భూమి రుణాల పేరుతో భారీ మోసం..! అంతర్రాష్ట్ర నిందితుడు యుగంధర్‌ అరెస్ట్..

•  అంతర్రాష్ట్ర నిందితుడు యుగంధర్‌ అరెస్ట్.
• ఆస్తి పత్రాలు తీసుకుని మూడో వ్యక్తుల పేర్లకు బదిలీ.
•  బ్యాంకుల్లో కోట్లాది రుణాలు

హైదరాబాద్‌, మహా .
భూములు, ఆస్తులపై బ్యాంకు రుణాలు ఇప్పిస్తానంటూ బాధితులను నమ్మించి వారి ఆస్తి పత్రాలను దుర్వినియోగం చేస్తూ భారీ మోసాలకు పాల్పడుతున్న అంతర్రాష్ట్ర నిందితుడు నునావత్‌ యుగంధర్‌ను సీసీఎస్‌ పోలీసులు అరెస్టు చేశారు. ఎకనామిక్‌ ఆఫెన్సెస్‌ వింగ్‌ ఆధ్వర్యంలో జరిగిన దర్యాప్తులో యుగంధర్‌పై తెలంగాణ, ఆంధ్రప్రదేశ్‌లో 2016 నుంచి ఇప్పటివరకు 20కి పైగా క్రిమినల్‌, సివిల్‌ కేసులు ఉన్నట్లు పోలీసులు గుర్తించారు. వీటిలో 12 క్రిమినల్‌ కేసులతో పాటు ఎనిమిది సివిల్‌, నెగోషియబుల్‌ ఇన్‌స్ట్రుమెంట్స్‌ యాక్ట్‌కు సంబంధించిన కేసులు ఉన్నట్లు వెల్లడించారు. గతంలోనూ యుగంధర్‌పై ఆస్తి, రుణ మోసానికి సంబంధించిన కేసులు నమోదైనట్లు పలు పోలీసు, న్యాయ రికార్డుల్లో కనిపిస్తోంది.

తాజా కేసు దర్యాప్తులో యుగంధర్‌ మోసాల తీరు వెలుగులోకి వచ్చింది. ఓ బాధితుడికి రూ.60 లక్షల ఆర్థిక సాయం ఇప్పిస్తానంటూ ఆయనతో అవగాహన ఒప్పందం కుదుర్చుకున్న యుగంధర్‌, రుణం ఇప్పించే పేరుతో సేకరించిన ఆస్తి పత్రాలను బాధితుడికి తెలియకుండా దుర్వినియోగం చేసినట్లు పోలీసులు గుర్తించారు. ఆస్తిని మూడో వ్యక్తి పేరుతో బదిలీ చేయించి, అనంతరం అదే ఆస్తిని బ్యాంకులో తాకట్టు పెట్టి భారీ మొత్తంలో రుణం పొందినట్లు దర్యాప్తులో తేలింది.

బాధితుడికి తెలియకుండానే ఆస్తిని మూడో వ్యక్తి పేరిట బదిలీ చేసిన అనంతరం, ఆ ఆస్తిని ఆధారంగా చేసుకుని యాక్సిస్‌ బ్యాంక్‌ నుంచి ఏకంగా రూ.1.50 కోట్ల రుణం పొందినట్లు పోలీసులు గుర్తించారు. రుణం తిరిగి చెల్లించడంలో డిఫాల్ట్‌ కావడంతో బ్యాంకు నుంచి బాధితుడికి నోటీసులు అందాయి. దీంతో అనుమానం వచ్చిన బాధితుడు పత్రాలను పరిశీలించగా అసలు మోసం బయటపడింది. వెంటనే పోలీసులను ఆశ్రయించడంతో సీసీఎస్‌ అధికారులు కేసు నమోదు చేసి దర్యాప్తు ప్రారంభించారు.

విచారణలో యుగంధర్‌ ఇదే తరహాలో మరికొందరినీ లక్ష్యంగా చేసుకున్నట్లు బయటపడింది. భూములు, ఇళ్లు లేదా ఇతర ఆస్తులపై బ్యాంకు రుణాలు ఇప్పిస్తానంటూ బాధితులను నమ్మించడం, వారి నుంచి అసలు ఆస్తి పత్రాలు తీసుకోవడం, ఆ పత్రాలను ఉపయోగించి ఆస్తులను మూడో వ్యక్తుల పేర్లకు బదిలీ చేయడం, అనంతరం వాటిని బ్యాంకుల్లో తాకట్టు పెట్టి భారీ రుణాలు పొందడం అతడి ప్రధాన మోసపూరిత విధానంగా పోలీసులు గుర్తించారు.

ఇప్పటివరకు 30 మందికి పైగా బాధితులు యుగంధర్‌ చేతిలో మోసపోయినట్లు విచారణలో తేలినట్లు పోలీసులు వెల్లడించారు. బాధితుల నుంచి రూ.10 కోట్లకు పైగా మోసం చేసినట్లు ప్రాథమికంగా గుర్తించారు. అయితే దర్యాప్తు కొనసాగుతున్నందున బాధితుల సంఖ్య, మోసపోయిన మొత్తం మరింత పెరిగే అవకాశం ఉందని అధికారులు భావిస్తున్నారు. ఇతర జిల్లాలు, రాష్ట్రాల్లో నమోదైన కేసులు, ఆస్తుల బదిలీలు, బ్యాంకు రుణ లావాదేవీలను కూడా పోలీసులు పరిశీలిస్తున్నారు.

గతంలోనూ యుగంధర్‌పై ఆస్తిని ఉపయోగించి భారీ రుణం పొందిన వ్యవహారంలో కేసు నమోదైనట్లు పాత పోలీసు రికార్డులు సూచిస్తున్నాయి. ఒక బాధితుడి ఇంటిని రుణం ఇప్పించే పేరుతో ఇతరుల పేర్లకు రిజిస్టర్‌ చేయించి, అనంతరం ఆ ఆస్తిని ఉపయోగించి యాక్సిస్‌ బ్యాంక్‌ నుంచి రూ.2.41 కోట్ల రుణం పొందిన కేసులో యుగంధర్‌తో పాటు మరో నలుగురిని పోలీసులు అరెస్టు చేసినట్లు అప్పటి నివేదికలు వెల్లడించాయి. ఆ కేసులో రుణ మొత్తాన్ని ఇతర వ్యాపారాల్లో పెట్టుబడి పెట్టడంతో పాటు సహ నిందితులకు డబ్బులు పంపిణీ చేసినట్లు దర్యాప్తులో తేలింది.

యుగంధర్‌ వివిధ వ్యాపార సంస్థల్లో డైరెక్టర్‌గా కూడా ఉన్నట్లు కార్పొరేట్‌ రికార్డులు వెల్లడిస్తున్నాయి. జెట్‌అపెక్స్‌ మైన్స్‌ అండ్‌ మినరల్స్‌, జెట్‌అపెక్స్‌ పేపర్‌ ఇండస్ట్రీస్‌, సేఫ్‌ ఓయాసిస్‌, లోలోట్రాన్స్‌, బిడ్‌ట్రుక్జ్‌ ఇండియా వంటి పలు ప్రైవేటు కంపెనీలతో ఆయనకు సంబంధం ఉన్నట్లు అందుబాటులో ఉన్న రిజిస్ట్రార్‌ ఆఫ్‌ కంపెనీస్‌ ఆధారిత రికార్డులు సూచిస్తున్నాయి.

కేసు నమోదు చేసిన సీసీఎస్‌ పోలీసులు యుగంధర్‌ను అరెస్టు చేసి న్యాయస్థానంలో హాజరుపరిచారు. కోర్టు ఆదేశాల మేరకు ఆయనను రిమాండ్‌కు తరలించారు. ఈ కేసులో ఆస్తి రిజిస్ట్రేషన్‌ పత్రాలు, MOUలు, బ్యాంకు రుణ పత్రాలు, లావాదేవీల వివరాలు, సంబంధిత వ్యక్తుల పాత్రపై దర్యాప్తు కొనసాగుతోంది. మోసాల్లో మరెవరైనా భాగస్వాములుగా ఉన్నారా? నిందితుడు ఇదే విధానంలో ఇంకా ఎన్ని ఆస్తులను బదిలీ చేశాడు? ఎన్ని బ్యాంకుల నుంచి రుణాలు పొందాడు? అనే కోణాల్లోనూ అధికారులు విచారణ చేపడుతున్నారు.

ఇలాంటి మోసాల బారిన పడకుండా ప్రజలు అప్రమత్తంగా ఉండాలని సీసీఎస్‌ పోలీసులు సూచించారు. రుణం ఇప్పిస్తామంటూ వచ్చే వ్యక్తులకు అసలు ఆస్తి పత్రాలను అప్పగించే ముందు వారి వివరాలు, సంస్థ విశ్వసనీయత, రుణ ప్రక్రియ, ఒప్పందంలోని నిబంధనలను పూర్తిగా పరిశీలించాలని సూచించారు. ముఖ్యంగా రుణం కోసం ఆస్తిని ఇతరుల పేర్లకు బదిలీ చేయాలని కోరే వ్యక్తుల విషయంలో అత్యంత జాగ్రత్తగా వ్యవహరించాలని హెచ్చరించారు. ఆస్తి పత్రాలు, పవర్‌ ఆఫ్‌ అటార్నీ, యం ఓ యు లు లేదా రిజిస్ట్రేషన్‌ పత్రాలపై సంతకం చేసే ముందు న్యాయ నిపుణుల సలహా తీసుకోవడం ద్వారా ఇలాంటి మోసాలను ముందుగానే నివారించవచ్చని పోలీసులు స్పష్టం చేశారు.