చిరిగిన పది రూపాయల నోటు ప్రాణం తీసింది

•  ఢిల్లీలో ఫ్లిప్‌కార్ట్ డెలివరీ ఉద్యోగి దారుణ మృతి!
•  నోటు మార్చమన్నందుకు చెంపదెబ్బలు కొట్టి తీవ్రంగా అవమానించారు.
•  మనస్తాపంతో ఆత్మహత్య చేసుకున్న యువకుడు!
•  ఇద్దరు నిందితుల అరెస్ట్.. న్యాయం చేయాలంటూ కుటుంబ సభ్యులు, తోటి డెలివరీ ఉద్యోగుల తీవ్ర ఆందోళన!

ఢిల్లీ, మహా.

దేశ రాజధాని దిల్లీలో అత్యంత హృదయ విదారకమైన ఘటన వెలుగు చూసింది. కేవలం చిరిగిన పది రూపాయల నోటు విషయంగా తలెత్తిన చిన్న వివాదం ఒక నిండు ప్రాణాన్ని బలిగొన్న తీరు అందరినీ దిగ్భ్రాంతికి గురిచేసింది. ఫ్లిప్‌కార్ట్ మినిట్స్‌లో డెలివరీ ఎగ్జిక్యూటివ్‌గా పనిచేస్తున్న అమాయక యువకుడు పడ్డ అవమానం, భరించలేని మనస్తాపం చివరికి అతని ప్రాణాల మీదికి తెచ్చిన వైనంపై సర్వత్రా తీవ్ర ఆవేదన, ఆగ్రహం వ్యక్తమవుతున్నాయి.

తూర్పు దిల్లీలోని వినోద్‌ నగర్‌కు చెందిన సమీర్‌ హుస్సేన్ (23) ఫ్లిప్‌కార్ట్ మినిట్స్‌లో డెలివరీ ఉద్యోగిగా జీవనం సాగిస్తున్నాడు. అక్టోబరు 4న రాత్రి రాంపాల్‌ సింగ్‌ అనే వ్యక్తికి సుమారు రూ.150 విలువైన కాఫీ ఆర్డర్‌ను అందించేందుకు సమీర్‌ వెళ్లాడు. అయితే, ఆర్డర్‌కు నగదు చెల్లించే సమయంలో కస్టమర్ కొంత సమయం తీసుకున్నాడని, చివరకు ఇచ్చిన నగదులో ఒక పది రూపాయల నోటు చిరిగి ఉండటంతో దానిని మార్చి వేరే నోటు ఇవ్వాలని సమీర్ కోరాడు. కేవలం నోటు మార్చమని కోరినప్పటికీ, కస్టమర్ అత్యంత దురుసుగా ప్రవర్తించడమే కాకుండా, ఆ సమయంలో అక్కడికి వచ్చిన మరో వ్యక్తితో కలిసి తనను పలుమార్లు చెంపదెబ్బలు కొట్టి దారుణంగా అవమానించాడని సమీర్ తన చివరి వీడియోలో కన్నీటిపర్యంతమయ్యాడు. తన ఆర్థిక పరిస్థితిని, పేదరికాన్ని ఎత్తిచూపుతూ వారు చేసిన ఈ దాడి తనను మానసికంగా తీవ్రంగా కుంగదీసిందని ఆవేదన వ్యక్తం చేశాడు.

తనపై జరిగిన ఈ అన్యాయాన్ని తట్టుకోలేక అదే రోజు రాత్రి సమీర్‌ పోలీసు నియంత్రణ గదికి ఫోన్ చేసి ఫిర్యాదు చేశాడు. మరుసటి రోజు అక్టోబరు 5న కల్యాణ్‌పురి పోలీస్‌ స్టేషన్‌లో అధికారికంగా కేసు నమోదైంది. అయితే, జరిగిన అవమానాన్ని జీర్ణించుకోలేకపోయిన సమీర్‌ తీవ్ర మనస్తాపంతో అదే రోజు విషపదార్థం సేవించాడు. కుటుంబ సభ్యులు వెంటనే అప్రమత్తమై అతడిని ఆసుపత్రికి తరలించగా, గత కొన్ని రోజులుగా మృత్యువుతో పోరాడిన సమీర్‌ అక్టోబరు 20న చికిత్స పొందుతూ తుదిశ్వాస విడిచాడు. మరణానికి ముందు సమీర్ తన మొబైల్ ఫోన్‌లో రికార్డు చేసిన ఈ వీడియో ప్రస్తుతం సామాజిక మాధ్యమాలలో వైరల్ అవుతూ తీవ్ర సంచలనం సృష్టిస్తోంది.

ఈ దారుణ ఘటనకు సంబంధించి పోలీసులు దర్యాప్తు వేగవంతం చేసి రాంపాల్‌ సింగ్‌ (65), రాకేశ్‌ అలియాస్‌ బంటీ (30)లను అరెస్టు చేశారు. సమీర్‌ మరణాంతరం ఈ కేసు తీవ్రతను బట్టి ఆత్మహత్యకు ప్రేరేపించడాన్ని సూచించే భారతీయ న్యాయ సంహిత సెక్షన్ 108ని అదనంగా చేర్చినట్లు పోలీసులు వెల్లడించారు. నిందితుల పాత్ర, ఘటనకు దారితీసిన పూర్తి పరిస్థితులపై సమగ్ర విచారణ కొనసాగుతోంది. మరోవైపు, చిన్న విషయానికి జరిగిన ఘర్షణతో యువకుడు ప్రాణాలు కోల్పోవడంతో సమీర్‌ కుటుంబ సభ్యులు తీవ్ర విషాదంలో మునిగిపోయారు. తమ కంటికి రెప్పలా పెంచుకున్న బిడ్డను పొట్టనబెట్టుకున్న దోషులకు కఠిన శిక్ష విధించాలని, తమ కుటుంబానికి తగిన న్యాయం చేయాలని సమీర్ తల్లి మరియు బంధువులు కన్నీరుమున్నీరుగా విలపిస్తున్నారు. తోటి డెలివరీ ఉద్యోగులు సైతం ఈ ఘటనపై తీవ్ర ఆందోళన వ్యక్తం చేస్తూ, కార్మికుల భద్రతకు భరోసానివ్వాలని, బాధ్యులపై చట్టపరమైన అత్యంత కఠిన చర్యలు తీసుకోవాలని గట్టిగా డిమాండ్ చేస్తున్నారు.