అస్సాం గడ్డపై ‘నారా’ హవా.
* ఈశాన్య, దక్షిణాది స్నేహబంధానికి ప్రతీకగా చంద్రబాబు పర్యటన.
* జాపి టోపీ, గమోసాతో చంద్రబాబు కొత్త లుక్.
* గౌహతిలో ప్రత్యేక ఆకర్షణగా తండ్రీకొడుకులు.
* హిమంత ప్రమాణ స్వీకార వేడుకలో ఏపీ సీఎం. అస్సాం సంప్రదాయాలతో ఘన స్వాగతం
హైదరాబాద్, మహా.
అసోం ముఖ్యమంత్రిగా హిమంత బిశ్వ శర్మ ప్రమాణ స్వీకార మహోత్సవానికి హాజరయ్యేందుకు గౌహతి చేరుకున్న ముఖ్యమంత్రి నారా చంద్రబాబు నాయుడు, మంత్రి నారా లోకేశ్లకు అపూర్వ స్వాగతం లభించింది. ఏపీ నుంచి విచ్చేసిన అగ్రనేతకు అస్సాం ప్రభుత్వం, స్థానిక నేతలు తమ రాష్ట్ర సంప్రదాయాలను ప్రతిబింబించేలా ఘన సత్కారం నిర్వహించారు. గౌహతిలో అడుగుపెట్టిన వెంటనే చంద్రబాబుకు అత్యంత ఆప్యాయంగా స్థానిక సంప్రదాయమైన ‘జాపి’ టోపీని అలంకరించి, ఆత్మీయతకు ప్రతీక అయిన ‘గమోసా’ను మెడలో వేసి సాదరంగా ఆహ్వానించారు. ఈ అస్సాం సంప్రదాయ వేషధారణలో చంద్రబాబు సరికొత్త అవతారంలో ఎంతో హుందాగా కనిపించారు. తండ్రికి తోడుగా వెళ్లిన యువనేత లోకేశ్ సైతం స్థానిక సంస్కృతి ఉట్టిపడేలా జాపి టోపీ ధరించి అందరి దృష్టిని విశేషంగా ఆకర్షించారు.
హిమంత బిశ్వ శర్మ ప్రమాణ స్వీకార వేడుకలో ఎంతో మంది జాతీయ స్థాయి అగ్రనేతలు పాల్గొన్నప్పటికీ, నారా తండ్రీకొడుకుల జోడీ స్పెషల్ అట్రాక్షన్గా నిలిచింది. ఒకవైపు అస్సాం ప్రజల ఆత్మీయత, మరోవైపు ఆంధ్రుల చురుకుదనం కలగలిసినట్లుగా సాగిన వీరి పర్యటన రాజకీయ వర్గాల్లో ఆసక్తికర చర్చకు దారితీసింది. దక్షిణాది రాజకీయ దురంధరుడిగా పేరొందిన చంద్రబాబు, ఈశాన్య రాష్ట్రాల్లో అత్యంత బలమైన నేతగా ఎదిగిన హిమంత బిశ్వ శర్మ మధ్య ఈ కలయికతో స్నేహబంధం మరింతగా బలపడిందని విశ్లేషకులు భావిస్తున్నారు. జాతీయ స్థాయిలో ఎన్డీయే పక్షాల మధ్య సమన్వయానికి ఇలాంటి పర్యటనలు ఎంతగానో దోహదపడతాయని పలువురు అభిప్రాయపడుతున్నారు.
మరోవైపు, ఈ అరుదైన కలయికకు సంబంధించిన దృశ్యాలు, ముఖ్యంగా జాపి టోపీ, గమోసాతో ఉన్న చంద్రబాబు, లోకేశ్ల స్టైలిష్ లుక్ సామాజిక మాధ్యమాల్లో విపరీతంగా వైరల్ అవుతున్నాయి. అస్సాం గడ్డపై నారా వారి సందడి చూసి అభిమానులు, కార్యకర్తలు మురిసిపోతున్నారు. అస్సాం నుంచి ఆంధ్ర వరకు నెటిజన్లు ఈ ఫోటోలను విశేషంగా పంచుకుంటూ అస్సాం గడ్డపై ‘నారా’ హవా సాగిందంటూ ప్రశంసల వర్షం కురిపిస్తున్నారు. మొత్తానికి అటు రాజకీయంగా, ఇటు సాంస్కృతికంగా చంద్రబాబు గౌహతి పర్యటన సంపూర్ణంగా విజయవంతమైందని రాజకీయ వర్గాలు విశ్లేషిస్తున్నాయి.
