దేశ రైల్వే పటంలో సగర్వంగా విజయవాడ….

* అత్యంత రద్దీ స్టేషన్ల జాబితాలో ఏడవ స్థానం.

విజయవాడ, మహా.

దక్షిణ భారతదేశ రైల్వే ముఖద్వారంగా విరాజిల్లుతున్న విజయవాడ జంక్షన్ జాతీయ స్థాయిలో అరుదైన ఘనతను సొంతం చేసుకుంది. నిత్యం లక్షలాది మంది ప్రయాణికులతో, వందలాది రైళ్ల రాకపోకలతో కిటకిటలాడే ఈ ప్రధాన కూడలి, భారతదేశంలోనే అత్యంత రద్దీగా ఉండే రైల్వే స్టేషన్ల జాబితాలో ప్రతిష్ఠాత్మక ఏడవ స్థానాన్ని కైవసం చేసుకుని సరికొత్త చరిత్ర సృష్టించింది. 2024-2025 సంవత్సరానికి గాను రైళ్ల ఫ్రీక్వెన్సీ (రాకపోకల సంఖ్య) ఆధారంగా విడుదల చేసిన తాజా జాతీయ నివేదికలో విజయవాడ ఈ విశిష్ట స్థానాన్ని దక్కించుకుంది. ఉత్తర, దక్షిణ భారతదేశాలను అనుసంధానించే అత్యంత కీలకమైన వారధిగా ఉన్న విజయవాడ స్టేషన్, దినదినాభివృద్ధి చెందుతూ దక్షిణ మధ్య రైల్వేకే తలమానికంగా నిలుస్తోందనడానికి ఈ గణాంకాలే సజీవ సాక్ష్యంగా నిలుస్తున్నాయి.

తాజా నివేదికలోని గణాంకాలను లోతుగా పరిశీలిస్తే విజయవాడ జంక్షన్ సాధించిన ఈ ప్రగతి మరింత ఆశ్చర్యం కలిగిస్తుంది. కేవలం పది ప్లాట్‌ఫాంలు మాత్రమే ఉన్న ఈ స్టేషన్ మీదుగా ప్రతిరోజూ సగటున 760 రైళ్ల రాకపోకలు (డైలీ ట్రైన్ మూవ్‌మెంట్స్) సాగుతున్నాయి. అలాగే నిత్యం 360 విభిన్న రైళ్లు ఈ జంక్షన్ ద్వారా ప్రయాణిస్తుండటం ఇక్కడి రద్దీ తీవ్రతకు అద్దం పడుతోంది. దేశవ్యాప్తంగా చూసుకుంటే మహారాష్ట్రలోని ఛత్రపతి శివాజీ మహారాజ్ టెర్మినస్ (సీఎస్ఎంటీ) ముంబై రోజుకు 1,250 రైళ్ల రాకపోకలతో అగ్రస్థానంలో కొనసాగుతుండగా, పశ్చిమ బెంగాల్‌లోని హౌరా జంక్షన్ రెండవ స్థానంలో, దేశ రాజధానిలోని న్యూఢిల్లీ రైల్వే స్టేషన్ మూడవ స్థానంలో నిలిచాయి. ఆ తర్వాతి స్థానాల్లో కళ్యాణ్ జంక్షన్, కాన్పూర్ సెంట్రల్, పాట్నా జంక్షన్ ఉండగా, వెంటనే ఏడవ స్థానంలో విజయవాడ సగర్వంగా నిలవడం గమనార్హం.

ఈ జాతీయ స్థాయి గుర్తింపు కేవలం విజయవాడ నగరానికే కాకుండా, యావత్ ఆంధ్రప్రదేశ్ రాష్ట్రానికే గర్వకారణంగా మారింది. ఎటువైపు నుంచి ఎటు వెళ్లాలన్నా విజయవాడ మీదుగానే ప్రయాణించాల్సిన భౌగోళిక అనుకూలత ఈ స్టేషన్‌ను దేశంలోనే అత్యంత రద్దీ కూడలిగా మార్చింది. సరకు రవాణాకు, ప్యాసింజర్ రైళ్లకు ఇది ప్రధాన కేంద్రంగా సేవలందిస్తూ జాతీయ ఆర్థిక వ్యవస్థలో తనదైన ముద్ర వేస్తోంది. అయితే, పెరుగుతున్న రద్దీకి అనుగుణంగా ప్రయాణికులకు మెరుగైన మౌలిక సదుపాయాలు కల్పించడం, ప్లాట్‌ఫాంల సంఖ్యను పెంచడంపై రైల్వే శాఖ మరింత దృష్టి సారించాల్సిన అవసరం ఉందని ఈ గణాంకాలు స్పష్టం చేస్తున్నాయి. భవిష్యత్తులో నానాటికీ పెరుగుతున్న ప్రయాణికుల రద్దీని తట్టుకునేలా అత్యున్నత ప్రమాణాలతో విజయవాడ స్టేషన్‌ను మరింతగా ఆధునికీకరించాల్సిన ఆవశ్యకతను ఈ సర్వే నొక్కి చెబుతోంది.