నౌకా దళానికి కొత్త బలం
స్టెల్త్ సామర్థ్యం పెంచే ఇంటిగ్రేటెడ్ మాస్ట్
భారత్-జపాన్ రక్షణ సహకారంలో కీలక అడుగు
ఇంటర్నెట్ డెస్క్, మహా : భారత్ – జపాన్ దేశాలు రక్షణ రంగంలో మరో కీలక ముందడుగు వేసాయి. జపాన్ అభివృద్ధి చేసిన యూనిఫైడ్ కాంప్లెక్స్ రేడియో అంటెన్నా (యూనికార్న్) సిస్టమ్ ఆధారంగా నౌకాదళ రేడియో యాంటెన్నాను సంయుక్తంగా అభివృద్ధి చేయడానికి రెండు దేశాలు ఒప్పందం కుదుర్చుకున్నాయి. ఈ ఒప్పందం జపాన్ ప్రధాని సానయే తకైచి భారత పర్యటన సందర్భంగా అధికారికంగా ప్రకటించారు. ఈ సందర్భంగా ప్రధాని నరేంద్ర మోదీ మాట్లాడుతూ.. ఇది భారత్-జపాన్ మధ్య జరిగిన తొలి ప్రత్యక్ష సంయుక్త రక్షణ అభివృద్ధి ప్రాజెక్ట్ అని పేర్కొన్నారు. ఈ ప్రాజెక్ట్ రెండు దేశాల రక్షణ సాంకేతిక సహకారానికి కొత్త దశను ప్రారంభిస్తుందని చెప్పారు. సముద్ర భద్రత, ప్రాంతీయ శాంతి, నియమ ఆధారిత అంతర్జాతీయ వ్యవస్థ బలోపేతం కోసం ఈ ప్రాజెక్ట్ కీలకంగా నిలుస్తుందని ఆయన అన్నారు. ఇప్పటివరకు భారత్-జపాన్ రక్షణ సహకారం ప్రధానంగా సంయుక్త సైనిక విన్యాసాలు, చర్చల వరకు మాత్రమే పరిమితమైంది. అయితే ఈ ఒప్పందంతో ఆ పరిధి దాటి ప్రత్యక్ష సాంకేతిక అభివృద్ధి దిశగా అడుగు పడింది.
యూనికార్న్ సిస్టమ్ ప్రత్యేకతలు
యూనికార్న్ సిస్టమ్ ప్రస్తుతం జపాన్ మెరైన్ సెల్ఫ్ డిఫెన్స్ ఫోర్స్కు చెందిన మోగామి క్లాస్ ఫ్రిగేట్స్ లో ఉపయోగంలో ఉంది. ఇది అధునాతన నౌకాదళ కమ్యూనికేషన్ వ్యవస్థగా గుర్తింపు పొందింది. భారత నౌకాదళం కూడా భవిష్యత్తులో నిర్మించబోయే కొత్త తరం యుద్ధ నౌకల్లో ఈ టెక్నాలజీ ఆధారిత యాంటెన్నాను ఉపయోగించే అవకాశం ఉంది. భారత్-జపాన్ మధ్య 2022 నుంచి ఈ సాంకేతికతపై చర్చలు కొనసాగుతున్నాయి. 2024లో ఇరు దేశాల విదేశాంగ, రక్షణ మంత్రులు ఈ ప్రాజెక్ట్ పురోగతిని ప్రశంసించారు. అలాగే డ్రోన్లు, అన్మ్యాన్డ్ వాహనాల కోసం ఆధునిక టెక్నాలజీలపై కూడా సంయుక్త పరిశోధనలు జరుగుతున్నాయి. మజగాన్ డాక్ (ఎండీఎల్) కూడా 2025లో భారత్–జపాన్ సంయుక్త డిస్ట్రాయర్ డిజైన్పై ప్రాథమిక చర్చలు జరిపినట్లు సమాచారం. ఈ ఒప్పందంతో భారత్–జపాన్ రక్షణ భాగస్వామ్యం మరింత బలపడనుంది. సముద్ర భద్రత రంగంలో ఆధునిక సాంకేతికత అభివృద్ధికి ఇది ఒక కీలక మైలురాయిగా భావిస్తున్నారు.
ఆధునిక నౌకాదళ యుద్ధ సామర్థ్యాలను మరింత బలోపేతం చేసే దిశగా జపాన్ అభివృద్ధి చేసిన యూనికార్న్ వ్యవస్థ ప్రపంచవ్యాప్తంగా రక్షణ రంగం దృష్టిని ఆకర్షిస్తోంది. వివిధ రకాల కమ్యూనికేషన్, నావిగేషన్, డేటా లింక్ యాంటెన్నాలను ఒకే మాస్ట్లో ఏకీకృతం చేయడం ఈ సాంకేతికత ప్రత్యేకత. సాంప్రదాయంగా యుద్ధ నౌకలపై అనేక యాంటెన్నాలు వేర్వేరుగా అమర్చబడతాయి. దీంతో నౌక రాడార్లో సులభంగా గుర్తించబడే అవకాశం ఉంటుంది. అయితే యూనికార్న్ వ్యవస్థలో అన్ని కీలక యాంటెన్నాలను ఒకే నిర్మాణంలో సమీకరించడం ద్వారా నౌక రాడార్ సిగ్నేచర్ను తగ్గించి స్టెల్త్ సామర్థ్యాన్ని పెంచుతుంది. దీంతో శత్రు రాడార్లకు నౌకను గుర్తించడం మరింత కష్టమవుతుంది.
యూనికార్న్ వ్యవస్థ వల్ల నౌకపై బయటకు కనిపించే యాంటెన్నాల సంఖ్య తగ్గిపోతుంది. దీంతో నౌక ఆకృతి మరింత సొగసుగా మారడమే కాకుండా, శత్రు రాడార్ల నుంచి గుర్తించే అవకాశాలు కూడా తగ్గుతాయి. అదే సమయంలో కమ్యూనికేషన్, నావిగేషన్, డేటా మార్పిడి, ఎలక్ట్రానిక్ వార్ఫేర్ వంటి అన్ని కీలక వ్యవస్థలు ఒకే మాస్ట్ ద్వారా సమర్థవంతంగా పనిచేస్తాయి.
