ఆగస్టు 15న దేశానికి స్వాతంత్ర్యం.
* తెలంగాణకు మాత్రం మరో 13 నెలలు నిజాం బానిస సంకెళ్లు.
* సెప్టెంబర్ 17ను అధికారికంగా నిర్వహించకపోవడం చరిత్రకు తీరని అన్యాయం.
* బీజేపీ ఎంపీ డా. కె. లక్ష్మణ్
హైదరాబాద్, మహా .
దేశమంతా 1947 ఆగస్టు 15న స్వాతంత్ర్య సంబరాల్లో మునిగితేలిన సమయంలో హైదరాబాద్ సంస్థానంలోని తెలంగాణ మాత్రం నిజాం రాచరిక పాలన, రజాకార్ల దురాగతాల కారణంగా ఆ వేడుకల్లో భాగస్వామ్యం కాలేకపోయిందని బీజేపీ రాజ్యసభ సభ్యుడు డా. కె. లక్ష్మణ్ అన్నారు. భారతదేశానికి స్వాతంత్ర్యం వచ్చినప్పటికీ తెలంగాణ ప్రజలు మరో 13 నెలలపాటు రజాకార్ల అరాచకాలను, నిజాం పాలనలోని నిర్బంధాలను భరించాల్సి వచ్చిందని పేర్కొన్నారు. నేటి యువతరానికి, కొత్త తరాలకు దేశానికి స్వాతంత్ర్యం వచ్చిన రోజు ఆగస్టు 15 అనే విషయం మాత్రమే తెలుసని, అదే సమయంలో హైదరాబాద్ సంస్థానంలోని తెలంగాణ పరిస్థితులను కూడా వారికి తెలియజేయాల్సిన అవసరం ఉందని అన్నారు. హైదరాబాద్‌లోని బీజేపీ రాష్ట్ర కార్యాలయంలో నిర్వహించిన విలేకరుల సమావేశంలో ఆయన తెలంగాణ విమోచన పోరాట చరిత్ర, నాటి రాజకీయ పరిస్థితులు, వీరుల త్యాగాలను వివరించారు.
భారతదేశం స్వతంత్రమైన సమయంలో హైదరాబాద్ సంస్థానాన్ని భారతదేశంలో విలీనం చేయకుండా ప్రత్యేక దేశంగా లేదా ఇస్లామిక్ రాజ్యంగా మార్చేందుకు నిజాం ప్రయత్నాలు చేశారని లక్ష్మణ్ ఆరోపించారు. కాసిం రజ్వీ నేతృత్వంలోని రజాకార్లు దాదాపు 13 నెలలపాటు సాగించిన అరాచకాల్లో తెలంగాణ ప్రజలు తీవ్రంగా నష్టపోయారని అన్నారు. ఈ చరిత్రను నాటి కాంగ్రెస్ పాలకులు విస్మరించారని విమర్శించారు. తెలంగాణ ప్రజల స్వాతంత్ర్య ఆకాంక్షను, జాతీయ భావాన్ని అణచివేయడానికి రజాకార్లు అనేక ప్రాంతాల్లో దారుణాలకు పాల్పడ్డారని పేర్కొన్నారు.
పరకాలలో మువ్వన్నెల జాతీయ పతాకాన్ని ఎగురవేసేందుకు ప్రజలు ఏకమై ఉద్యమించిన సమయంలో రజాకార్లు కాల్పులకు తెగబడ్డారని లక్ష్మణ్ తెలిపారు. జలియన్‌వాలాబాగ్‌ను తలపించే రీతిలో దాదాపు 90 మంది దేశభక్తులు ప్రాణాలు కోల్పోయారని అన్నారు. ఈ ఘటన తెలంగాణ చరిత్రలో విషాదకర అధ్యాయంగా నిలిచిందని, పరకాల పోరాట వీరుల త్యాగాలను గుర్తు చేసుకుంటూ బీజేపీ ఆధ్వర్యంలో అమరధామాన్ని నిర్మించి ప్రతి ఏటా నివాళులు అర్పిస్తున్నామని చెప్పారు.
నిర్మల్ గడ్డపై రాంజీ గోండ్ నేతృత్వంలో స్వాతంత్ర్యం కోసం పోరాడిన దాదాపు వెయ్యి మంది ఆదివాసీలను ఒకే మర్రిచెట్టుకు ఉరితీసిన ఘటనను కూడా లక్ష్మణ్ ప్రస్తావించారు. ‘వెయ్యి ఊడల మర్రి’గా గుర్తుండిపోయిన ఆ విషాద చరిత్ర ఆనవాళ్లను గతంలో తాను చేపట్టిన తెలంగాణ విమోచన యాత్ర సందర్భంగా పరిశీలించినట్లు తెలిపారు. ఆ చరిత్రను చెరిపివేసే ప్రయత్నాలు జరిగాయని ఆవేదన వ్యక్తం చేశారు. తెలంగాణ విమోచన పోరాటంలో ఆదివాసీలు, రైతులు, మహిళలు, సామాన్య ప్రజలు పోషించిన పాత్రను భావితరాలకు తెలియజేయాల్సిన బాధ్యత ఉందన్నారు.
బైరాన్‌పల్లి పోరాట చరిత్రను కూడా లక్ష్మణ్ గుర్తుచేశారు. జాతీయ భావంతో ప్రజలు చైతన్యవంతులవుతున్నారనే అక్కసుతో రజాకార్లు గ్రామంపై దాడులకు పాల్పడ్డారని, గ్రామ ప్రజలు పలుమార్లు వారిని ప్రతిఘటించారని తెలిపారు. చివరకు దొంగదెబ్బతో దాడి చేసి గ్రామస్తులను హతమార్చిన ఘటనలు తెలంగాణ పోరాట చరిత్రలో అత్యంత విషాదకరమైనవని పేర్కొన్నారు. పసిపిల్లలపై, మహిళలపై కూడా దారుణాలకు పాల్పడ్డారని ఆరోపించారు.
తెలంగాణ ప్రజల్లో తిరుగుబాటు స్ఫూర్తిని రగిలించిన పాటలు, కవిత్వం కూడా విమోచన పోరాటంలో కీలక పాత్ర పోషించాయని లక్ష్మణ్ అన్నారు. బండి యాదగిరి రచించిన పోరాట గీతాలు ప్రజల్లో చైతన్యాన్ని నింపాయని పేర్కొన్నారు. చాకలి ఐలమ్మ, కొమరం భీమ్, దొడ్డి కొమరయ్య, స్వామి రామానంద తీర్థ వంటి అనేక మంది పోరాట యోధుల త్యాగాలను స్మరించుకోవాల్సిన అవసరం ఉందన్నారు. నిజాం కళాశాలలో జాతీయ పతాకాన్ని ఎగురవేసి, లాఠీ దెబ్బలు తిన్నప్పటికీ చివరివరకు వందేమాతరం ఆలపించిన వందేమాతరం రామచంద్రరావు వంటి వీరుల స్ఫూర్తిని యువతకు పరిచయం చేయాలని కోరారు.
భారత విలీనాన్ని ఆకాంక్షిస్తూ ‘ఇమ్రోజ్‌’ పత్రిక ద్వారా నిజాం పాలనను ప్రశ్నించిన షోయబుల్లా ఖాన్‌ను హైదరాబాద్ నడిబొడ్డున దారుణంగా హత్య చేశారని లక్ష్మణ్ తెలిపారు. తుర్రేబాజ్ ఖాన్‌తో పాటు అనేక మంది జాతీయవాదులు నిజాం పాలనకు వ్యతిరేకంగా పోరాడారని, వారి త్యాగాలను కూడా చరిత్రలో సముచితంగా గుర్తించాల్సిన అవసరం ఉందన్నారు.
దేశంలోని అనేక సంస్థానాలు భారతదేశంలో విలీనమైనప్పటికీ హైదరాబాద్, జునాగఢ్, జమ్మూకశ్మీర్ వంటి సంస్థానాల విషయంలో ప్రత్యేక పరిస్థితులు నెలకొన్నాయని లక్ష్మణ్ పేర్కొన్నారు. హైదరాబాద్ సంస్థానం భారతదేశంలో విలీనం కావడానికి సర్దార్ వల్లభాయ్ పటేల్ దృఢ సంకల్పంతో వ్యవహరించారని అన్నారు. 1948 సెప్టెంబర్ 13న ‘ఆపరేషన్ పోలో’ ప్రారంభమై భారత సైన్యం ముందుకు సాగడంతో సెప్టెంబర్ 17న నిజాం సైన్యం లొంగిపోయి హైదరాబాద్ సంస్థానం భారతదేశంలో విలీనమైందని తెలిపారు. రాజ్యాంగ వ్యవస్థలోకి హైదరాబాద్ సంస్థానం రావడంతో తెలంగాణ ప్రజలు స్వేచ్ఛా వాతావరణంలో జీవించే అవకాశం ఏర్పడిందన్నారు.
హైదరాబాద్ సంస్థానంలో భాగంగా ఉన్న మహారాష్ట్ర, కర్ణాటక ప్రాంతాల్లో సెప్టెంబర్ 17ను ప్రభుత్వాలు అధికారికంగా నిర్వహిస్తున్నప్పుడు తెలంగాణలో మాత్రం ఎందుకు అధికారికంగా నిర్వహించకూడదని లక్ష్మణ్ ప్రశ్నించారు. ఈ అంశంపై బీజేపీ చాలాకాలంగా పోరాడుతోందని చెప్పారు. గతంలో కేసీఆర్ అధికారంలోకి రాకముందు సెప్టెంబర్ 17ను అధికారికంగా నిర్వహించాలంటూ చేసిన డిమాండ్లను ప్రస్తావిస్తూ, అధికారంలోకి వచ్చిన తర్వాత వైఖరి మార్చుకున్నారని విమర్శించారు. బీఆర్ఎస్ ప్రభుత్వం ఓటు బ్యాంకు రాజకీయాల కారణంగానే విమోచన దినోత్సవాన్ని అధికారికంగా నిర్వహించలేదని ఆరోపించారు.
ప్రస్తుత కాంగ్రెస్ ప్రభుత్వం కూడా అదే విధానాన్ని కొనసాగిస్తోందని లక్ష్మణ్ విమర్శించారు. ప్రజాపాలన పేరుతో సెప్టెంబర్ 17 చారిత్రక ప్రాధాన్యతను మరుగునపడేలా చేస్తున్నారని ఆరోపించారు. మజ్లిస్‌ పార్టీ ఒత్తిళ్లకు కాంగ్రెస్, బీఆర్ఎస్ పార్టీలు తలొగ్గుతున్నాయని విమర్శించారు. అయితే ఈ అంశంపై గతంలోనూ వివిధ రాజకీయ పక్షాల మధ్య భిన్నాభిప్రాయాలు వ్యక్తమయ్యాయి. హైదరాబాద్ సంస్థానం భారతదేశంలో విలీనమైన సెప్టెంబర్ 17ను కొందరు విమోచన దినంగా, మరికొందరు విలీన దినంగా, మరికొందరు జాతీయ సమైక్యత దినంగా పేర్కొంటున్నారు.
తెలంగాణలో ప్రస్తుతం అమలవుతున్న 22ఏ భూముల అంశాన్ని కూడా లక్ష్మణ్ ప్రస్తావించారు. నాటి నిజాం పాలనలో ప్రజల భూములను బలవంతంగా స్వాధీనం చేసుకున్నట్లే, నేడు 22ఏ పేరుతో భూములను నిషేధిత జాబితాలో చేర్చి ప్రజలకు ఇబ్బందులు కలిగిస్తున్నారని కాంగ్రెస్ ప్రభుత్వంపై ఆరోపణలు చేశారు. భూమి కోసం, భుక్తి కోసం పోరాడిన చాకలి ఐలమ్మ స్ఫూర్తితో ప్రజలు తమ హక్కుల కోసం పోరాడాల్సిన సమయం వచ్చిందని పిలుపునిచ్చారు.
నిజాం పాలనకు వ్యతిరేకంగా దాశరథి కృష్ణమాచార్య వంటి కవులు తమ రచనల ద్వారా ప్రజల్లో పోరాట స్ఫూర్తిని నింపారని లక్ష్మణ్ అన్నారు. తెలంగాణ విమోచన పోరాట చరిత్రను కేవలం రాజకీయ చర్చగా కాకుండా విద్యార్థులు, యువత తెలుసుకోవాల్సిన చారిత్రక అంశంగా చూడాలని కోరారు. తెలంగాణ పోరాట యోధుల జీవితాలు, రజాకార్ల దురాగతాలు, నిజాం పాలనకు వ్యతిరేకంగా జరిగిన ప్రజా ఉద్యమాలు, హైదరాబాద్ సంస్థానం భారతదేశంలో విలీనం అయిన పరిణామాలను విద్యా పాఠ్యాంశాల్లో సముచితంగా చేర్చాలని డిమాండ్ చేశారు.
గత మూడున్నర దశాబ్దాలుగా బీజేపీ తెలంగాణ విమోచన దినోత్సవాన్ని అధికారికంగా నిర్వహించాలనే డిమాండ్‌తో ఉద్యమిస్తోందని లక్ష్మణ్ తెలిపారు. సీనియర్ నాయకుడు సీ.హెచ్. విద్యాసాగర్‌రావు నేతృత్వంలో కమిటీ ఏర్పాటు చేసి ఆందోళనలు నిర్వహించామని, లాఠీదాడులు, అరెస్టులను ఎదుర్కొన్నామని గుర్తుచేశారు. ఎల్.కె. అద్వానీ వంటి జాతీయ నాయకులు కూడా బహిరంగ సభల ద్వారా తెలంగాణ విమోచన చరిత్రపై ప్రజల్లో అవగాహన కల్పించారని అన్నారు.
కేంద్రంలో నరేంద్ర మోదీ ప్రభుత్వం అధికారంలోకి వచ్చిన తర్వాత కేంద్ర ప్రభుత్వం ఆధ్వర్యంలో సెప్టెంబర్ 17 కార్యక్రమాలకు ప్రాధాన్యం పెరిగిందని లక్ష్మణ్ తెలిపారు. 2022 నుంచి హైదరాబాద్ పరేడ్ మైదానంలో కేంద్ర ప్రభుత్వం ఆధ్వర్యంలో తెలంగాణ విమోచన దినోత్సవ కార్యక్రమాలు నిర్వహిస్తున్నామని చెప్పారు. ఈ ఏడాది కూడా భారీ స్థాయిలో కార్యక్రమాలు నిర్వహించనున్నట్లు తెలిపారు. తెలంగాణలో బీజేపీ అధికారంలోకి వస్తే సెప్టెంబర్ 17ను రాష్ట్ర ప్రభుత్వం తరఫున అధికారికంగా నిర్వహించడంతో పాటు విమోచన పోరాట చరిత్రను విద్యా పాఠ్యాంశాల్లో చేర్చుతామని స్పష్టం చేశారు.
తెలంగాణ విమోచన పోరాటంలో ప్రాణత్యాగం చేసిన వీరుల చరిత్రను రాజకీయాలకు అతీతంగా భావితరాలకు అందించాల్సిన బాధ్యత అందరిపైనా ఉందని లక్ష్మణ్ అన్నారు. సెప్టెంబర్ 17 చారిత్రక ప్రాధాన్యతను ప్రతి ఒక్కరూ గుర్తించాలని, విమోచన దినోత్సవ కార్యక్రమాల్లో తెలంగాణ ప్రజలందరూ స్వచ్ఛందంగా పెద్ద ఎత్తున పాల్గొనాలని పిలుపునిచ్చారు.
ఈ సమావేశంలో మాజీ ఎంపీ, బీజేపీ రాష్ట్ర ఉపాధ్యక్షుడు, తెలంగాణ విమోచన ఉత్సవ సమితి చైర్మన్ డా. బూర నర్సయ్య గౌడ్, బీజేపీ సీనియర్ నాయకుడు జి. మనోహర్ రెడ్డి, బీజేపీ మహిళా మోర్చా రాష్ట్ర అధ్యక్షురాలు డా. శిల్పారెడ్డి, బీజేపీ రాష్ట్ర అధికార ప్రతినిధి, విమోచన ఉత్సవ కమిటీ సభ్యుడు కప్పర ప్రసాద్, విమోచన కమిటీ సభ్యులు కపిలవాయి రవీందర్, సంజయ్ ఘనాతే, వెంకట్ రెడ్డి తదితరులు పాల్గొన్నారు.
