హైదరాబాద్, మహా.
భారత నౌకాదళ తదుపరి చీఫ్ ఆఫ్ నావల్ స్టాఫ్ (నౌకాదళాధిపతి)గా వైస్ అడ్మిరల్ కృష్ణ స్వామినాథన్ నియమితులయ్యారు. కృష్ణ స్వామినాథన్ ప్రస్తుతం ముంబై ప్రధాన కేంద్రంగా ఉన్న పశ్చిమ నావికాదళ కమాండర్గా అత్యుత్తమ సేవలందిస్తున్నారు. ఆయన మే 31వ తేదీన నూతన త్రివిధ దళాధిపతుల్లో ఒకరిగా బాధ్యతలను స్వీకరించనున్నారు. ఈ నెలాఖరున నేవీ చీఫ్గా బాధ్యతలు చేపట్టి.. 2028 డిసెంబర్ 31 వరకు ఆయన ఆ పదవిలో కొనసాగుతారని అధికారిక వర్గాలు వెల్లడించాయి.
1987 జూలై 1వ తేదీన భారత నౌకాదళంలో అడుగుపెట్టిన ఆయనకు సుదీర్ఘ రక్షణ రంగ అనుభవం ఉంది. ముఖ్యంగా కమ్యూనికేషన్, ఎలక్ట్రానిక్ వార్ఫేర్ (ఎలక్ట్రానిక్ యుద్ధ తంత్రం) విభాగాల్లో ఆయన నిష్ణాతులు. తన కెరీర్లో ఎన్నో క్లిష్టమైన, కీలకమైన బాధ్యతలను విజయవంతంగా నిర్వర్తించి నావికాదళంలో తనకంటూ ప్రత్యేక గుర్తింపును, ఉన్నతాధికారుల ప్రశంసలను సొంతం చేసుకున్నారు.
విద్యాభ్యాసం, శిక్షణ పరంగా వైస్ అడ్మిరల్ కృష్ణ స్వామినాథన్ అద్భుతమైన నేపథ్యాన్ని కలిగి ఉన్నారు. ఆయన పుణె సమీపంలోని ప్రఖ్యాతి గాంచిన ఖడక్వాస్లా నేషనల్ డిఫెన్స్ అకాడమీ (ఎన్డీఏ) పూర్వ విద్యార్థి. అంతేకాకుండా యూకే (శ్రివెన్హామ్)లోని జాయింట్ సర్వీసెస్ కమాండ్ అండ్ స్టాఫ్ కాలేజ్, కరంజాలోని కాలేజ్ ఆఫ్ నావల్ వార్ఫేర్, అమెరికాలోని రోడ్ ఐలాండ్ న్యూపోర్ట్లో గల ప్రతిష్టాత్మక యునైటెడ్ స్టేట్స్ నావల్ వార్ కాలేజీలలో ఆయన ఉన్నతస్థాయి విద్యాభ్యాసం, శిక్షణ పొందారు. దేశవిదేశాల్లోని అత్యుత్తమ రక్షణ విద్యాసంస్థల్లో అభ్యసించిన ఆయన అపార అనుభవం, ఆధునిక వ్యూహాత్మక నైపుణ్యాలు భవిష్యత్తులో భారత నావికాదళాన్ని, సముద్ర తీర భద్రతను మరింత బలోపేతం చేసేందుకు ఎంతగానో దోహదపడతాయని రక్షణ రంగ నిపుణులు విశ్వసిస్తున్నారు.
