- భారత్కు రష్యా భారీ ఇంధన భరోసా
- హార్ముజ్ జలసంధి మూసివేత, మధ్యప్రాచ్య ఉద్రిక్తతల వేళ అండగా ఉంటామని ప్రకటన.
- చమురు, గ్యాస్, ఎరువుల సరఫరా పెంచేందుకు సిద్ధం.
- ప్రధాని మోదీ, జైశంకర్తో రష్యా ఉప ప్రధాని డెనిస్ మాంటిరోవ్ కీలక భేటీ.
ఢిల్లీ, మహా.
మధ్యప్రాచ్యంలో ఇరాన్, ఇజ్రాయెల్, అమెరికాల మధ్య నెలకొన్న యుద్ధ మేఘాలు అంతర్జాతీయ ఇంధన మార్కెట్ను కుదిపేస్తున్న తరుణంలో, భారత్కు తన చిరకాల మిత్రుడు రష్యా గట్టి భరోసా ఇచ్చింది. అంతర్జాతీయంగా చమురు, సహజవాయువు ధరలు ఆకాశాన్నంటుతున్నా, సరఫరా వ్యవస్థలు అస్తవ్యస్తమవుతున్నా భారత్ మార్కెట్కు అవసరమైనంత చమురు, ఎల్పీజీ గ్యాస్ను అందించేందుకు రష్యా కంపెనీలు సిద్ధంగా ఉన్నాయని స్పష్టం చేసింది. ముఖ్యంగా వ్యూహాత్మక ప్రాధాన్యం ఉన్న హార్ముజ్ జలసంధి మూసివేత వంటి పరిణామాల వల్ల భారత్కు ఎదురయ్యే ఇంధన, ఎరువుల కొరతను అధిగమించేందుకు రష్యా అండగా ఉంటుందని ప్రకటించింది. శుక్రవారం ఢిల్లీ పర్యటనకు వచ్చిన రష్యా ఉప ప్రధాని డెనిస్ మాంటిరోవ్.. ప్రధాని నరేంద్ర మోదీ, విదేశాంగ మంత్రి ఎస్. జైశంకర్లతో విడివిడిగా భేటీ అయ్యారు. ఇంధన భద్రత, ఎరువుల సరఫరా, వాణిజ్యం వంటి కీలక రంగాల్లో పరస్పర సహకారాన్ని మరింత పటిష్టం చేసుకునే దిశగా ఈ సమావేశంలో లోతైన చర్చలు జరిపారు.
గత డిసెంబర్లో రష్యా అధ్యక్షుడు వ్లాదిమిర్ పుతిన్ న్యూఢిల్లీ పర్యటన సందర్భంగా కుదిరిన చారిత్రాత్మక ఒప్పందాలను, శిఖరాగ్ర సమావేశ నిర్ణయాలను క్షేత్రస్థాయిలో వేగంగా అమలు చేసేందుకు ఇరు దేశాలు చిత్తశుద్ధితో పనిచేస్తున్నాయని ప్రధాని మోదీ ఈ సందర్భంగా వ్యాఖ్యానించారు. మాంటిరోవ్తో భేటీ అనంతరం విదేశాంగ మంత్రి జైశంకర్ స్పందిస్తూ.. కేవలం ఇంధన రంగమే కాకుండా పరిశ్రమలు, కనెక్టివిటీ, మొబిలిటీ మరియు వ్యవసాయ రంగాల్లో రష్యాతో భారత్ బంధం కొత్త పుంతలు తొక్కుతోందని ఆశాభావం వ్యక్తం చేశారు. అంతర్జాతీయ రాజకీయ పరిణామాలు ఎలా ఉన్నా, భారత్ అవసరాలను తీర్చడమే తమ ప్రాధాన్యత అని రష్యా ఉప ప్రధాని సామాజిక మాధ్యమాల ద్వారా వెల్లడించారు. అమెరికా గతంలో రష్యా చమురుపై విధించిన ఆంక్షలను ఇటీవల ఎత్తివేసిన తర్వాత, భారత్కు అతిపెద్ద ఇంధన సరఫరాదారుగా రష్యా తన అగ్రస్థానాన్ని మరింత సుస్థిరం చేసుకుంది.
వ్యవసాయ రంగానికి వెన్నెముకగా నిలిచే ఎరువుల విషయంలోనూ రష్యా భారత్కు పెద్దపీట వేస్తోంది. 2025 చివరి నాటికి భారత్కు ఖనిజ ఎరువుల సరఫరాను రష్యా ఏకంగా 40 శాతం పెంచిందని, భవిష్యత్తులో ఈ కోటాను మరింత పెంచేందుకు తమ కంపెనీలు సిద్ధంగా ఉన్నాయని మాంటిరోవ్ వెల్లడించారు. ముఖ్యంగా సామాన్య రైతులకు ఎంతో మేలు చేసే కార్బమైడ్ (యూరియా) ఉత్పత్తి కోసం ఇరు దేశాలు కలిసి ఒక ఉమ్మడి ప్రాజెక్టును అభివృద్ధి చేస్తున్నట్లు ఆయన తెలిపారు. దేశీయంగా ఎరువుల ధరలు పెరగకుండా, కొరత రాకుండా రష్యా అందిస్తున్న ఈ సహకారం భారత్ ఆహార భద్రతకు ఎంతో కీలకం కానుంది. అంతర్జాతీయంగా ఇంధన సంక్షోభం ముంచుకొస్తున్న వేళ, రష్యా నుంచి అందుతున్న ఈ భారీ భరోసా భారత ఆర్థిక వ్యవస్థకు ఊరటనిచ్చే అంశం.
