తెలంగాణలో ఆర్థిక ఎమర్జెన్సీ…..

* అప్పుల కుప్పగా రాష్ట్రం.
* కాంగ్రెస్, బీఆర్ఎస్ దొందూ దొందే అంటూ కేంద్ర మంత్రి కిషన్ రెడ్డి నిప్పులు.
హైదరాబాద్, మహా.
తెలంగాణ రాష్ట్రం ప్రస్తుతం అత్యంత భయంకరమైన ఆర్థిక సంక్షోభంలో కూరుకుపోయిందని, ఒకప్పుడు మిగులు బడ్జెట్‌తో కళకళలాడిన రాష్ట్రం నేడు దివాలా తీసే స్థితికి చేరుకుందని కేంద్ర బొగ్గు, గనుల శాఖ మంత్రి శ్రీ జి. కిషన్ రెడ్డి ఆందోళన వ్యక్తం చేశారు. గత పన్నెండేళ్లుగా బీఆర్ఎస్, కాంగ్రెస్ పార్టీలు కలిసి తెలంగాణను అడ్డగోలుగా దోచుకున్నాయని, వీరి స్వార్థ రాజకీయాల వల్ల రాష్ట్ర భవిష్యత్తు అంధకారంలో పడిందని ఆయన మండిపడ్డారు. శనివారం జరిగిన ఒక కార్యక్రమంలో పాల్గొన్న ఆయన, రాష్ట్ర ఆర్థిక పరిస్థితిపై ఘాటు వ్యాఖ్యలు చేశారు.
**దోచుకోవడమే లక్ష్యం.. అభివృద్ధిపై శూన్యం**
తెలంగాణలో అధికారంలో ఉన్న కాంగ్రెస్ పార్టీకి గానీ, గతంలో పాలించిన బీఆర్ఎస్‌కు గానీ రాష్ట్ర అభివృద్ధిపై ఏమాత్రం దృష్టి లేదని కిషన్ రెడ్డి విమర్శించారు. పొద్దున లేచింది మొదలు సాయంత్రం వరకు అప్పులు ఎక్కడ తేవాలి, ఏ రకంగా భూములు కబ్జా చేయాలి, ప్రజల సొమ్మును ఏ విధంగా దోచుకోవాలి అనే ఆలోచన తప్ప ఈ రెండు పార్టీలకు మరో ధ్యాస లేదని ధ్వజమెత్తారు. గత 12 ఏళ్ల కాలంలో ఈ రెండు పార్టీలు కలిసి సుమారు 12 లక్షల కోట్ల రూపాయల మేర తెలంగాణను మోసం చేశాయని, ఈ భారీ దోపిడీ వల్లే రాష్ట్రం నేడు అప్పుల ఊబిలో కూరుకుపోయిందని ఆయన గణాంకాలతో సహా వివరించారు.
**సెక్రటేరియట్‌లో పోలీసుల పహారా.. అప్పుల బాధకు నిదర్శనం**
రాష్ట్ర ఆర్థిక పరిస్థితి ఎంత దారుణంగా ఉందో చెప్పడానికి సచివాలయంలోని ప్రస్తుత పరిస్థితులే నిదర్శనమని కిషన్ రెడ్డి ఎద్దేవా చేశారు. రాష్ట్ర ఆర్థిక శాఖ మంత్రి భట్టి విక్రమార్క కార్యాలయం ముందు నిరంతరం పోలీసుల కాపలా ఉండటం శోచనీయమన్నారు. రాష్ట్రానికి అప్పులు ఇచ్చిన వారు తమ డబ్బుల కోసం వచ్చి ఎక్కడ ధర్నా చేస్తారో, ఎక్కడ నిలదీస్తారో అనే భయంతో పోలీసులను కాపలా పెట్టుకోవాల్సిన దుస్థితి ఈ ప్రభుత్వానికి వచ్చిందని ఆయన విమర్శించారు. ఒక రాష్ట్ర ఆర్థిక మంత్రి కార్యాలయానికి ఈ స్థాయిలో పోలీసు రక్షణ అవసరం పడటం అనేది రాష్ట్ర ఆర్థిక పతనానికి పరాకాష్ట అని ఆయన అభివర్ణించారు.
**మిగులు బడ్జెట్ నుంచి దివాలా వరకు..**
2014లో తెలంగాణ రాష్ట్రం ఏర్పడినప్పుడు ఎంతో ఆశాజనకమైన మిగులు బడ్జెట్‌తో ప్రస్థానాన్ని ప్రారంభించిందని కిషన్ రెడ్డి గుర్తు చేశారు. కానీ, పాలకులకు కనీస ముందుచూపు లేకపోవడం, కేవలం కమీషన్ల కోసం ప్రాజెక్టుల రీ-డిజైనింగ్‌లు చేయడం, విచ్చలవిడిగా అప్పులు చేసి ఆ సొమ్మును పక్కదారి పట్టించడం వల్ల నేడు రాష్ట్రం దివాలా తీసే స్థితికి వచ్చిందని ఆవేదన వ్యక్తం చేశారు. సంక్షేమం పేరుతో ఒకవైపు, అభివృద్ధి పేరుతో మరోవైపు సాగుతున్న ఈ దోపిడీకి అడ్డుకట్ట పడకపోతే భవిష్యత్తులో ఉద్యోగుల జీతాలకు కూడా దిక్కులేని పరిస్థితి ఏర్పడుతుందని ఆయన హెచ్చరించారు.