- పల్లె కన్నీరు పెడుతోంది.. మళ్ళీ మనమే రావాలి.
- దత్తత గ్రామాలతో కేసీఆర్ ఆత్మీయ వాక్కు
- గత వైభవానికి, నేటి గోసకు మధ్య అంతరమెంత.?
- ఎర్రవెల్లి వేదికగా కేసీఆర్ అంతర్మధనం.
- పోగొట్టుకున్నాకనే విలువ తెలుస్తోంది..కేసీఆర్ సమక్షంలో కన్నీటి పర్యంతమైన పల్లె జనం
హైదరాబాద్, మహా.
**అధికారం శాశ్వతం కాకపోవచ్చు, కానీ చేసిన అభివృద్ధి చరిత్రలో నిలిచిపోతుంది. పదవిలో ఉన్నప్పుడు ఒక నాయకుడు వేసిన ముద్ర, ఆ తర్వాత కాలంలో ప్రజల అనుభవంలోకి వచ్చినప్పుడే ఆ నాయకుడి నిజమైన విలువ తెలుస్తుంది. సరిగ్గా ఇదే అంశం శుక్రవారం ఎర్రవెల్లి వేదికగా మరోసారి రుజువైంది. తెలంగాణ పల్లెలను దేశానికి ఆదర్శంగా నిలపాలని కలలుకన్న మాజీ ముఖ్యమంత్రి కేసీఆర్, తాను దత్తత తీసుకున్న గ్రామాల ప్రజాప్రతినిధులతో జరిపిన ఆత్మీయ సమ్మేళనం ఒక రాజకీయ సమావేశంలా కాకుండా, ఒక కుటుంబ కలయికలా సాగింది. నాడు స్వర్ణయుగంలా వెలిగిన పల్లెలు, నేడు సంక్షోభంలో కూరుకుపోతున్న వైనాన్ని చూసి చలించిపోయిన కేసీఆర్, గ్రామస్తులకు ధైర్యం చెబుతూనే, స్వయం శక్తితో ఎలా ఎదగాలో దిశానిర్దేశం చేయడం ఈ సమావేశపు ముఖ్య ఉద్దేశం**
తెలంగాణ మాజీ ముఖ్యమంత్రి, బీఆర్ఎస్ అధినేత కేసీఆర్ శుక్రవారం తన నివాసంలో ఎర్రవెల్లి, నర్సన్నపేట గ్రామాల నూతన సర్పంచులు, వార్డు మెంబర్లను ఆత్మీయంగా కలుసుకున్నారు. దత్తత గ్రామాలైన ఈ రెండు ఊళ్ల నుంచే ఒకనాడు దేశం గర్వించదగ్గ గ్రామ స్వరాజ్య ప్రయోగాలు జరిగాయి. ఈ నేపథ్యంలో కొత్తగా ఎన్నికైన ప్రజాప్రతినిధులను ఆశీర్వదించేందుకు పిలిపించుకున్న కేసీఆర్, వారిని చూడగానే పాత జ్ఞాపకాలను నెమరువేసుకున్నారు. కేవలం రాజకీయ నాయకుడిలా కాకుండా, ఆ గ్రామాల పెద్దదిక్కుగా ప్రతి ఒక్కరినీ పేరుపేరునా పలకరిస్తూ, వారి యోగక్షేమాలను, పంటల పరిస్థితిని అడిగి తెలుసుకుంటున్నప్పుడు కేసీఆర్ కళ్ళలో ఒక తృప్తి, గొంతులో ఒక ఆర్ద్రత కనిపించాయి.
ఈ ఆత్మీయ సమ్మేళనంలో కేసీఆర్ తన మనసులోని భావాలను చాలా లోతుగా ఆవిష్కరించారు. గత పదేళ్ళలో తన ప్రభుత్వం గ్రామీణ వ్యవస్థను ఎలా తీర్చిదిద్దిందో వివరిస్తూ, దళిత, గిరిజన, బహుజన వర్గాలకు, కులవృత్తులకు తాము అందించిన అండదండలే గ్రామాల ఆర్థిక ముఖచిత్రాన్ని మార్చాయని గుర్తుచేశారు. ఆనాడు పల్లె ప్రగతి ద్వారా అందించిన నిధులు, మిషన్ కాకతీయ ద్వారా ఇచ్చిన నీళ్ళు, వ్యవసాయానికి ఇచ్చిన ఉచిత విద్యుత్ వంటివి తెలంగాణ పల్లెలను దేశానికే ఆదర్శంగా నిలిపాయని ఆయన గర్వంగా చెప్పుకున్నారు. తన పాలనా సంస్కరణలు కేవలం పుస్తకాలకు పరిమితం కాలేదని, అవి పల్లె ప్రజల జీవితాల్లో వెలుగులు నింపాయని ఆయన మాటల్లో స్పష్టమైంది.
అయితే, ఈ సమావేశంలో అత్యంత భావోద్వేగభరితమైన ఘట్టం గ్రామస్తులు తమ గోడును వెళ్ళబోసుకున్నప్పుడు చోటుచేసుకుంది. కాంగ్రెస్ ప్రభుత్వం వచ్చాక గ్రామాల పరిస్థితి దిగజారిపోయిందని, నాడు కళకళలాడిన పల్లెలు నేడు మౌలిక వసతులు లేక, సాగునీరు అందక విలవిలలాడుతున్నాయని వారు ఆవేదన వ్యక్తం చేశారు. “సార్.. పోగొట్టుకున్నాకనే మీ విలువ అర్థమవుతోంది. ఇప్పుడు అంతా గోస మిగిలింది. మళ్ళీ మీరే రావాలి” అంటూ ఒక గ్రామస్తుడు చేసిన వ్యాఖ్య అక్కడున్న వారి హృదయాలను కదిలించింది. ప్రజల మాటల్లోని బాధను, వారి కళ్ళలోని నిస్సహాయతను చూసిన కేసీఆర్, ఒక తండ్రిలా వారికి భరోసా ఇచ్చారు. కష్టాలు, సుఖాలు కావడి కుండల్లాంటివని, కాలం ఎప్పుడూ ఒకేలా ఉండదని, మళ్ళీ మంచి రోజులు వస్తాయని ధైర్యం చెప్పారు.
ముఖ్యంగా, నూతన సర్పంచులకు కేసీఆర్ చేసిన బోధన ఒక పరిపాలనా దక్షుడి అనుభవాన్ని పట్టిచూపిస్తుంది. ప్రభుత్వం నుంచి వచ్చే సాయం కోసం ఎదురుచూస్తూ కూర్చోవద్దని, ఎవరినో నమ్ముకుని ఆగం కావద్దని ఆయన హెచ్చరించారు. గంగదేవిపల్లి వంటి ఆదర్శ గ్రామాలను స్ఫూర్తిగా తీసుకుని, గ్రామాభివృద్ధి కమిటీల ద్వారా స్వయం సమృద్ధి సాధించాలని పిలుపునిచ్చారు. ఈ క్రమంలో బంగ్లాదేశ్ సామాజిక ఆర్థికవేత్త ప్రొఫెసర్ యూనస్, మన దేశపు అన్నా హజారే వంటి మహనీయుల కృషిని ఉదహరిస్తూ, వారి స్ఫూర్తితో గ్రామీణ ఆర్థిక వ్యవస్థను బలోపేతం చేసుకోవాలని సూచించారు. కేవలం ప్రభుత్వ నిధులపై ఆధారపడకుండా, ప్రజల భాగస్వామ్యంతో గ్రామాన్ని అభివృద్ధి చేసుకునే ప్రణాళికలు రచించుకోవాలని ఆయన హితవు పలికారు.
చివరగా, ఎర్రవెల్లి సర్పంచ్ నారన్నగారి కవితా రామ్మోహన్ రెడ్డి దంపతులను, నర్సన్నపేట సర్పంచ్ గిలక బాల నర్సయ్యను, ఇతర సభ్యులను ఘనంగా సత్కరించిన కేసీఆర్, వారిలో కొత్త ఉత్సాహాన్ని నింపారు. “మళ్ళీ మన ప్రభుత్వమే వస్తుంది, అప్పటిదాకా అధైర్యపడొద్దు” అని కేసీఆర్ ఇచ్చిన పిలుపు, అక్కడున్న వారిలో భవిష్యత్తుపై కొత్త ఆశలను చిగురింపజేసింది. మొత్తానికి ఈ సమావేశం కేవలం అభినందన సభగానే కాకుండా, తెలంగాణ పల్లెల ఆత్మగౌరవాన్ని, స్వయం సమృద్ధి ఆవశ్యకతను మరోసారి గుర్తుచేసిన వేదికగా నిలిచింది.
