ప్రియాంక గాంధీ కార్యాలయం పేరుతో సైబర్ మోసం
* మంత్రి పదవుల పేరుతో కోట్ల రూపాయలు డిమాండ్.. కేరళలో కేసు నమోదు.
ఢిల్లీ, మహా.
కాంగ్రెస్ ఎంపీ ప్రియాంక గాంధీ వాద్రా కార్యాలయం పేరును దుర్వినియోగం చేస్తూ కేరళకు చెందిన కాంగ్రెస్ ప్రజాప్రతినిధులను లక్ష్యంగా చేసుకుని సైబర్ మోసానికి యత్నించిన ఘటన కలకలం రేపింది. ప్రియాంక గాంధీ కార్యాలయం నుంచి మాట్లాడుతున్నామని నమ్మబలికి, రాష్ట్ర మంత్రివర్గంలో పదవులు ఇప్పిస్తామని చెప్పి కోట్ల రూపాయలు డిమాండ్ చేసినట్లు ఆరోపణలు వెలుగులోకి వచ్చాయి. ఈ ఘటనపై ప్రియాంక గాంధీ వ్యక్తిగత కార్యదర్శి ఫిర్యాదు చేయడంతో పోలీసులు సైబర్ నేరం కింద కేసు నమోదు చేసి దర్యాప్తు ప్రారంభించారు.
ప్రాథమిక సమాచారం ప్రకారం జులై 6న ఎలత్తూర్ ఎమ్మెల్యే విద్యా బాలకృష్ణన్కు వాట్సాప్ ద్వారా ఒక కాల్ వచ్చింది. ఢిల్లీలోని ప్రియాంక గాంధీ కార్యాలయం నుంచి ‘రాజ్కుమార్’ మాట్లాడుతున్నానని పరిచయం చేసుకున్న వ్యక్తి, కేరళలో త్వరలో మంత్రివర్గ పునర్వ్యవస్థీకరణ జరగనుందని చెప్పి మంత్రి పదవి ఇప్పిస్తామని హామీ ఇచ్చినట్లు సమాచారం. ఇందుకోసం రూ.3 కోట్లు చెల్లించాలని డిమాండ్ చేసినట్లు ఎమ్మెల్యే పోలీసులకు ఫిర్యాదు చేశారు.
దర్యాప్తులో ఇదే నంబర్ నుంచి వడకర ఎంపీ షఫీ పరంబిల్, ఇడుక్కి ఎంపీ డీన్ కురియాకోస్లకు కూడా ఇలాంటి కాల్స్ వెళ్లినట్లు పోలీసులు గుర్తించారు. దీంతో ఇది ఒకే వ్యక్తి లేదా ముఠా పథకం ప్రకారం నిర్వహించిన మోసయత్నంగా భావించి విచారణను విస్తరించారు. ప్రజాప్రతినిధులను లక్ష్యంగా చేసుకుని ఉన్నతస్థాయి రాజకీయ పరిచయాలను అడ్డంగా పెట్టుకుని డబ్బు వసూలు చేసేందుకు ప్రయత్నించిన కోణంలో అధికారులు దర్యాప్తు చేస్తున్నారు.
ఈ ఘటనపై ప్రియాంక గాంధీ వ్యక్తిగత కార్యదర్శి డి.ఎస్. రాజ్కుమార్ కేరళ డీజీపీ, వయనాడ్ జిల్లా ఎస్పీకి అధికారికంగా ఫిర్యాదు చేశారు. అనంతరం కల్పేట సైబర్ పోలీస్ స్టేషన్, కోజికోడ్ సైబర్ సెల్ వేర్వేరుగా కేసులు నమోదు చేసి విచారణ ప్రారంభించాయి. ఈ కాల్స్ ఢిల్లీ నుంచి వచ్చినట్లు ప్రాథమికంగా గుర్తించిన అధికారులు, నిందితులు అత్యాధునిక ‘కాలర్ స్పూఫింగ్’ సాంకేతికతను ఉపయోగించి ఉండవచ్చనే అనుమానం వ్యక్తం చేస్తున్నారు. దీనివల్ల నిజమైన ఫోన్ నంబర్ల మాదిరిగా కనిపించే విధంగా కాల్స్ చేసి బాధితులను నమ్మించే ప్రయత్నం జరిగి ఉండవచ్చని భావిస్తున్నారు.
కాంగ్రెస్ అధిష్ఠానం సూచనల మేరకే తాను పోలీసులను ఆశ్రయించినట్లు ఎమ్మెల్యే విద్యా బాలకృష్ణన్ తెలిపారు. ఈ తరహా మోసాలను ఏమాత్రం ఉపేక్షించబోమని కేరళ ప్రభుత్వం స్పష్టం చేసింది. ఈ వ్యవహారంపై రాష్ట్ర వ్యవసాయ మంత్రి టి. సిద్ధిఖీ కూడా స్పందిస్తూ, దర్యాప్తును వేగవంతం చేసి నిందితులను గుర్తించి చట్టప్రకారం చర్యలు తీసుకుంటామని తెలిపారు.
మరోవైపు, ఈ ఘటనలో ప్రస్తావనకు వచ్చిన మంత్రివర్గ విస్తరణపై వస్తున్న వార్తలను కాంగ్రెస్ నాయకత్వం ఖండించింది. ప్రస్తుతం అలాంటి ప్రతిపాదన ఏదీ లేదని స్పష్టం చేస్తూ, ప్రజాప్రతినిధులు, రాజకీయ నాయకులు ఇలాంటి మోసపూరిత ఫోన్ కాల్స్, సందేశాల విషయంలో అప్రమత్తంగా ఉండాలని పోలీసులు సూచించారు. కాలర్ వివరాలను ధృవీకరించకుండా ఎలాంటి ఆర్థిక లావాదేవీలు చేయవద్దని హెచ్చరించారు.
