* ప్రపంచానికి యోగా ఓ అమూల్యమైన ఆరోగ్య కానుక.
* కేంద్ర మంత్రి జి. కిషన్ రెడ్డి.
హైదరాబాద్, మహా.
యోగా అనేది కేవలం భారతదేశ ప్రాచీన వారసత్వం మాత్రమే కాదని, అది యావత్ మానవాళికి మన దేశం అందించిన అత్యంత విలువైన ఆరోగ్య కానుక (హెల్త్ గిఫ్ట్) అని కేంద్ర బొగ్గు, గనుల శాఖ మంత్రి శ్రీ జి. కిషన్ రెడ్డి ఉద్ఘాటించారు. శనివారం కన్హా శాంతి వనంలో జరిగిన ’12వ అంతర్జాతీయ యోగా దినోత్సవం – 50 రోజుల కౌంట్డౌన్’ కార్యక్రమంలో ఆయన ముఖ్య అతిథిగా పాల్గొన్నారు. ఈ సందర్భంగా ఆయన ప్రసంగిస్తూ, ప్రధాని నరేంద్ర మోదీ నాయకత్వంలో భారతీయ సంస్కృతి, ఆధ్యాత్మికత ఏ విధంగా ప్రపంచ వేదికలపై సగర్వంగా వెలుగుతున్నాయో వివరించారు.
**అంతర్జాతీయ స్థాయిలో భారతీయ విద్యకు గౌరవం**
వేల సంవత్సరాల క్రితమే మన పూర్వీకులు శరీరం, మనస్సు, ఆత్మల మధ్య సమతుల్యాన్ని సాధించే అద్భుతమైన జ్ఞానాన్ని యోగా రూపంలో అందించారని కిషన్ రెడ్డి గుర్తు చేశారు. 2014లో నరేంద్ర మోదీ ప్రధానిగా బాధ్యతలు చేపట్టిన తర్వాత, ఐక్యరాజ్యసమితి వేదికగా యోగా ప్రాధాన్యతను చాటిచెప్పి, జూన్ 21ని అంతర్జాతీయ యోగా దినోత్సవంగా గుర్తింపు తెచ్చారని కొనియాడారు. నేడు ఇస్లామిక్ దేశాల నుంచి పాశ్చాత్య దేశాల వరకు, మతాలకు అతీతంగా సుమారు 170కి పైగా దేశాలు యోగాను ఆచరిస్తున్నాయని, ఇది ప్రతి భారతీయుడు గర్వించదగ్గ విషయమని ఆయన అన్నారు. ప్రపంచ స్థాయి కంపెనీల సీఈఓల నుంచి శాస్త్రవేత్తల వరకు అందరూ యోగా ద్వారా మానసిక ప్రశాంతతను పొందుతున్నారని తెలిపారు.
**వికసిత్ భారత్ లక్ష్యం..ఆరోగ్యవంతమైన సమాజం**
2047 నాటికి భారతదేశాన్ని అభివృద్ధి చెందిన దేశంగా (వికసిత్ భారత్) తీర్చిదిద్దాలనే సంకల్పంలో యోగా కీలక పాత్ర పోషిస్తుందని మంత్రి పేర్కొన్నారు. దేశం ఆర్థికంగా ఎదగడంతో పాటు, ప్రజలు ముఖ్యంగా యువత శారీరకంగా, మానసిక దృఢత్వంతో ఉండాలని ఆయన ఆకాంక్షించారు. ఆరోగ్యవంతమైన, క్రమశిక్షణ కలిగిన సమాజం ఉన్నప్పుడే వికసిత్ భారత్ నిర్మాణం సుగమం అవుతుందని వివరించారు. నేటి డిజిటల్ యుగంలో పని ఒత్తిడి, కలుషితమైన గాలి, రసాయనాలతో కూడిన ఆహారం మరియు సోషల్ మీడియా ప్రభావం వల్ల కలిగే అలజడి నుంచి బయటపడటానికి యోగా ఒక్కటే సరైన మార్గమని ఆయన సూచించారు. “ఖర్చు లేని, ఆచరణ సాధ్యమైన అద్భుత మార్గం యోగా” అని ఆయన అభివర్ణించారు.
**వికాస్ బి – విరాసత్ బి**
ప్రధాని మోదీ నినాదం ‘వికాస్ బి – విరాసత్ బి’ (అభివృద్ధి మరియు వారసత్వం)కు అనుగుణంగా ఒకవైపు సాంకేతికత, మౌలిక సదుపాయాల అభివృద్ధి జరుగుతుంటే, మరోవైపు అయోధ్య రామమందిరం, కాశీ విశ్వనాథ్ కారిడార్ వంటి కేంద్రాల ద్వారా మన సంస్కృతికి పునర్జీవం పోస్తున్నామని కిషన్ రెడ్డి అన్నారు. ఈ క్రమంలోనే యోగా, ఆయుర్వేదం, మిల్లెట్ మిషన్ వంటివి ప్రపంచాన్ని ఆకర్షిస్తున్నాయని చెప్పారు. హైదరాబాద్లోని కన్హా శాంతి వనం ప్రకృతికి, ఆధ్యాత్మికతకు నెలవని, ఇక్కడ యోగా ఉత్సవాన్ని నిర్వహించడం సంతోషకరమని పేర్కొన్నారు.
**ప్రతి ఇంటికి యోగా చేరాలి**
హైదరాబాద్ నగరం ఐటి, ఫార్మా రంగాల్లోనే కాకుండా భవిష్యత్తులో ‘యోగా హబ్’గా కూడా గుర్తింపు పొందాలని కిషన్ రెడ్డి పిలుపునిచ్చారు. తెలంగాణలోని ప్రతి పాఠశాల, కళాశాల, ప్రతి కార్యాలయం మరియు స్వయం సహాయక సంఘాల్లో యోగా ఒక నిత్యకృత్యం కావాలని ఆయన కోరారు. “మీకు మీరే మొదటి డాక్టర్.. ఆ డాక్టర్కు యోగానే అసలైన మందు” అని ఆయన వ్యాఖ్యానించారు. ప్రతి ఇంట్లో యోగా ఆచరించడం ద్వారా సానుకూల మార్పులు వస్తాయని, ప్రతి వ్యక్తి తన చివరి శ్వాస వరకు ఆరోగ్యంగా ఉండటానికి ఇది తోడ్పడుతుందని మంత్రి కిషన్ రెడ్డి తన ప్రసంగాన్ని ముగించారు.
ఈ కార్యక్రమంలో కేంద్ర మంత్రి ప్రతాప్ రావు జాదవ్, ఉన్నతాధికారులు , పెద్ద సంఖ్యలో యోగా సాధకులు పాల్గొన్నారు.
