న్యూఢిల్లీ, మహా:
ఢిల్లీలోని జంతర్‌ మంతర్‌ వద్ద కాక్రోచ్‌ జనతా పార్టీ (సీజేపీ) చేపట్టిన నిరసన పూర్తిగా విఫలమైందని బీజేపీ ఎంపీ సంబిత్‌ పాత్ర వ్యాఖ్యానించారు. నిరసన పేరుతో దేశ రాజధానిని బందీగా మార్చేందుకు పలువురు నాయకులు ప్రయత్నించారని ఆరోపించారు. శనివారం నిర్వహించిన ఆందోళనల్లో పాల్గొన్న వందలాది మంది యువతతోపాటు పలువురు రాజకీయ నాయకులను పోలీసులు అదుపులోకి తీసుకున్న నేపథ్యంలో ఆయన ఈ వ్యాఖ్యలు చేశారు. ప్రజాస్వామ్య వ్యవస్థలో నిరసనలకు అవకాశం ఉన్నప్పటికీ, గుంపుల ద్వారా ఒత్తిడి తెచ్చి వ్యవస్థను ప్రభావితం చేయాలన్న ప్రయత్నాలు ఫలించలేదని విమర్శించారు.
రాహుల్‌గాంధీపై సంబిత్‌ పాత్ర విమర్శలు
కాంగ్రెస్‌ అగ్రనేత రాహుల్‌గాంధీపై సంబిత్‌ పాత్ర తీవ్ర విమర్శలు చేశారు. విదేశీ శక్తులతో చేతులు కలిపి దేశంలో అరాచకం సృష్టించేందుకు ప్రయత్నిస్తున్నారని ఆరోపించారు. శుక్రవారం రాష్ట్రపతి ద్రౌపదీ ముర్ముతో జరిగిన సమావేశం అనంతరం, ఓట్ల చోరీ ఆరోపణలను రాష్ట్రపతి ఖండించలేదంటూ రాహుల్‌గాంధీ చేసిన వ్యాఖ్యలను కూడా ఆయన తప్పుబట్టారు. రాహుల్‌గాంధీపై వ్యక్తిగత విమర్శలు చేస్తూ, ఆయన వ్యాఖ్యలను సంబిత్‌ పాత్ర తీవ్రంగా వ్యతిరేకించారు.
శాంతిభద్రతలు అదుపులోనే ఉన్నాయన్న బీజేపీ ఎంపీ
జంతర్‌ మంతర్‌ వద్ద చోటుచేసుకున్న పరిణామాలు, టెలివిజన్‌ ఛానళ్లు, సామాజిక మాధ్యమాల్లో ప్రసారమవుతున్న దృశ్యాలు దేశంలో నెలకొన్న వాస్తవ పరిస్థితులకు ప్రతిబింబం కావని సంబిత్‌ పాత్ర పేర్కొన్నారు. దేశం ప్రశాంతంగా, సుపరిపాలనతో ముందుకు సాగుతోందని అన్నారు. నిరసనల సందర్భంగా హింసను ప్రేరేపించే ప్రయత్నాలు జరిగినప్పటికీ అవి విఫలమయ్యాయని, ప్రస్తుతం పరిస్థితి అదుపులోనే ఉందని వ్యాఖ్యానించారు. కాగా, ప్రధాన ఎన్నికల కమిషనర్‌ జ్ఞానేశ్‌ కుమార్‌కు వ్యతిరేకంగా చేపట్టిన నిరసనలు, ఓటర్ల జాబితాల ప్రత్యేక సమగ్ర సవరణపై రాజకీయ పార్టీల మధ్య కొనసాగుతున్న వివాదం నేపథ్యంలో బీజేపీ ఎంపీ వ్యాఖ్యలు రాజకీయంగా ప్రాధాన్యం సంతరించుకున్నాయి.
