రఘురామకృష్ణంరాజుకు సుప్రీంకోర్టులో చుక్కెదురు.
* రూ.237 కోట్ల బ్యాంకు మోసం కేసులో సీబీఐ ఎఫ్‌ఐఆర్ కొట్టివేసేందుకు నిరాకరణ!
– మద్రాస్ హైకోర్టు తీర్పును సమర్థించిన సర్వోన్నత న్యాయస్థానం.
అమరావతి, మహా.
టీడీపీ నేత, ఉండి శాసనసభ్యుడు కనుమూరు రఘురామకృష్ణంరాజుకు దేశ అత్యున్నత న్యాయస్థానం సుప్రీంకోర్టులో ఊహించని రీతిలో భారీ షాక్ తగిలింది. రూ.237 కోట్ల మేర బ్యాంకులను మోసం చేసి, ప్రభుత్వ నిధులను పెద్దఎత్తున పక్కదారి పట్టించిన కుంభకోణానికి సంబంధించి తనపై నమోదైన సీబీఐ ఎఫ్‌ఐఆర్‌ను రద్దు చేయాలంటూ (క్వాష్ పిటిషన్) ఆయన చేసిన అభ్యర్థనను సుప్రీంకోర్టు తోసిపుచ్చింది. ఆర్థిక అక్రమాలు, బ్యాంకుల నిధుల దోపిడీకి సంబంధించిన ఈ కేసులో సర్వోన్నత న్యాయస్థానం వెలువరించిన ఈ తీర్పు రాజకీయ వర్గాల్లో తీవ్ర సంచలనంగా మారింది.
కేసు నేపథ్యం మరియు ఆరోపణలు:
ఇండ్ భారత్ పవర్ జెన్‌కామ్ లిమిటెడ్ (ఏ-1) పేరుతో పవర్ ప్లాంట్ల ఏర్పాటు మరియు ఇతర వ్యాపార అవసరాల నిమిత్తం స్టేట్ బ్యాంక్ ఆఫ్ ఇండియా (SBI) నేతృత్వంలోని బ్యాంకు కన్సార్షియం నుంచి రఘురామకృష్ణంరాజు రూ.237.84 కోట్లను భారీ రుణంగా పొందారు. అయితే, ఆ రుణ నిధులను అసలు ప్రాజెక్ట్ అవసరాలకు వినియోగించకుండా.. నకిలీ కొనుగోలు పత్రాలు (ఫేక్ బిల్స్), బూటకపు అకౌంట్లను సృష్టించి గ్రూప్ కంపెనీలకు మళ్లించారని బ్యాంకులు ఆధారాలతో సహా సీబీఐకి ఫిర్యాదు చేశాయి. ఈ భారీ ఆర్థిక కుంభకోణంపై రంగంలోకి దిగిన సీబీఐ.. రఘురామకృష్ణంరాజుతో పాటు ఇతర డైరెక్టర్లపై ఐపీసీ సెక్షన్లు 120-బీ (నేరపూరిత కుట్ర), 420 (మోసం), 467, 468, 471 (ఫోర్జరీ, నకిలీ పత్రాల సృష్టి) మరియు అవినీతి నిరోధక చట్టం (పీసీ యాక్ట్) కింద క్రిమినల్ కేసులు నమోదు చేసి దర్యాప్తు చేపట్టింది.
సుప్రీంకోర్టు ద్విసభ్య ధర్మాసనం తీర్పు:
ఈ కేసుకు సంబంధించి దాఖలైన పిటిషన్లను సుప్రీంకోర్టు జస్టిస్ దీపాంకర్ దత్తా, జస్టిస్ శీల్ నాగులతో కూడిన ద్విసభ్య ధర్మాసనం విచారించింది. ఆర్థిక నేరాలకు సంబంధించిన దర్యాప్తు ప్రాథమిక దశలో ఉన్నందున తాము జోక్యం చేసుకోలేమని ధర్మాసనం స్పష్టం చేసింది. గతంలో మద్రాస్ హైకోర్టు ఇచ్చిన ఆదేశాల ప్రకారం, దర్యాప్తు అధికారి నిర్ణీత 16 వారాల్లోగా పూర్తిస్థాయి విచారణను ముగించి ప్రత్యేక కోర్టులో చార్జిషీట్ దాఖలు చేయాలన్న ఉత్తర్వులను సుప్రీంకోర్టు సమర్థించింది. ఈ మేరకు రఘురామకృష్ణంరాజుతో పాటు ఇండ్ భారత్ పవర్ జెన్‌కామ్ లిమిటెడ్ డైరెక్టర్లు కనుమూరు ఇందిరా ప్రియదర్శిని, రమాదేవి, దుంపల మధుసూధన రెడ్డి, అంబేడ్కర్ రాజ్‌కుమార్ గంటా, నారాయణ ప్రసాద్ తదితరులు దాఖలు చేసిన క్వాష్ పిటిషన్లన్నింటినీ సర్వోన్నత న్యాయస్థానం కొట్టివేసింది.
న్యాయస్థానంలో వాదనలు:
పిటిషనర్ల తరఫున సీనియర్ న్యాయవాది సిద్ధార్థ్ దవే వాదనలు వినిపిస్తూ.. కేవలం ఫోరెన్సిక్ ఆడిట్ నివేదిక ఆధారంగానే సీబీఐ ఎఫ్‌ఐఆర్ నమోదు చేసిందని, స్వతంత్ర డైరెక్టర్ల వాదనలను హైకోర్టు సరిగ్గా పరిగణనలోకి తీసుకోలేదని కోర్టు దృష్టికి తెచ్చారు. దీనిపై స్పందించిన జస్టిస్ దీపాంకర్ దత్తా ధర్మాసనం.. “ఈ వాదనలను మీరు గతంలో హైకోర్టులోనే ఎందుకు వినిపించలేదు?” అని నేరుగా ప్రశ్నించారు. గతంలో ఈ సీబీఐ కేసును కొట్టివేయాలని మద్రాస్ హైకోర్టును ఆశ్రయించగా.. ఆర్థిక నేరాల తీవ్రత దృష్ట్యా జోక్యం చేసుకోలేమని తేల్చిచెప్పిన హైకోర్టు, పిటిషన్లను తోసిపుచ్చుతూ దర్యాప్తునకు పూర్తి స్వేచ్ఛనిచ్చింది. హైకోర్టు తీర్పును సవాల్ చేస్తూ రఘురామకృష్ణంరాజు సుప్రీంకోర్టును ఆశ్రయించగా, అక్కడ కూడా ప్రతికూల తీర్పు రావడం గమనార్హం. సుప్రీంకోర్టు తాజా తీర్పుతో సీబీఐ దర్యాప్తు మరింత వేగవంతం కానుందని, ఈ కేసులో తదుపరి పరిణామాలు ఎలా ఉండబోతున్నాయనేది తీవ్ర ఉత్కంఠ రేకెత్తిస్తోంది.
