• కర్ణాటక ముఖ్యమంత్రి డీకే శివకుమార్‌.
బెంగళూరు, మహా.
ఉత్తర కర్ణాటకలో చెరకు రైతుల ఆందోళనలు ఉధృతం కావడంతో రాష్ట్ర ప్రభుత్వం కేంద్రం జోక్యాన్ని కోరింది. చెరకు క్రషింగ్‌ నిలిచిపోవడం, రైతులకు గిట్టుబాటు ధర లభించకపోవడం వంటి సమస్యలకు పరిష్కారం చూపాలని కోరుతూ కర్ణాటక ముఖ్యమంత్రి డీకే శివకుమార్‌ ప్రధాని నరేంద్ర మోదీకి లేఖ రాశారు. రైతుల ఆందోళనలు, రహదారుల దిగ్బంధనాల కారణంగా ప్రజాజీవనానికి అంతరాయం కలుగుతోందని, కోతకు వచ్చిన చెరకు పొలాల్లోనే పాడయ్యే పరిస్థితి ఏర్పడుతోందని ఆయన లేఖలో పేర్కొన్నారు.
చక్కెర కనీస మద్దతు ధరను సవరించాలని డీకే శివకుమార్‌ కేంద్రాన్ని కోరారు. 2019 ఫిబ్రవరి నుంచి కిలో చక్కెర కనీస ధర రూ.31 వద్దే కొనసాగుతోందని, ఇదే సమయంలో చెరకు ధర టన్నుకు రూ.2,750 నుంచి రూ.3,650కు పెరిగిందని వివరించారు. చెరకు సాగు వ్యయం, రైతులకు చెల్లించాల్సిన మొత్తాలు పెరుగుతున్న నేపథ్యంలో ప్రస్తుత చక్కెర ధరలతో మిల్లులు ఆర్థిక ఒత్తిడిని ఎదుర్కొంటున్నాయని పేర్కొన్నారు. చక్కెర కనీస ధరను పెంచితే మిల్లుల ఆదాయం మెరుగుపడి, రైతులకు చెల్లింపులు సకాలంలో జరిగే అవకాశం ఉంటుందని లేఖలో అభిప్రాయపడ్డారు.
సాధారణ వినియోగదారులపై భారం పడకుండా చక్కెర ధరల విధానంలో మార్పులు తీసుకురావాలని ముఖ్యమంత్రి సూచించారు. గృహ వినియోగానికి విక్రయించే చక్కెర ధరలు, పెద్ద మొత్తాల్లో కొనుగోలు చేసే వాణిజ్య సంస్థలకు వర్తించే ధరలను వేర్వేరుగా నిర్ణయించే విధానాన్ని పరిశీలించాలని కోరారు. దీనివల్ల సాధారణ వినియోగదారులకు ధరల భారం పెరగకుండా, చక్కెర మిల్లులకు తగిన ఆదాయం లభించే అవకాశం ఉంటుందని పేర్కొన్నారు.
చెరకు రసం, చక్కెర పాకం నుంచి తయారయ్యే ఇథనాల్‌ను ఇటీవల చమురు విక్రయ సంస్థలు విడుదల చేసిన కొనుగోలు టెండర్ల నుంచి మినహాయించడం సరైన నిర్ణయం కాదని డీకే శివకుమార్‌ పేర్కొన్నారు. ఈ విధానం మిల్లుల ఆదాయాన్ని ప్రభావితం చేసి, రైతులకు చెరకు బకాయిల చెల్లింపుల్లో జాప్యానికి కారణమవుతుందని ఆందోళన వ్యక్తం చేశారు. చెరకు సాగు వ్యయం పెరుగుతున్న నేపథ్యంలో, చెరకు రసం నుంచి తయారయ్యే ఇథనాల్‌ ధరలను కూడా పెంచాలని కోరారు. 2022–23 నుంచి ఈ ధరల్లో పెరుగుదల లేదని, ధాన్యం ఆధారిత ఇథనాల్‌ ధరల సవరణకు అనుగుణంగా చెరకు ఆధారిత ఇథనాల్‌ ధరలను కూడా సమీక్షించాలని విజ్ఞప్తి చేశారు.
