ఆర్మీ చీఫ్ ఆసిమ్ మునీర్కు ఫజ్లుర్ రెహ్మాన్ సవాల్.
• యూనిఫాం విప్పి రాజకీయాల్లోకి రండి.
• ఎన్నికల్లో ప్రజల తీర్పు ఎదుర్కోండని ఘాటు వ్యాఖ్యలు.
ఢిల్లీ, మహా.
పాకిస్థాన్ రాజకీయాల్లో సైన్యం పాత్రపై మరోసారి తీవ్ర చర్చ మొదలైంది. దేశ రాజకీయ వ్యవహారాల్లో ఆర్మీ చీఫ్ జనరల్ ఆసిమ్ మునీర్ జోక్యం పెరుగుతోందంటూ ప్రముఖ రాజకీయ నాయకుడు, పార్లమెంట్ సభ్యుడు మౌలానా ఫజ్లుర్ రెహ్మాన్ తీవ్ర విమర్శలు గుప్పించారు. రాజకీయాలు చేయాలనే ఆసక్తి ఉంటే సైనిక పదవికి రాజీనామా చేసి ప్రజల మధ్యకు వచ్చి ఎన్నికల్లో పోటీ చేయాలని ఆసిమ్ మునీర్కు బహిరంగ సవాల్ విసిరారు. దేశాన్ని పాలించేది ప్రజలు ఎన్నుకున్న నాయకులేనని, ఆ బాధ్యత సైన్యానికి కాదని స్పష్టం చేశారు.
ఓ సభలో ప్రసంగించిన ఫజ్లుర్ రెహ్మాన్ మాట్లాడుతూ, రాజకీయ నిర్ణయాల్లో సైన్యం ప్రభావం రోజురోజుకూ పెరుగుతోందని ఆందోళన వ్యక్తం చేశారు. ప్రజల మద్దతు ఉందని భావిస్తే యూనిఫాం విప్పి రాజకీయాల్లోకి వచ్చి ఎన్నికల్లో పోటీ చేయాలని, అప్పుడు ప్రజలు ఎన్ని ఓట్లు ఇస్తారో తెలుస్తుందని వ్యాఖ్యానించారు. ప్రజాస్వామ్య వ్యవస్థలో అధికారం ప్రజల తీర్పు ద్వారానే రావాలని, సైనిక వ్యవస్థ రాజకీయాలకు దూరంగా ఉండాలన్నారు.
ఇటీవల జనాభా నియంత్రణకు సంబంధించిన బాధ్యతలను కూడా ఆర్మీ చీఫ్కు అప్పగించిన నేపథ్యంలో ఆయన ఈ వ్యాఖ్యలు చేశారు. పరిపాలనా, ప్రజా సంక్షేమ అంశాలను ప్రజలు ఎన్నుకున్న ప్రభుత్వమే నిర్వహించాలని, అలాంటి బాధ్యతలను సైన్యానికి అప్పగించడం ప్రజాస్వామ్య స్ఫూర్తికి విరుద్ధమని అభిప్రాయపడ్డారు. పాకిస్థాన్లో ప్రభుత్వ వ్యవస్థల పాత్ర, అధికారాల విభజనపై దేశవ్యాప్తంగా చర్చ జరగాల్సిన అవసరం ఉందని పేర్కొన్నారు.
ఉగ్రవాదాన్ని ఎదుర్కొనేందుకు సాధారణ పౌరులు కూడా ఆయుధాలు చేపట్టాలనే సూచనలపై ఫజ్లుర్ రెహ్మాన్ తీవ్ర అభ్యంతరం వ్యక్తం చేశారు. దేశ భద్రతను కాపాడే బాధ్యత పూర్తిగా ప్రభుత్వం, సాయుధ దళాలదేనని, అందుకోసమే వారు విధులు నిర్వహిస్తూ వేతనాలు పొందుతున్నారని గుర్తు చేశారు. సామాన్య ప్రజల చేతుల్లో ఆయుధాలు పెడితే వ్యక్తిగత కక్షలు, ప్రతీకారాలు పెరిగి దీర్ఘకాలంలో సమాజానికి తీవ్ర నష్టం వాటిల్లే ప్రమాదం ఉందని హెచ్చరించారు.
ఇటీవలి కాలంలో పాకిస్థాన్లో ఆర్మీ ప్రభావం రాజకీయ, పరిపాలనా వ్యవస్థలపై మరింత పెరిగిందనే విమర్శలు తరచూ వినిపిస్తున్నాయి. ఈ నేపథ్యంలో ఫజ్లుర్ రెహ్మాన్ చేసిన వ్యాఖ్యలు అక్కడి రాజకీయ వర్గాల్లో తీవ్ర చర్చకు దారితీశాయి. ప్రజాస్వామ్య వ్యవస్థలో ఎన్నికైన ప్రభుత్వమే పూర్తి స్థాయిలో పాలన నిర్వహించాలని, సైన్యం రాజ్యాంగబద్ధ బాధ్యతలకే పరిమితం కావాలని ఆయన చేసిన వ్యాఖ్యలు పాకిస్థాన్ రాజకీయాల్లో కొత్త చర్చకు తెరలేపాయి.
