్ర ప్రభుత్వం రవి అగర్వాల్ పదవీ కాలాన్ని పొడిగించడం ఆర్థిక మరియు పాలనాపరమైన వర్గాల్లో అత్యంత ప్రాధాన్యత సంతరించుకుంది.
