- అమరావతి ఐఆర్ఆర్ కేసు కొట్టివేత.
- సీఎం చంద్రబాబు, లోకేశ్లకు క్లీన్చిట్.
- నిరాధారమైన ఆరోపణలంటూ సీఐడీ క్లోజర్ రిపోర్టుకు ఏసీబీ కోర్టు ఆమోదం.
- ఫిర్యాదుదారు ఆళ్ల రామకృష్ణారెడ్డి పిటిషన్ తిరస్కరణ.
- ముగిసిన రాజధాని సంచలనం.
విజయవాడ, మహా.
రాజధాని అమరావతి ఇన్నర్ రింగ్ రోడ్డు (ఐఆర్ఆర్) అలైన్మెంట్ మార్పుల కేసులో ఆంధ్రప్రదేశ్ ముఖ్యమంత్రి నారా చంద్రబాబు నాయుడుతో పాటు కీలక నేతలకు న్యాయస్థానంలో విజయం లభించింది. గత కొన్నేళ్లుగా రాజకీయంగా, న్యాయపరంగా పెను సంచలనం సృష్టించిన ఈ కేసులో ఎలాంటి ఆధారాలు లేవని తేలుస్తూ విజయవాడ ఏసీబీ కోర్టు బుధవారం చారిత్రాత్మక తీర్పును వెలువరించింది. ఈ కేసులో చంద్రబాబు నాయుడు, మాజీ మంత్రి నారాయణ, మంత్రి నారా లోకేశ్లపై మోపబడిన ఆరోపణలను కొట్టివేస్తూ, విచారణ సంస్థ దాఖలు చేసిన క్లోజర్ రిపోర్టుతో న్యాయస్థానం ఏకీభవించింది. దీంతో ఈ వివాదానికి అధికారికంగా తెరపడినట్లయింది.
గత వైఎస్సార్ కాంగ్రెస్ పార్టీ ప్రభుత్వ హయాంలో అప్పటి మంగళగిరి ఎమ్మెల్యే ఆళ్ల రామకృష్ణారెడ్డి ఫిర్యాదుతో నమోదైన ఈ కేసులో ముఖ్యమంత్రి చంద్రబాబు నాయుడుకు పూర్తిస్థాయిలో ఊరట లభించింది. 2014-19 మధ్యకాలంలో అమరావతి రాజధాని నగర రూపకల్పనలో భాగంగా ఇన్నర్ రింగ్ రోడ్డు అలైన్మెంట్ను తమకు అనుకూలమైన వారికి లబ్ధి చేకూర్చేలా మార్చారనే ఆరోపణలతో అప్పట్లో సీఐడీ కేసు నమోదు చేసింది. సుదీర్ఘ విచారణ అనంతరం, ఈ ఆరోపణలకు సంబంధించి ఎటువంటి ప్రాథమిక ఆధారాలు లభించలేదని దర్యాప్తు సంస్థ సీఐడీ నిర్ధారించింది. ఈ మేరకు ‘మిస్టేక్ ఆఫ్ ఫ్యాక్ట్’ (వాస్తవ దోషం) కింద కేసును మూసివేయాలని కోరుతూ ఏసీబీ కోర్టులో సమర్పించిన నివేదికను న్యాయస్థానం బుధవారం ఆమోదించింది.
ఈ కేసును మూసివేయవద్దని, సీఐడీ నివేదికను తోసిరాజని విచారణ కొనసాగించాలని కోరుతూ ఫిర్యాదుదారు ఆళ్ల రామకృష్ణారెడ్డి దాఖలు చేసిన ప్రొటెస్ట్ పిటిషన్ను న్యాయస్థానం సుదీర్ఘంగా విచారించింది. ఇరుపక్షాల వాదనలను విన్న అనంతరం, పిటిషనర్ అభ్యర్థనలో తగిన కారణాలు లేవని ధర్మాసనం అభిప్రాయపడింది. రాజధాని మాస్టర్ ప్లాన్ రూపకల్పనలో కానీ, అలైన్మెంట్ మార్పులో కానీ నిందితులుగా పేర్కొన్న వారు అక్రమాలకు పాల్పడినట్లు నిరూపించే సాక్ష్యాధారాలను దర్యాప్తు సంస్థ సేకరించలేకపోయిందని కోర్టు స్పష్టం చేసింది. రాజకీయ కారణాలతోనే ఈ కేసును అప్పట్లో నమోదు చేశారన్న వాదనలకు ఈ తీర్పు బలాన్ని చేకూర్చినట్లయింది.
గతంలోనే ఈ కేసు విచారణను సీబీఐకి అప్పగించాలని లేదా చంద్రబాబు బెయిల్ రద్దు చేయాలని కోరుతూ ఆళ్ల రామకృష్ణారెడ్డి హైకోర్టులో పలు పిటిషన్లు దాఖలు చేశారు. అయితే, ఆ పిటిషన్లలో విచారణార్హత లేదని పేర్కొంటూ ఉన్నత న్యాయస్థానం వాటిని ఇప్పటికే కొట్టివేసింది. తాజాగా విచారణ కోర్టు కూడా సీఐడీ క్లోజర్ రిపోర్టును ఆమోదించడంతో చంద్రబాబు, లోకేశ్, నారాయణలకు ఈ కేసు నుంచి శాశ్వత విముక్తి లభించింది. ఈ పరిణామం అధికార పక్ష శ్రేణుల్లో ఉత్సాహాన్ని నింపగా, అమరావతి రాజధాని విషయంలో గత ఐదేళ్లుగా ఎదుర్కొన్న న్యాయపరమైన అడ్డంకులు ఒక్కొక్కటిగా తొలగిపోతున్నాయని రాజకీయ విశ్లేషకులు అభిప్రాయపడుతున్నారు.
