- వైఎస్సార్‌సీపీ అభ్యర్థి చైతన్య నామినేషన్ తిరస్కరణ!
- జనసేన అభ్యర్థి కోట్ల రేవతి ఫిర్యాదుతో కదిలిన యంత్రాంగం.
- ఓటు బదిలీ వివాదంతో నామినేషన్‌ను తోసిపుచ్చిన రిటర్నింగ్ అధికారి!
విజయనగరం,మహా.
ఆంధ్రప్రదేశ్‌లో అత్యంత ఉత్కంఠభరితంగా సాగుతున్న స్థానిక సంస్థల ఎన్నికల వేళ వైఎస్సార్‌సీపీకి గట్టి ఎదురుదెబ్బ తగిలింది. విజయనగరం జిల్లా రాజకీయాల్లో కీలక నేత, మాజీ మంత్రి బొత్స సత్యనారాయణ కుటుంబానికి ఎన్నికల వేళ తొలి షాక్ తగిలింది. పూసపాటిరేగ మండలం నుంచి జెడ్పీటీసీ స్థానానికి వైఎస్సార్‌సీపీ తరఫున నామినేషన్ దాఖలు చేసిన బొత్స చైతన్య నామినేషన్‌ను ఎన్నికల రిటర్నింగ్ అధికారి ఖరాకండీగా తిరస్కరించారు. నామినేషన్ల పరిశీలన సందర్భంగా చోటుచేసుకున్న ఈ అనూహ్య పరిణామం జిల్లా రాజకీయ వర్గాల్లో తీవ్ర సంచలనం రేపింది.
వివరాల్లోకి వెళితే.. విజయనగరం మున్సిపల్ కార్పొరేషన్ పరిధిలోని 41వ వార్డులో ఓటు హక్కు కలిగి ఉన్న బొత్స చైతన్య, పూసపాటిరేగ మండలానికి తన ఓటును బదిలీ చేసుకోవడంలో మరియు నామినేషన్ దాఖలు చేయడంలో చోటుచేసుకున్న నిబంధనల ఉల్లంఘనపై జనసేన పార్టీ జెడ్పీటీసీ అభ్యర్థి కోట్ల రేవతి ఎన్నికల అధికారులకు పక్కా ఆధారాలతో ఫిర్యాదు చేశారు. మున్సిపల్ కార్పొరేషన్‌లో ఓటరుగా కొనసాగుతున్న వ్యక్తి, స్థానిక ఎన్నికల నిబంధనలకు విరుద్ధంగా మరో మండలంలో జెడ్పీటీసీ అభ్యర్థిగా ఎలా నామినేషన్ దాఖలు చేస్తారంటూ ఆమె అధికారుల దృష్టికి తీసుకెళ్లారు.
జనసేన అభ్యర్థి సమర్పించిన ఫిర్యాదును తీవ్రంగా పరిగణించిన ఎన్నికల రిటర్నింగ్ అధికారులు, ఇరువర్గాలు అందించిన పత్రాలను మరియు ఎన్నికల నిబంధనలను క్షుణ్ణంగా పరిశీలించారు. చట్టపరమైన అంశాలను బేరీజు వేసిన అనంతరం, నిబంధనలకు విరుద్ధంగా ఉందని నిర్ధారించుకున్న అధికారులు బొత్స చైతన్య నామినేషన్‌ను అధికారికంగా తిరస్కరించారు. ఈ మేరకు మిగిలిన అభ్యర్థులకు, రాజకీయ పార్టీల ప్రతినిధులకు రిటర్నింగ్ అధికారి ఈ విషయాన్ని స్పష్టం చేశారు. స్థానిక ఎన్నికలు అత్యంత ప్రతిష్టాత్మకంగా మారిన తరుణంలో, అధికారిక నామినేషనే తిరస్కరణకు గురికావడం బొత్స కుటుంబానికి, వైఎస్సార్‌సీపీ శ్రేణులకు భారీ ఎదురుదెబ్బగా మారింది.
