• పెద్దల ప్రమేయంపై ప్రియాంక ప్రశ్నలు.
• కింది స్థాయి ఉద్యోగులతోనే సాధ్యమా?.
• ప్రియాంక, కేజ్రీవాల్ ఘాటు వ్యాఖ్యలు.
అయోధ్య, మహా.
అయోధ్య రామమందిర విరాళాల దుర్వినియోగం ఆరోపణలు దేశ రాజకీయాల్లో తీవ్ర చర్చకు దారితీశాయి. ఈ వ్యవహారంపై కాంగ్రెస్ ప్రధాన కార్యదర్శి ప్రియాంక గాంధీ, ఆమ్ ఆద్మీ పార్టీ అధినేత అరవింద్ కేజ్రీవాల్ తీవ్రస్థాయిలో స్పందించారు. సీసీటీవీ కెమెరాలను నిలిపివేసి భారీ స్థాయిలో అక్రమాలు కేవలం కింది స్థాయి ఉద్యోగుల వల్లే జరిగాయా? లేక దీని వెనుక పెద్దల ప్రమేయం ఉందా? అనే ప్రశ్నలను లేవనెత్తారు. ఇదే సమయంలో సిట్ మధ్యంతర నివేదికలో వెలుగుచూసిన అంశాలు వ్యవహారాన్ని మరింత సంచలనంగా మార్చాయి.
అయోధ్య రామాలయంలో భక్తులు సమర్పించిన విరాళాల దుర్వినియోగంపై కాంగ్రెస్ ప్రధాన కార్యదర్శి ప్రియాంక గాంధీ తీవ్ర ఆందోళన వ్యక్తం చేశారు. కేవలం కింది స్థాయి ఉద్యోగులు తమంతట తామే సీసీటీవీ కెమెరాలను నిలిపివేసి భారీ స్థాయిలో అక్రమాలకు పాల్పడటం సాధ్యమేనా అని ప్రశ్నించారు. ఈ ఘటన వెనుక ఉన్న అసలు బాధ్యులను గుర్తించి, ఎవరైనా సరే చట్టపరంగా కఠిన చర్యలు తీసుకోవాలని ఆమె డిమాండ్ చేశారు.
ఈ వ్యవహారాన్ని కప్పిపుచ్చే ప్రయత్నాలు కాకుండా పూర్తిస్థాయి పారదర్శక విచారణ జరగాలని ప్రియాంక గాంధీ కోరారు. రామమందిరం కోట్లాది మంది భక్తుల విశ్వాసానికి ప్రతీక అని, భక్తులు భక్తిశ్రద్ధలతో సమర్పించే విరాళాల దుర్వినియోగం అత్యంత బాధాకరమని పేర్కొన్నారు. సత్యం, ధర్మానికి ప్రతీకగా భావించే శ్రీరాముడి ఆలయంలో ఇటువంటి ఆరోపణలు రావడం దేశవ్యాప్తంగా ఆందోళన కలిగిస్తోందని ఆమె వ్యాఖ్యానించారు.
ఆమ్ ఆద్మీ పార్టీ జాతీయ కన్వీనర్ అరవింద్ కేజ్రీవాల్ కూడా ఈ వ్యవహారంపై స్పందించారు. కేవలం చిన్నస్థాయి ఉద్యోగులను అరెస్టు చేయడం వల్ల అసలు నిజాలు వెలుగులోకి రావని అన్నారు. ఇందులో ప్రమేయం ఉన్న పెద్దలపై కూడా విచారణ జరిపి, దోషులెవరైనా కఠిన చర్యలు తీసుకోవాలని డిమాండ్ చేశారు. కేవలం రాజీనామాలతో వ్యవహారం ముగిసిపోదని, అసలు బాధ్యులను గుర్తించడం ద్వారానే ప్రజలకు న్యాయం జరుగుతుందని వ్యాఖ్యానించారు.
ఈ కేసును దర్యాప్తు చేస్తున్న ప్రత్యేక దర్యాప్తు బృందం మధ్యంతర నివేదికలో పలు కీలక అంశాలు వెలుగులోకి వచ్చినట్లు సమాచారం. నోట్ల లెక్కింపు సమయంలో కొందరు సిబ్బంది ఉద్దేశపూర్వకంగా సీసీటీవీ కెమెరాలకు అడ్డుగా నిలబడటం, నోట్ల కట్టల నుంచి నగదు తీసి దుస్తుల్లో దాచుకోవడం, చోరీ చేసిన నగదును మరుగుదొడ్లలో దాచడం వంటి ఘటనలు రహస్య కెమెరాల్లో నమోదైనట్లు దర్యాప్తులో వెల్లడైంది.
రామాలయంలోని హుండీల్లో భక్తులు సమర్పించిన విరాళాలను బ్యాంకుల్లో జమ చేసే సమయంలో నోట్ల కట్టల్లో నగదు తక్కువగా ఉండటాన్ని అధికారులు గుర్తించారు. ముఖ్యంగా ఐదు వందల రూపాయల నోట్ల కట్టల్లో పదేపదే నగదు కొరత కనిపించడంతో అనుమానాలు మొదలయ్యాయి. అనంతరం సిబ్బందికి తెలియకుండా రహస్య కెమెరాలు ఏర్పాటు చేయగా, అక్రమాల దృశ్యాలు నమోదైనట్లు సిట్ దర్యాప్తులో తేలింది.
