సూరత్లో అద్భుతం.
* 10వ అంతస్తు నుంచి పడినా గ్రిల్స్లో చిక్కుకొని ప్రాణాలతో బయటపడ్డ వ్యక్తి!
* చావు అంచుల్లో గంటసేపు పోరాటం.
* సాహసోపేతంగా రక్షించిన అగ్నిమాపక సిబ్బంది.
* టైమ్స్ గెలాక్సీ అపార్ట్మెంట్లో ఊపిరి బిగబట్టే ఉదంతం.
* అదృష్టవశాత్తు ప్రాణాలతో బయటపడ్డ వృద్ధుడు.
హైదరాబాద్, మహా.
గుజరాత్లోని సూరత్ నగరంలో అత్యంత గగుర్పాటు కలిగించే ప్రమాదం ఒకటి చోటుచేసుకుంది. జహంగీరాబాద్ ప్రాంతంలోని టైమ్స్ గెలాక్సీ అపార్ట్మెంట్లో నివసించే 57 ఏళ్ల నితిన్ అదియా అనే వ్యక్తి ప్రాణాపాయం నుండి అద్భుత రీతిలో తృటిలో తప్పించుకున్నారు. గురువారం ఆయన తన నివాసంలోని 10వ అంతస్తు కిటికీ నుంచి ప్రమాదవశాత్తు కిందపడిపోయారు. అయితే, ఆయన నేరుగా నేల మీద పడకుండా, ఎనిమిదవ అంతస్తు కిటికీకి ఉన్న ఐరన్ గ్రిల్స్లో కాలు చిక్కుకోవడంతో గాలిలో వేలాడుతూ ఉండిపోయారు. దాదాపు గంటపాటు మృత్యువుతో పోరాడిన ఆయనను అగ్నిమాపక సిబ్బంది అత్యంత చాకచక్యంగా రక్షించడంతో పెను ప్రమాదం తప్పింది.
ఈ ఘటనకు సంబంధించి అగ్నిమాపక అధికారులు స్థానికులు తెలిపిన వివరాల ప్రకారం, నితిన్ అదియా తన ఫ్లాట్లోని కిటికీకి సమీపంలో నిద్రిస్తున్న సమయంలో గాఢనిద్రలో పొరపాటున పక్కకు తిరగడంతో ఈ ప్రమాదం జరిగింది. సుమారు 100 అడుగుల ఎత్తు నుంచి పడిపోతున్న క్రమంలో, ఎనిమిదో అంతస్తు వద్ద ఉన్న గ్రిల్స్లో ఆయన కాలు ఇరుక్కుపోయింది. దీనితో ఆయన తలకిందులుగా గాలిలో వేలాడుతుండటం గమనించిన స్థానికులు వెంటనే అధికారులకు సమాచారం అందించారు.
సమాచారం అందిన వెంటనే రంగంలోకి దిగిన జహంగీర్పుర, పాలన్పూర్, అదాజన్ స్టేషన్ల అగ్నిమాపక సిబ్బంది యుద్ధ ప్రాతిపదికన సహాయక చర్యలు చేపట్టారు. ప్రమాద తీవ్రతను గమనించిన సిబ్బంది, ముందు జాగ్రత్తగా కింద భారీ సేఫ్టీ నెట్లను ఏర్పాటు చేశారు. అనంతరం 10వ అంతస్తు నుంచి తాళ్ల సహాయంతో కిందకు దిగి, గ్రిల్స్ను కట్టర్లతో తొలగించి ఆయనను సురక్షితంగా రక్షించారు. గంట సేపు సాగిన ఈ ఉత్కంఠభరిత రెస్క్యూ ఆపరేషన్ విజయవంతం కావడంతో అందరూ ఊపిరి పీల్చుకున్నారు. తీవ్ర గాయాలైన నితిన్ను ప్రస్తుతం స్థానిక ఆసుపత్రిలో చేర్చి చికిత్స అందిస్తున్నారు. ప్రాణాలతో బయటపడటం ఒక అద్భుతమని, ఆయన అదృష్టం బాగుందని స్థానికులు కొనియాడుతున్నారు.
