ఢిల్లీ, మహా.
పరస్పర అంగీకారంతో కొనసాగిన శారీరక సంబంధాన్ని.. ఆ బంధం విఫలమైన తర్వాత అత్యాచారంగా పరిగణించలేమని దేశ సర్వోన్నత న్యాయస్థానం సుప్రీంకోర్టు అత్యంత స్పష్టం చేసింది. ప్రేమ సంబంధం లేదా వివాహేతర/వైవాహిక బంధం కొనసాగిన సమయంలో ఇరువురి సమ్మతితో జరిగిన శారీరక సాన్నిహిత్యాన్ని తర్వాత కాలంలో అత్యాచారంగా పేర్కొనడం చట్టవిరుద్ధమని తేల్చిచెప్పింది. కేవలం బంధం ముగిసిందన్న ఒకే ఒక్క కారణంతో గతం నాటి అంగీకారాన్ని క్రిమినల్ నేరంగా మార్చడం సరికాదని సర్వోన్నత ధర్మాసనం హితవు పలికింది. ఈ మేరకు సుప్రీంకోర్టు న్యాయమూర్తులు జస్టిస్ బి.వి.నాగరత్న, జస్టిస్ ఆర్.మహదేవన్‌లతో కూడిన ధర్మాసనం ఒక కీలక కేసులో ఈ సంచలన తీర్పునిచ్చింది. ఈ తీర్పుతో కేరళకు చెందిన సంతోశ్ కుమార్ అనే వ్యక్తిపై నమోదైన అత్యాచారం మరియు మోసం కేసు నుంచి ఆయనకు సంపూర్ణ విముక్తి లభించింది.
చట్టబద్ధమైన సాన్నిహిత్యానికి, నేరాలకు మధ్య స్పష్టమైన వ్యత్యాసం ఉండాలి
ఈ విచారణ సందర్భంగా జస్టిస్ బి.వి.నాగరత్న, జస్టిస్ ఆర్.మహదేవన్‌ల ధర్మాసనం పలు కీలకమైన న్యాయపరమైన వ్యాఖ్యలు చేసింది. ఇరువురి మధ్య అనుబంధం సజావుగా సాగుతున్న కాలంలో ఇష్టపూర్వకంగా ఏర్పడిన శారీరక సాన్నిహిత్యాన్ని, ఆ బంధం చెడిపోయిన తర్వాత అత్యాచారంగా చిత్రీకరించడం ఏమాత్రం సమర్థనీయం కాదని పేర్కొంది. కేవలం బంధం విఫలమైందనే కక్షతో గతంలో ఇచ్చిన అంగీకారాన్ని వెనక్కి తీసుకుని దానిని నేరంగా పరిగణించడం చట్టాన్ని దుర్వినియోగం చేయడమే అవుతుందని తెలిపింది.
అయితే, ఇదే సమయంలో అత్యంత కీలకమైన మినహాయింపును కూడా కోర్టు స్పష్టం చేసింది. మొదటి నుంచీ మోసం చేయాలనే ఉద్దేశంతో, తప్పుడు పెళ్లి హామీలతో లేదా మోసపూరితంగా శారీరక బంధానికి అంగీకారం పొందిన సందర్భాలను ఇలాంటి సాధారణ కేసులతో పోల్చకూడదని స్పష్టం చేసింది. ఒకవేళ వాస్తవంగా బలవంతం, లైంగిక హింస లేదా అంగీకారాన్ని మోసపూరితంగా పొందిన బలమైన ఆధారాలు ఉంటే అలాంటి అంశాలను తీవ్రమైన నేరాలుగా పరిగణించాల్సిందేనని ధర్మాసనం తేల్చిచెప్పింది.
అత్యాచారం వంటి తీవ్రమైన నేరాల ప్రాధాన్యం తగ్గే ప్రమాదం
వ్యక్తిగత సంబంధాలు విఫలమైన ప్రతీసారీ క్రిమినల్ కేసులు బనాయించడం వల్ల, సమాజంలో అత్యాచారం వంటి తీవ్రమైన లైంగిక నేరాల అసలు ప్రాధాన్యం, తీవ్రత తగ్గిపోయే ప్రమాదం ఉందని సుప్రీంకోర్టు ధర్మాసనం తీవ్ర ఆందోళన వ్యక్తం చేసింది. ఈ చారిత్రాత్మక తీర్పు ద్వారా.. పరస్పర అంగీకారంతో కూడిన సాధారణ సంబంధాలకు, నిజమైన లైంగిక నేరాలకు మధ్య ఉన్న గీతను న్యాయస్థానాలు, దర్యాప్తు సంస్థలు స్పష్టంగా గుర్తించాలని సుప్రీంకోర్టు మార్గనిర్దేశం చేసింది.
