- ఒంటిపై ఉన్నదంతా రోల్డ్ గోల్డే.
- ఐటీ అధికారుల షాకింగ్ వెల్లడి.
- చికెన్ సెంటర్ యజమాని.. కిలోల కొద్దీ రోల్డ్ గోల్డ్ నగలు.
హైదరాబాద్, మహా.
పాతబస్తీ ‘గోల్డ్ మ్యాన్’గా సోషల్ మీడియాలో విపరీతమైన పాపులారిటీ సంపాదించుకున్న సూర్యా భాయ్ అసలు రంగు బయటపడింది. కిలోల కొద్దీ బంగారు ఆభరణాలు ధరించి, హల్చల్ చేసే ఆయన వేసుకున్న నగల్లో మెరిసేదంతా బంగారం కాదని, అదంతా కేవలం ‘రోల్డ్ గోల్డ్’ (ఇమిటేషన్ జ్యువెలరీ) అని ఆదాయపు పన్ను శాఖ అధికారులు ప్రాథమికంగా గుర్తించారు. సోషల్ మీడియాలో ఆయన ధరించే భారీ గొలుసులు, ఉంగరాలు చూసి విస్తుపోయిన అధికారులు.. అంతటి భారీ మొత్తంలో బంగారం కొనేందుకు ఆదాయ వనరులు ఎక్కడివన్న కోణంలో ఆరా తీయగా ఈ ఆసక్తికర విషయాలు వెలుగులోకి వచ్చాయి.
నిత్యం ఒంటిపై భారీ ఆభరణాలతో కనిపిస్తూ నగరంలో ఒక సెలబ్రిటీలా తిరిగే సూర్యా భాయ్ జీవనాధారంపై ఐటీ అధికారులు దృష్టి సారించారు. ఆయన ఏదో పెద్ద బంగారు వ్యాపారి లేదా రియల్ ఎస్టేట్ దిగ్గజం అని భావించిన వారికి, ఆయన వాస్తవానికి ఒక చికెన్ షాప్ నిర్వహిస్తున్నారని తెలిసి ఆశ్చర్యపోయారు. కేవలం పబ్లిసిటీ కోసం, సోషల్ మీడియాలో ఫాలోయింగ్ పెంచుకోవడం కోసమే ఆయన అతి తక్కువ ధరకు దొరికే రోల్డ్ గోల్డ్ నగలను ధరించి, వాటిని అసలు బంగారంలా ప్రపంచానికి నమ్మించారని అధికారులు అనుమానిస్తున్నారు.
గతంలో సూర్యా భాయ్ ఎక్కడకు వెళ్లినా జనం ఆయన చుట్టూ గుమిగూడి సెల్ఫీలు దిగేవారు. కిలోల కొద్దీ బంగారం వేసుకున్న వ్యక్తిని చూసి ఆశ్చర్యపోవడమే కాకుండా, ఆయన భద్రత గురించి కూడా చర్చించుకునేవారు. అయితే, ఐటీ అధికారుల సోదాలు లేదా విచారణ నేపథ్యంలో ఈ ‘బంగారు’ గుట్టు రట్టయినట్లు సమాచారం. ఆయన ధరించిన నగలు అసలు బంగారమైతే వాటి విలువ కోట్లాది రూపాయల్లో ఉంటుందని, ఒక చికెన్ సెంటర్ నిర్వహించే వ్యక్తికి అంతటి నిధులు ఎక్కడివన్న అనుమానమే ఈ తనిఖీలకు దారితీసింది.
