సరిహద్దుపై ఉక్కుపాదం…..

సరిహద్దుపై ఉక్కుపాదం.
* 45 రోజుల్లో బీఎస్ఎఫ్‌కు భూముల బదిలీ.
* అమిత్ షా హామీకి సువేందు సర్కార్ యాక్షన్ ప్లాన్.
*టీఎంసీ కోటలో ‘కాషాయ’ పాలనా ప్రక్షాళన.
*బంగ్లా బోర్డర్ టార్గెట్‌గా ‘సువేందు’ సర్కార్ తొలి అస్త్రం.
* వలసల నివారణే ఎన్డీయే ప్రభుత్వ ప్రథమ లక్ష్యం.
హైదరాబాద్, మహా.

పశ్చిమ బెంగాల్ రాజకీయాల్లో దశాబ్దాల పాటు సాగిన తృణమూల్ కాంగ్రెస్ (టీఎంసీ) ఆధిపత్యానికి చెక్ పెట్టి, ఎన్డీయే ప్రభుత్వం అధికారంలోకి రావడం భారత రాజకీయాల్లో ఒక చారిత్రక ఘట్టం. ముఖ్యమంత్రిగా బాధ్యతలు చేపట్టిన సువేందు అధికారి, తన తొలి క్యాబినెట్ సమావేశంలోనే తమ ప్రభుత్వ ప్రాధాన్యతలు ఏమిటో అత్యంత స్పష్టంగా తేల్చిచెప్పారు. గత ప్రభుత్వం దశాబ్దాలుగా అవలంబించిన విధానాలను పక్కనపెట్టి, కేంద్రంతో పూర్తి స్థాయిలో సమన్వయం చేసుకునే దిశగా అడుగులు వేశారు. ఒకవైపు జాతీయ భద్రత, మరోవైపు ప్రజా సంక్షేమం అనే రెండు బలమైన పునాదుల మీద పాలన సాగించాలన్న ఎన్డీయే విధానం ఈ తొలి సమావేశ నిర్ణయాల్లో స్పష్టంగా ప్రతిఫలించింది. సరిహద్దు కంచె నిర్మాణానికి భూముల బదిలీ దగ్గరి నుండి, ఆయుష్మాన్ భారత్ అమలు, నూతన క్రిమినల్ చట్టాల ఆమోదం వరకు.. సువేందు సర్కార్ తీసుకున్న నిర్ణయాలపై ఒక లోతైన రాజకీయ, పాలనాపరమైన విశ్లేషణ.

**సరిహద్దు కంచెకు లైన్ క్లియర్**

సువేందు అధికారి కేబినెట్ తీసుకున్న అత్యంత కీలకమైన నిర్ణయం.. భారత్-బంగ్లాదేశ్ సరిహద్దు కంచె నిర్మాణానికి అవసరమైన భూములను బీఎస్ఎఫ్ కు అప్పగించడం. దశాబ్దాలుగా బెంగాల్ రాజకీయాలను తీవ్రంగా ప్రభావితం చేస్తున్న అక్రమ వలసల సమస్యకు చెక్ పెట్టాలన్నది బీజేపీ దీర్ఘకాలిక లక్ష్యం. గత టీఎంసీ ప్రభుత్వం స్థానిక ప్రజల జీవనోపాధి, భూసమస్యల సాకుతో ఈ ప్రక్రియను ఉద్దేశపూర్వకంగా అడ్డుకుందన్న ఆరోపణలు ఉన్నాయి. అయితే, ఎన్డీయే ప్రభుత్వం అధికారం చేపట్టిన వెంటనే, ఏమాత్రం జాప్యం చేయకుండా జాతీయ భద్రతకు పెద్దపీట వేస్తూ తీసుకున్న ఈ నిర్ణయం, బెంగాల్ పాలనలో వచ్చిన ఒక పెను మార్పుకు స్పష్టమైన సంకేతం.

**45 రోజుల డెడ్‌లైన్‌తో పక్కా కార్యాచరణ**

ఎన్నికల ప్రచారంలో భాగంగా కేంద్ర హోంమంత్రి అమిత్ షా ఇచ్చిన అత్యంత కీలకమైన హామీ.. “అధికారంలోకి వచ్చిన 45 రోజుల్లో పెండింగ్ భూములను బీఎస్ఎఫ్ కు బదిలీ చేస్తాం” అని చెప్పడం. చెప్పిన మాటను నిలబెట్టుకుంటూ, తొలి కేబినెట్‌లోనే ఆ 45 రోజుల డెడ్‌లైన్‌ను అధికారికంగా ప్రకటించడం ద్వారా సువేందు సర్కార్ తమ చిత్తశుద్ధిని చాటుకుంది. ఇది కేవలం పాలనాపరమైన నిర్ణయమే కాదు, ప్రజలకు ఇచ్చిన మాటపై నిలబడే ప్రభుత్వమన్న నమ్మకాన్ని క్షేత్రస్థాయిలో కలిగించే అద్భుతమైన రాజకీయ వ్యూహం.

**850 కిలోమీటర్ల సవాళ్లకు చెక్**

గణాంకాలను బట్టి చూస్తే, భారత్-బంగ్లాదేశ్ మధ్య ఉన్న 4,097 కిలోమీటర్ల సరిహద్దులో దాదాపు 3,240 కిలోమీటర్ల మేర కంచె పూర్తయ్యింది. మిగిలిపోయిన 850 కిలోమీటర్లు (అందులో 175 కి.మీ క్లిష్టమైన భౌగోళిక ప్రాంతం) అత్యంత సున్నితమైనవి. సరిగ్గా ఈ ప్రాంతాల నుండే చొరబాట్లు, అక్రమ రవాణా ఎక్కువగా జరుగుతుంటాయని భద్రతా బలగాలు తరచూ ఆందోళన వ్యక్తం చేస్తుంటాయి. ఇప్పుడు ఈ మిగిలిన కంచె నిర్మాణానికి మార్గం సుగమం చేయడం ద్వారా, అంతర్జాతీయ సరిహద్దుల వద్ద స్మగ్లింగ్, చొరబాట్లను సమూలంగా అరికట్టేందుకు కేంద్ర, రాష్ట్ర ప్రభుత్వాలు ఒకే తాటిపైకి వచ్చాయని చెప్పవచ్చు.

**ఆయుష్మాన్ భారత్’ ఆమలుకు పచ్చజెండా**

గత ప్రభుత్వ హయాంలో కేంద్రం ప్రవేశపెట్టే పథకాలను బెంగాల్‌లో అమలు చేయకపోవడం ఒక పెద్ద వివాదంగా ఉండేది. ముఖ్యంగా ప్రపంచంలోనే అతిపెద్ద ఆరోగ్య బీమా పథకమైన ‘ఆయుష్మాన్ భారత్’ అమలుకు టీఎంసీ ప్రభుత్వం అడ్డుకట్ట వేసింది. కానీ, ఇప్పుడు సువేందు ప్రభుత్వం జూన్ 1 నుంచి ఈ పథకాన్ని రాష్ట్రంలో అమలు చేయాలని నిర్ణయించడం ద్వారా.. పేద ప్రజలకు ఉచిత వైద్య సదుపాయాన్ని అందుబాటులోకి తెస్తోంది. కేంద్ర-రాష్ట్రాల మధ్య నిరంతరం సాగే ఘర్షణ వాతావరణానికి ముగింపు పలికి, డబుల్ ఇంజిన్ సర్కార్ ప్రయోజనాలను ప్రజలకు నేరుగా చేరవేసే మాస్టర్ స్ట్రోక్ ఇది.

**ఉచిత బస్సు ప్రయాణ సదుపాయం**

బెంగాల్ ఎన్నికల్లో మహిళా ఓటర్లు ఎప్పుడూ నిర్ణయాత్మక పాత్ర పోషిస్తారు. గతంలో టీఎంసీకి ఈ వర్గం అండగా నిలిచింది. ఆ ఓటు బ్యాంకును శాశ్వతంగా తమవైపు నిలుపుకోవాలన్న ఉద్దేశ్యంతో, ఎన్డీయే సర్కార్ జూన్ 1 నుంచి మహిళలకు ఉచిత బస్సు ప్రయాణ సదుపాయాన్ని ప్రకటించింది. కర్ణాటక, తెలంగాణ రాష్ట్రాల్లో ఈ హామీ ఎంతటి రాజకీయ ప్రయోజనాన్ని చేకూర్చిందో గమనించిన ఎన్డీయే, అదే సంక్షేమ అస్త్రాన్ని బెంగాల్‌లో ప్రయోగించి మహిళా సాధికారతకు తాము పెద్దపీట వేస్తున్నామని నిరూపించుకునే ప్రయత్నం చేసింది.

**నూతన న్యాయ వ్యవస్థకు నాంది**

భారత శిక్షాస్మృతి స్థానంలో కేంద్ర ప్రభుత్వం అత్యంత ప్రతిష్టాత్మకంగా తీసుకొచ్చిన నూతన క్రిమినల్ చట్టాలు.. భారతీయ న్యాయ సంహిత , భారతీయ నాగరిక్ సురక్షా సంహిత లను బెంగాల్‌లో కూడా అమల్లోకి తీసుకురావాలని నిర్ణయించడం మరో కీలక పరిణామం. గత ప్రభుత్వం కేంద్ర చట్టాలను వ్యతిరేకించే ధోరణిని అవలంబించగా, సువేందు కేబినెట్ మాత్రం దేశవ్యాప్తంగా వస్తున్న మార్పులకు అనుగుణంగా తమ రాష్ట్ర న్యాయ వ్యవస్థను కూడా ఆధునీకరిస్తోంది. దీని ద్వారా నేరాల నియంత్రణ, సత్వర న్యాయం అందించే దిశగా రాష్ట్ర ప్రభుత్వం అడుగులు వేస్తోంది.

**జనగణన సర్క్యులర్ అమలు**

కేంద్ర హోం వ్యవహారాల మంత్రిత్వ శాఖ జారీ చేసిన జూన్ 2025 జనగణన సర్క్యులర్‌ను తక్షణమే అమలు చేసేలా మంత్రివర్గం తీసుకున్న నిర్ణయం.. భవిష్యత్ పాలనా ప్రణాళికలకు అత్యంత కీలకం. సరైన జనాభా, సామాజిక గణాంకాలు ఉంటేనే సంక్షేమ పథకాలు అర్హులకు అందుతాయి. గతంలో జనగణన, ఎన్ఆర్సీ లాంటి అంశాలపై బెంగాల్‌లో తీవ్ర ఉద్రిక్తతలు చోటుచేసుకున్న నేపథ్యంలో.. ఎటువంటి వివాదాలకు తావులేకుండా జనగణన ప్రక్రియకు సహకరిస్తామని రాష్ట్ర ప్రభుత్వం ప్రకటించడం పాలనాపరమైన పారదర్శకతను సూచిస్తుంది.

**సీఎస్‌గా మనోజ్ అగర్వాల్ ఎంపిక**

ప్రభుత్వం మారినప్పుడు, తమ విధానాలను పక్కాగా అమలు చేసే అధికారులను నియమించుకోవడం ఆనవాయితీ. ఇందులో భాగంగానే పశ్చిమ బెంగాల్ నూతన ప్రభుత్వ ప్రధాన కార్యదర్శి గా మనోజ్ అగర్వాల్‌ను నియమించారు. ఎన్డీయే ప్రభుత్వ లక్ష్యాలను, ముఖ్యంగా సరిహద్దు సమస్యలు, కేంద్ర పథకాల అమలు, లా అండ్ ఆర్డర్ నిర్వహణ వంటి క్లిష్టమైన బాధ్యతలను సమర్థవంతంగా సమన్వయం చేయగల అనుభవం ఉన్న అధికారికి పాలనా పగ్గాలు అప్పగించడం ద్వారా.. సువేందు సర్కార్ తమ భవిష్యత్ పాలనపై ఒక స్పష్టమైన విజన్‌తో ముందుకు వెళ్తోందని అర్థమవుతోంది.