రిటైర్మెంట్ రోజే ఐఏఎస్‌కు సీబీఐ షాక్…

రిటైర్మెంట్ రోజే ఐఏఎస్‌కు సీబీఐ షాక్.
* రూ.169 కోట్ల స్కామ్‌లో అరెస్ట్.
* పదవీ విరమణ వేళ కటకటాల వెనక్కి.
* నిధుల మళ్లింపు కేసులో ప్రదీప్ కుమార్.
* హర్యానాలో కుదిపేస్తున్న భారీ కుంభకోణం.. వలపన్ని పట్టుకున్న దర్యాప్తు సంస్థ.
చండీగఢ్ ,మహా.
ఇంకొన్ని గంటలు గడిస్తే ఆ ఉన్నతాధికారి సుదీర్ఘ సర్వీస్ ముగుస్తుంది. సహోద్యోగుల మధ్య సగర్వంగా, ఎంతో ఘనంగా ఆయన పదవీ విరమణ వేడుక జరగాల్సి ఉంది. కానీ, అనూహ్యంగా సీబీఐ అధికారులు ఎంట్రీ ఇచ్చి ఆ ఐఏఎస్ అధికారికి ఊహించని షాక్ ఇచ్చారు. ఏకంగా రిటైర్మెంట్ రోజే ఆయన్ను అరెస్టు చేసి కటకటాల వెనక్కి నెట్టారు. హర్యానా రాష్ట్రంలో కలకలం రేపుతున్న రూ.169 కోట్ల ప్రభుత్వ నిధుల మళ్లింపు కుంభకోణం కేసులో సీబీఐ ఈ కీలక చర్యలు చేపట్టింది. విచారణకు ఏమాత్రం సహకరించకపోవడం, పదేపదే నోటీసులు పంపినా స్పందించకపోవడంతో ఐఏఎస్ అధికారి ప్రదీప్ కుమార్‌ను ఆయన పదవీ విరమణ రోజే అరెస్టు చేసినట్లు కేంద్ర దర్యాప్తు సంస్థ (సీబీఐ) అధికారికంగా స్పష్టం చేసింది.
ఈ భారీ కుంభకోణానికి సంబంధించిన వివరాలను దర్యాప్తు అధికారులు వెల్లడించారు. ప్రదీప్ కుమార్ గతంలో హర్యానా రాష్ట్ర కాలుష్య నియంత్రణ మండలి (పీసీబీ) సెక్రటరీగా విధులు నిర్వర్తించిన సమయంలో ఈ బాగోతం చోటుచేసుకుంది. ప్రభుత్వానికి చెందిన ఏకంగా రూ.169 కోట్ల నిధులను ఫిక్స్‌డ్ డిపాజిట్లు (ఎఫ్‌డీ) చేస్తున్నామని నమ్మించిన ఆయన, చండీగఢ్‌లోని ఐడీఎఫ్‌సీ ఫస్ట్ బ్యాంక్ శాఖకు ఆ నిధులను బదిలీ చేయడానికి అక్రమంగా అనుమతులు మంజూరు చేశారు. అయితే, దర్యాప్తు చేపట్టిన సీబీఐ అధికారుల విచారణలో ఆ నిధులతో బ్యాంకులో ఎలాంటి ఫిక్స్‌డ్ డిపాజిట్లు చేయలేదని తేలిపోయింది. పైగా, హర్యానా కాలుష్య నియంత్రణ మండలి శాఖ నుంచి ఎలాంటి ముందస్తు అనుమతులు తీసుకోకుండానే నిబంధనలకు విరుద్ధంగా ఒక కొత్త బ్యాంక్ ఖాతాను తెరిచినట్లు సీబీఐ గుర్తించింది. అనంతరం ఆ అక్రమ ఖాతా ద్వారా డెబిట్ లావాదేవీలు జరిపి రూ.169 కోట్ల ప్రజాధనాన్ని దారి మళ్లించినట్లు దర్యాప్తు సంస్థ ఆధారాలతో సహా ఆరోపిస్తోంది. హర్యానా రాష్ట్ర ప్రభుత్వ విభాగాలు ఎదుర్కొన్న అతిపెద్ద బ్యాంకింగ్ కుంభకోణాల్లో ఇది ఒకటని సీబీఐ వర్గాలు చెబుతున్నాయి.
ఈ కేసు విచారణలో భాగంగా ప్రదీప్ కుమార్‌కు సీబీఐ పలుమార్లు నోటీసులు జారీ చేసినప్పటికీ ఆయన ఏమాత్రం సహకరించలేదని, అందుకే కఠిన చర్యలు తీసుకుని అరెస్టు చేసినట్లు అధికారులు వెల్లడించారు. అయితే, తనను ఏ క్షణంలోనైనా దర్యాప్తు సంస్థ అరెస్టు చేస్తుందన్న సమాచారాన్ని ముందుగానే పసిగట్టిన ప్రదీప్ కుమార్.. ముందస్తు బెయిల్ కోసం పంచ్‌కులా కోర్టులో పిటిషన్ దాఖలు చేయడం గమనార్హం. ఆ బెయిల్ పిటిషన్‌పై జూలై 2వ తేదీన విచారణ జరగాల్సి ఉండగా, న్యాయస్థానం నిర్ణయం వెలువడక ముందే వ్యూహాత్మకంగా వ్యవహరించిన సీబీఐ అధికారులు ఆయన రిటైర్మెంట్ రోజే అదుపులోకి తీసుకున్నారు.
వాస్తవానికి ఈ కుంభకోణం కేవలం రూ.169 కోట్ల మోసానికే పరిమితం కాలేదని సీబీఐ స్పష్టం చేస్తోంది. హర్యానా రాష్ట్రవ్యాప్తంగా వివిధ ఎనిమిది ప్రభుత్వ శాఖలకు సంబంధించి మొత్తం రూ.504 కోట్ల మేర జరిగిన అతిపెద్ద బ్యాంకింగ్ మోసాల వలయంలో ఇదొక భాగం మాత్రమేనని దర్యాప్తు సంస్థ తేల్చిచెప్పింది. ఈ భారీ స్కామ్‌పై లోతైన విచారణ జరుపుతున్న సీబీఐ ఇప్పటి వరకు ఏకంగా 17 మంది నిందితులపై న్యాయస్థానంలో చార్జ్‌షీట్ దాఖలు చేసింది. తాజాగా ఐఏఎస్ అధికారి ప్రదీప్ కుమార్ అరెస్టుకు ముందు కూడా ఈ కేసుతో ప్రమేయం ఉన్న మరో ఇద్దరు సీనియర్ ప్రభుత్వ అధికారులను సీబీఐ అధికారులు అరెస్టు చేసి విచారిస్తున్నారు. అధికారుల అక్రమాలపై దర్యాప్తు సంస్థలు తీసుకుంటున్న ఈ కఠిన చర్యలు దేశవ్యాప్తంగా అధికార వర్గాల్లో తీవ్ర చర్చనీయాంశంగా మారాయి.