ఈడీ పంజా.. రికార్డు స్థాయిలో దాడులు
* ఆస్తుల అటాచ్మెంట్లో సరికొత్త రికార్డు!
*రికార్డు స్థాయిలో రూ. 81,422 కోట్ల ఆస్తుల జప్తు.
* అరెస్టుల కంటే ఆధారాలకే ఈడీ మొగ్గు.
*వేగవంతమైన దర్యాప్తు.
* బాధితుల కోసం రూ. 32 వేల కోట్ల ఆస్తుల పునరుద్ధరణ.
*ఆర్థిక నేరగాళ్లపై ఈడీ ‘డిజిటల్’ యుద్ధం..
హైదరాబాద్, మహా.
దేశవ్యాప్తంగా సంచలనం సృష్టిస్తున్న కేంద్ర దర్యాప్తు సంస్థ ఎన్ఫోర్స్మెంట్ డైరెక్టరేట్ (ఈడీ), గడిచిన 2025-2026 ఆర్థిక సంవత్సరానికి సంబంధించిన వార్షిక నివేదికను విడుదల చేసింది. ఈ నివేదికలో పొందుపరిచిన లెక్కలు మనీ లాండరింగ్ నిరోధక చర్యల్లో ఈడీ ఎంత వేగంగా అడుగులు వేస్తుందో స్పష్టం చేస్తున్నాయి. గత సంవత్సరంతో పోలిస్తే ఈడీ సోదాల సంఖ్య ఏకంగా రెట్టింపు కాగా, ఆస్తుల అటాచ్మెంట్లో మునుపెన్నడూ లేని విధంగా కొత్త రికార్డులు నమోదయ్యాయి. అదే సమయంలో అరెస్టుల విషయంలో మాత్రం ఈడీ ఆచితూచి అడుగువేస్తూ, కేవలం పక్కా ఆధారాలు ఉన్నప్పుడే చర్యలకు దిగుతున్నట్లు గణాంకాలు చెబుతున్నాయి.
**రెట్టింపైన సోదాలు.. తగ్గిన అరెస్టులు**
ఈడీ నివేదిక ప్రకారం 2025 ఏప్రిల్ 1 నుండి 2026 మార్చి 31 వరకు నిర్వహించిన దాడుల సంఖ్య విస్మయానికి గురిచేస్తోంది. గత ఆర్థిక సంవత్సరంలో 1,491 సోదాలు నిర్వహించగా, ఈసారి ఆ సంఖ్య ఏకంగా 2,892కు పెరిగింది. అంటే దాడుల తీవ్రత 100 శాతానికి పైగా పెరిగింది. అయితే, దాడులు పెరిగినప్పటికీ అరెస్టుల సంఖ్యలో మాత్రం 27 శాతం తగ్గుదల కనిపించింది. గత ఏడాది 214 మందిని అరెస్టు చేయగా, ఈ ఏడాది ఆ సంఖ్య 156కే పరిమితమైంది. దీనిపై ఈడీ వివరణ ఇస్తూ.. కేవలం ప్రత్యక్ష ఆధారాలు లభించిన కీలక కేసుల్లోనే అరెస్టులకు మొగ్గు చూపుతున్నామని, నాణ్యమైన దర్యాప్తునకే ప్రాధాన్యత ఇస్తున్నామని స్పష్టం చేసింది.
**రూ. 81 వేల కోట్ల ఆస్తుల అటాచ్మెంట్**
ఈ ఏడాది ఈడీ సాధించిన అతిపెద్ద విజయం ఆస్తుల జప్తులో కనిపిస్తోంది. దేశ చరిత్రలోనే రికార్డు స్థాయిలో రూ. 81,422 కోట్ల విలువైన ఆస్తులను ఈడీ తాత్కాలికంగా అటాచ్ చేసింది. గత ఏడాది అటాచ్ చేసిన రూ. 30,036 కోట్లతో పోలిస్తే ఇది 171 శాతం పెరుగుదల కావడం గమనార్హం. ఉన్నతాధికారుల నుండి అందిన 712 ఆదేశాల మేరకు ఈ భారీ చర్యలు తీసుకున్నారు. కేవలం ఆస్తులను జప్తు చేయడమే కాకుండా, బాధితులకు ఊరటనిచ్చేలా రూ. 32,678 కోట్ల విలువైన ఆస్తులను తిరిగి పునరుద్ధరించింది. ఇందులో ‘పెర్ల్స్ అగ్రోటెక్’ పోంజీ స్కీమ్ బాధితులకు సంబంధించిన రూ. 15,582 కోట్లు ఉండటం విశేషం. మోసపోయిన ఇన్వెస్టర్లు, బ్యాంకులు, ఇళ్ల కొనుగోలుదారులకు న్యాయం చేయడంలో ఈడీ తన లక్ష్యాన్ని రెట్టింపు స్థాయిలో చేరుకుంది.
**టెక్నాలజీతో తగ్గిన దర్యాప్తు కాలపరిమితి**
దర్యాప్తు ప్రక్రియలో ఈడీ అత్యాధునిక సాంకేతిక పరిజ్ఞానాన్ని జోడించింది. ఇప్పుడు కేవలం ప్రత్యక్ష సోదాలపైనే కాకుండా, వివిధ డిజిటల్ డేటాబేస్లను నిరంతరం తనిఖీ చేస్తూ ఆర్థిక నేరగాళ్ల గుట్టు రట్టు చేస్తోంది. బ్లాక్ చైన్ అనలిటిక్స్ ద్వారా క్రిప్టో కరెన్సీ లావాదేవీలను సైతం పర్యవేక్షిస్తోంది. ఫలితంగా ఎఫ్ఐఆర్ నమోదు నుండి తుది తీర్పు వచ్చే వరకు ఉండే ‘లైఫ్ సైకిల్’ వ్యవధి 3-4 ఏళ్ల నుండి ఏకంగా ఒకటిన్నర ఏళ్లకే తగ్గిపోయింది. ఈ ఏడాది 812 ఛార్జ్షీట్లను దాఖలు చేయడం ద్వారా న్యాయ ప్రక్రియను వేగవంతం చేసింది. కొత్తగా నమోదైన ఈసీఐఆర్ కేసుల సంఖ్య కూడా 39 శాతం పెరిగి 1,080కి చేరింది.
**విదేశాల్లో తిష్ట వేసిన కేసులపై పోరాటం**
మనీ లాండరింగ్ నేరగాళ్లు విదేశాల్లో దాచుకున్న ఆస్తులు, ఆధారాల సేకరణ కోసం ఈడీ అంతర్జాతీయ స్థాయిలో తన కార్యకలాపాలను ముమ్మరం చేసింది. 2025-26లో వివిధ దేశాలకు 353 లెటర్స్ రొగేటరీ , మ్యూచువల్ లీగల్ అసిస్టెన్స్ ట్రీటీ విన్నపాలను పంపింది. ఇందులో అత్యధికంగా యూఏఈలో 69 విన్నపాలు పెండింగ్లో ఉండగా, సింగపూర్, యూకే, అమెరికా వంటి దేశాల్లోనూ మరికొన్ని దరఖాస్తులు ఉన్నాయి. అదే సమయంలో విదేశాల నుండి కూడా ఈడీకి 246 విన్నపాలు అందాయి, ఇందులో అత్యధికంగా యూకే (79) నుండి రావడం గమనార్హం. ఈ అంతర్జాతీయ సమన్వయం ద్వారా ఆర్థిక నేరగాళ్లకు ఎక్కడా చోటు లేకుండా చేసేందుకు ఈడీ తన పట్టును మరింత బిగిస్తోంది.
