కేంద్రంపై ‘ఇండియా’ కదనభేరి..

కేంద్రంపై ‘ఇండియా’ కదనభేరి.
* నీట్ లీకేజీపై భగ్గుమన్న విపక్షాలు.
* తక్షణమే విద్యాశాఖ మంత్రి రాజీనామాకు పట్టు.
* ఓటర్ల జాబితా అవకతవకలపై సీజేఐకి లేఖ.
* ఆగస్టులో హైదరాబాద్ వేదికగా తదుపరి భేటీ.
* కూటమిలో లుకలుకలు..
* భేటీకి ఆప్, డీఎంకే గైర్హాజరు.
* విజయ్ ‘టీవీకే’ పార్టీకి దక్కని ఆహ్వానం.

ఢిల్లీ,మహా.

జాతీయ స్థాయిలో కేంద్ర ప్రభుత్వ విధానాలపై రాజీలేని పోరాటం చేసేందుకు విపక్షాల ఐక్య వేదిక ‘ఇండియా కూటమి’ కదనభేరి మోగించింది. సోమవారం ఢిల్లీలో 23 ప్రతిపక్ష పార్టీల ప్రతినిధులతో జరిగిన ఉన్నతస్థాయి సమావేశంలో ఎన్డీఏ సర్కారుపై ముకుమ్మడి దాడికి వ్యూహరచన చేశారు. ముఖ్యంగా దేశ వ్యాప్తంగా సంచలనం సృష్టించిన నీట్ యూజీ ప్రశ్నపత్రాల లీకేజీ, సీబీఎస్ఈ వివాదాలపై విపక్ష నేతలు తీవ్ర స్థాయిలో మండిపడ్డారు. ఈ వ్యవహారంలో లక్షలాది మంది విద్యార్థుల జీవితాలతో చెలగాటమాడిన కేంద్ర విద్యాశాఖ మంత్రి నైతిక బాధ్యత వహిస్తూ తక్షణమే తన పదవికి రాజీనామా చేయాలని కూటమి పక్షాలు ఏకగ్రీవంగా డిమాండ్ చేశాయి. రాబోయే వర్షాకాల పార్లమెంటు సమావేశాల్లో ఇండియా కూటమి పక్షాలన్నీ ఐక్యంగా వ్యవహరించి, ప్రజా సమస్యలపై ప్రభుత్వాన్ని ముక్తకంఠంతో నిలదీయాలని ఈ భేటీలో నిర్ణయించారు.
**కీలక తీర్మానాలు.. తదుపరి భేటీ హైదరాబాద్‌లోనే**
ఈ సమావేశంలో ప్రధానంగా పలు కీలక నిర్ణయాలు తీసుకున్నారు. ఎన్నికల సంఘం చేపట్టిన ఓటర్ల జాబితా ప్రత్యేక సవరణ (ఎస్ఐఆర్) ప్రక్రియలో జరిగిన అవకతవకలు, ఓట్ల గల్లంతుపై సుప్రీంకోర్టు ప్రధాన న్యాయమూర్తికి నేరుగా లేఖ రాయాలని తీర్మానించారు. అలాగే, దేశంలో నానాటికీ దిగజారుతున్న ఆర్థిక పరిస్థితి, పెరిగిపోతున్న నిరుద్యోగం, తదితర జాతీయ సమస్యలపై తక్షణమే అఖిలపక్ష సమావేశాన్ని ఏర్పాటు చేయాలని కేంద్ర ప్రభుత్వాన్ని డిమాండ్ చేశారు. భవిష్యత్తు కార్యాచరణను ఎప్పటికప్పుడు సమీక్షించుకునేందుకు వీలుగా ఇకపై ప్రతి రెండు నెలలకోసారి కూటమి పక్షాలు సమావేశం కావాలని నిర్ణయించారు. ఇందులో భాగంగానే ఇండియా కూటమి తదుపరి భేటీని ఆగస్టు నెలలో హైదరాబాద్ వేదికగా నిర్వహించనున్నట్లు నేతలు అధికారికంగా ప్రకటించారు.
**ఐక్యత చాటిన మమత, సోనియా.. కానీ వీడని నీలినీడలు!**
సమావేశం ఆసాంతం జాతీయ సమస్యలపై చర్చ సాగినప్పటికీ, పశ్చిమ బెంగాల్ మాజీ ముఖ్యమంత్రి, తృణమూల్ కాంగ్రెస్ అధినేత్రి మమతా బెనర్జీ, కాంగ్రెస్ అగ్రనాయకురాలు సోనియా గాంధీని ఆత్మీయంగా ఆలింగనం చేసుకున్న దృశ్యాలు ప్రత్యేక ఆకర్షణగా నిలిచాయి. ఇరు పార్టీల నేతలు ఈ చిత్రాలను సోషల్ మీడియాలో విస్తృతంగా పంచుకున్నారు. గత కొంతకాలంగా కూటమికి దూరంగా ఉంటూ వస్తున్న మమతా బెనర్జీ.. బెంగాల్ ఎన్నికల్లో టీఎంసీ ఓటమి పాలైన అనంతరం జాతీయ స్థాయిలో ప్రతిపక్షాల ఐక్యతకు అత్యంత ప్రాధాన్యత ఇస్తున్నట్లు తాజా పరిణామాలను బట్టి విశ్లేషకులు భావిస్తున్నారు. అయితే, ఒకవైపు ఈ ఐక్యతా రాగాలు వినిపిస్తున్నప్పటికీ.. కూటమిలోని అంతర్గత విభేదాలు, లుకలుకలు మరోవైపు బహిర్గతమయ్యాయి. ఈ కీలక సమావేశానికి ఆమ్ ఆద్మీ పార్టీ (ఆప్), తమిళనాడు అధికార పార్టీ డీఎంకే దూరంగా ఉండటం తీవ్ర చర్చనీయాంశంగా మారింది. కాంగ్రెస్ తో ఉన్న స్థానిక విభేదాల నేపథ్యంలో తాము కూటమిలో భాగం కాదని ఆప్ నేతలు గతంలోనే స్పష్టం చేయగా, డీఎంకే గైర్హాజరు వెనుక మాత్రం తమిళనాట మారిన రాజకీయ సమీకరణాలే ప్రధాన కారణంగా కనిపిస్తోంది.
**తమిళ రాజకీయం.. కాంగ్రెస్ తీరుపై డీఎంకే కన్నెర్ర**
ఇండియా కూటమి ఆవిర్భావం నుంచి కాంగ్రెస్‌కు అత్యంత నమ్మకమైన మిత్రపక్షంగా, కూటమికి వెన్నెముకగా నిలిచిన డీఎంకే.. తాజా భేటీని బహిష్కరించడం జాతీయ రాజకీయాల్లో కలకలం రేపుతోంది. ముఖ్యంగా కూటమిలోని అన్ని పక్షాలను ఏకతాటిపైకి తీసుకురావడంలో కీలక పాత్ర పోషించిన తమిళనాడు మాజీ సీఎం స్టాలిన్.. ఇప్పుడు కాంగ్రెస్ తీరుపై తీవ్ర అసంతృప్తితో ఉన్నారు. ఇటీవల జరిగిన తమిళనాడు అసెంబ్లీ ఎన్నికల్లో 108 స్థానాలు సాధించి అతిపెద్ద పార్టీగా అవతరించిన దళపతి విజయ్ నేతృత్వంలోని టీవీకే (తమిళగ వెట్రి కళగం) పార్టీకి కాంగ్రెస్ బేషరతు మద్దతు ప్రకటించడమే ఈ వివాదానికి మూలకారణం. ఐదు సీట్లు మాత్రమే గెలుచుకున్న కాంగ్రెస్.. 118 మ్యాజిక్ ఫిగర్ చేరుకునేందుకు విజయ్‌కు మద్దతు తెలపడం ద్వారా దశాబ్దాలుగా ఉన్న డీఎంకే బంధానికి స్వస్తి పలికింది. ఈ చర్యను అత్యంత దారుణమైన ‘రాజకీయ ద్రోహం’గా అభివర్ణించిన డీఎంకే నాయకత్వం.. నిరసనగా ఇండియా కూటమి సమావేశాన్ని బహిష్కరిస్తున్నట్లు సంచలన ప్రకటన చేసింది.
**విజయ్ ‘టీవీకే’ కు ఆహ్వానం ఎందుకు దక్కలేదు?**
ఒకవైపు డీఎంకే సమావేశానికి గైర్హాజరు కాగా, తమిళనాడులో ప్రభుత్వ ఏర్పాటుకు సిద్ధమవుతున్న టీవీకే పార్టీకి ఇండియా కూటమి నుంచి ఎలాంటి ఆహ్వానం అందకపోవడం రాజకీయ వర్గాల్లో ఆసక్తిని రేకెత్తిస్తోంది. దీని వెనుక ప్రధానంగా మూడు బలమైన కారణాలు ఉన్నట్లు తెలుస్తోంది. మొదటిది.. ఈ రోజు సమావేశంలో పాల్గొన్న పార్టీలన్నింటికీ పార్లమెంటులో ప్రాతినిధ్యం ఉంది. ప్రస్తుతానికి టీవీకేకు ఒక్క ఎంపీ స్థానం కూడా లేకపోవడం సాంకేతికంగా ఓ అడ్డంకిగా మారింది. రెండవది.. టీవీకే అధినేత, కాబోయే ముఖ్యమంత్రి విజయ్ తన పార్టీని పూర్తిగా స్వతంత్ర రాజకీయ శక్తిగా నిలబెట్టాలనే కృతనిశ్చయంతో ఉన్నారు. రాష్ట్రంలో కాంగ్రెస్ మద్దతు తీసుకుంటున్నప్పటికీ, జాతీయ స్థాయిలో ఏ కూటమితోనూ జతకట్టి తన బ్రాండ్ ఇమేజ్‌ను పరిమితం చేసుకోవాలని ఆయన భావించడం లేదు. ఇక మూడవ, అత్యంత కీలకమైన కారణం.. జాతీయ రాజకీయాలు. ఒకవేళ కూటమి సమావేశానికి టీవీకేను అధికారికంగా ఆహ్వానిస్తే, అది జాతీయ స్థాయిలో కాంగ్రెస్-డీఎంకేల మధ్య ఉన్న కొద్దిపాటి సంబంధాలను కూడా శాశ్వతంగా తెంచేసినట్లు అవుతుంది. డీఎంకే మరింతగా విరుచుకుపడి, కూటమికి పూర్తిగా దూరమయ్యే ప్రమాదం ఉన్నందునే కాంగ్రెస్ అధిష్ఠానం వ్యూహాత్మకంగా టీవీకేకు ఆహ్వానం పంపలేదని ఢిల్లీ వర్గాల్లో విస్తృతంగా చర్చ జరుగుతోంది.