రౌడీ షీటర్లపై డ్రోన్ల నిఘా….

**రౌడీ షీటర్లపై డ్రోన్ల నిఘా.**
**పెట్టుబడులే లక్ష్యంగా పక్కాగా శాంతిభద్రతలు.** **పోలీసు బలగాల హేతుబద్ధీకరణకు సీఎం గ్రీన్ సిగ్నల్!**
**నేరాల వేటలో కొత్త వ్యూహం.**
**ఏపీలో పోలీసు వ్యవస్థ ప్రక్షాళనకు బాబు సంచలన ఆదేశాలు!**
విజయవాడ, మహా.
నేరగాళ్ల ఆటకట్టించేందుకు సరికొత్త వ్యూహంతో
రాష్ట్ర సచివాలయంలో హోం శాఖ ఉన్నతాధికారులతో ముఖ్యమంత్రి నారా చంద్రబాబు నాయుడు ఆదివారం నిర్వహించిన ఉన్నత స్థాయి సమీక్షా సమావేశం నేరగాళ్ల గుండెల్లో వణుకు పుట్టిస్తోంది. రాష్ట్రంలో శాంతిభద్రతల పరిరక్షణే ధ్యేయంగా పోలీసు వ్యవస్థలో సమూల మార్పులకు సీఎం శ్రీకారం చుట్టారు. రాష్ట్రవ్యాప్తంగా పోలీసు బలగాల హేతుబద్ధీకరణ ప్రక్రియను చేపట్టాలని, ఎక్కడా సిబ్బంది కొరత అన్న మాట వినిపించకూడదని అధికారులను గట్టిగా ఆదేశించారు. ముఖ్యంగా కొత్తగా ఏర్పడిన జిల్లాలు, సున్నితమైన ప్రాంతాలు, భక్తుల రద్దీ ఎక్కువగా ఉండే ప్రధాన దేవాలయాల వద్ద అవసరాలకు అనుగుణంగా సిబ్బందిని కేటాయించాలని దిశానిర్దేశం చేశారు. కట్టుదిట్టమైన నిఘా ఉంటేనే సమాజంలో నేరగాళ్లకు భయం ఉంటుందని, తద్వారా శాంతిభద్రతలు అదుపులో ఉంటాయని ముఖ్యమంత్రి స్పష్టం చేశారు.
**తగ్గిన నేరాలు.. పెరిగిన టెక్ మోసాలపై బాబు గురి**
రాష్ట్రంలో గతంతో పోలిస్తే నేరాల శాతం ఆరు శాతం మేర తగ్గడం పట్ల ముఖ్యమంత్రి సంతృప్తి వ్యక్తం చేసినప్పటికీ, అంతర్జాల మోసాలు (సైబర్ నేరాలు), ఆర్థిక నేరాలు పెరగడంపై ఆందోళన వ్యక్తం చేశారు. ఆధునిక కాలంలో నేరగాళ్లు సాంకేతికతను వాడుకుంటూ చేస్తున్న మోసాలను అరికట్టేందుకు పోలీసులు మరింత కఠినంగా వ్యవహరించాలని ఆదేశించారు. శాంతిభద్రతలు బాగున్న రాష్ట్రానికే పెట్టుబడులు క్యూ కడతాయని, నిరుద్యోగులకు ఉద్యోగ అవకాశాలు లభించాలన్నా, రాష్ట్ర ఆర్థిక వ్యవస్థ పటిష్టం కావాలన్నా పోలీసుల పనితీరు అత్యంత కీలకమని చంద్రబాబు పేర్కొన్నారు. అంతర్జాతీయ స్థాయి సంస్థలను ఆకర్షించాలంటే రాష్ట్రం సురక్షితం అనే భరోసాను కల్పించాల్సిన బాధ్యత పోలీసు యంత్రాంగంపైనే ఉందని గుర్తు చేశారు.
**రౌడీ గ్యాంగులపై ఉక్కుపాదం.. డ్రోన్ల నిఘా సిద్ధం**
నేర ప్రవృత్తి ఉన్న వ్యక్తులు, రౌడీ షీటర్ల కదలికలను కనిపెట్టేందుకు డ్రోన్ సాంకేతికతను వినియోగించాలని ముఖ్యమంత్రి సరికొత్త సూచన చేశారు. నెల్లూరులో పట్టుబడిన రౌడీ గ్యాంగుల తరహాలోనే రాష్ట్రంలోని ఇతర జిల్లాల్లోనూ అసాంఘిక శక్తుల కదలికలు ఉన్నాయేమో ఆరా తీయాలని ఆదేశించారు. రౌడీయిజం, గూండాయిజం అన్న పదాలే రాష్ట్రంలో వినిపించకూడదని, అరాచక శక్తులపై ఉక్కుపాదం మోపాలని పోలీసులకు స్పష్టమైన సంకేతాలిచ్చారు. గంజాయి, మాదక ద్రవ్యాల నెట్‌వర్క్‌ను పూర్తిగా తుడిచిపెట్టాలని, అదే సమయంలో వ్యసనాలకు బానిసైన వారికి పునరావాస కేంద్రాల ద్వారా విముక్తి కల్పించే చర్యలు చేపట్టాలని సూచించారు. కఠినమైన పోలీసు వ్యవస్థే నేరగాళ్లలో వణుకు పుట్టిస్తుందని, సామాన్యుడికి భరోసా ఇస్తుందని బాబు వ్యాఖ్యానించారు.
**రహదారి భద్రత.. మహిళా రక్షణకు పెద్దపీట**
రాష్ట్రవ్యాప్తంగా గుర్తించిన 503 ప్రమాదకర మలుపులు (బ్లాక్ స్పాట్స్) వద్ద ప్రమాదాలను నివారించేందుకు తక్షణమే చర్యలు తీసుకోవాలని ముఖ్యమంత్రి ఆదేశించారు. అవసరమైన చోట తక్షణ వైద్యం కోసం అత్యవసర చికిత్సా కేంద్రాలను (ట్రామా సెంటర్లు) ఏర్పాటు చేయాలని సూచించారు. మహిళలపై నేరాలు తగ్గుముఖం పట్టడం శుభపరిణామమని పేర్కొన్నప్పటికీ, పోలీసులు ఎప్పుడూ అప్రమత్తంగా ఉండాలని హితవు పలికారు. అపరాధులు శిక్షల నుంచి తప్పించుకోలేరనే భయం కలిగించేలా విచారణ ప్రక్రియ వేగవంతం కావాలని కోరారు. రహదారి భద్రత నుంచి మహిళా రక్షణ వరకు ప్రతి విషయంలోనూ పోలీసులు తమ నిబద్ధతను చాటుకోవాలని ముఖ్యమంత్రి పిలుపునిచ్చారు.