- పెట్టుబడులపై గురి, కరువుపై ఉక్కుపాదం!
హైదరాబాద్, మహా.
తెలంగాణ సచివాలయంలో ముఖ్యమంత్రి రేవంత్‌రెడ్డి నేతృత్వంలో కేబినెట్ భేటీ వేడెక్కింది. డిప్యూటీ సీఎం భట్టి విక్రమార్క, సీఎస్ సంజయ్ జాజు సహా మంత్రులంతా కొలువుదీరిన ఈ మీటింగ్‌లో రాష్ట్రానికి సంబంధించిన కీలక అంశాలను ఆసాంతం జల్లెడ పడుతున్నారు. ఒకవైపు పెట్టుబడుల వేట.. మరోవైపు రైతన్నల కష్టాలపై సర్కార్ ఏకబిగిన నిర్ణయాలు తీసుకునే పనిలో పడింది.
డిసెంబర్ 7 నుంచి 9 దాకా ఫ్యూచర్ సిటీలో జరగబోయే ‘ఇన్వెస్ట్ తెలంగాణ గ్లోబల్ సమ్మిట్ – 2026’ను సక్సెస్ చేసి తీరాల్సిందేనని మంత్రులకు సీఎం రేవంత్ దిశానిర్దేశం చేశారు. ప్రపంచస్థాయి కుబేరులను, బడా పారిశ్రామికవేత్తలను రప్పించి, రాష్ట్రానికి పెట్టుబడుల వరద పారించాలన్నది సర్కార్ పక్కా స్కెచ్.
మరోవైపు, వానల్లేక ఎండిపోతున్న పంటలపై కేబినెట్ సీరియస్ ఫోకస్ పెట్టింది. ఎల్‌నినో దెబ్బకు అన్నదాత పడుతున్న కష్టాలపై డిప్యూటీ సీఎం భట్టి ఆధ్వర్యంలోని సబ్‌కమిటీ ఇచ్చిన రిపోర్టును కూలంకషంగా చర్చించింది. పల్లెల్లో గుక్కెడు తాగునీటికి కటకట రాకుండా చూడాలని, రైతులకు తక్షణ సాయం అందించాలని డిసైడ్ అయ్యారు. రాష్ట్రంలోని అసలు పరిస్థితిని పూసగుచ్చినట్లు చెప్పి కేంద్రం నుంచి నిధులు రాబట్టేందుకు ఏకంగా ఓ స్పెషల్ టీమ్‌ను ఢిల్లీకి పంపేందుకు సర్కార్ గ్రీన్ సిగ్నల్ ఇచ్చే యోచనలో ఉంది.
ఇక ఎప్పటినుంచో సాగుతున్న రీజినల్ రింగ్ రోడ్డు ఉత్తర భాగానికి నిధుల సమీకరణ, రైతులకు పరిహారం చెల్లింపుల కోసం తీసుకున్న అప్పుల వ్యవహారాన్ని ఓ కొలిక్కి తెచ్చే పనిలో పడ్డారు. మొన్ననే అసెంబ్లీని ప్రొరోగ్ చేసినందున.. అత్యవసర పనుల కోసం ఆర్డినెన్సుల అస్త్రాన్ని ప్రయోగించే దిశగా అడుగులు వేస్తున్నారు. వీటికి తోడు నిరుద్యోగుల నిరీక్షణకు తెరదించుతూ పెండింగ్ ఉద్యోగాల భర్తీ, కొత్త ప్రాజెక్టులకు భూముల కేటాయింపులపై చర్చిస్తున్నారు. ఇక పొలిటికల్‌గా అత్యంత కీలకమైన గ్రాడ్యుయేట్, గవర్నర్ కోటా ఎమ్మెల్సీల భర్తీపై ముమ్మర కసరత్తు చేస్తున్నారు. భేటీ ముగిశాక సర్కార్ నుంచి ఎలాంటి సంచలన ప్రకటనలు వస్తాయోనని రాష్ట్రవ్యాప్తంగా ఉత్కంఠ నెలకొంది.
