* మేడిగడ్డ డ్యామ్ సైట్ కు ముఖ్యమంత్రి.
* అధికారులతో హైలెవల్ రివ్యూ.
* కాళేశ్వర ముక్తేశ్వర స్వామికి ప్రత్యేక పూజలు.
* ఆలయ అభివృద్ధి పనులకు శ్రీకారం.
*సంచలనాలకు కేంద్రంగా కాటారం సభ.
* రెండో విడత ‘రైతు భరోసా’ నిధుల విడుదల.
హైదరాబాద్, మహా.
రాష్ట్ర రాజకీయాల్లో పెను ప్రకంపనలకు కేంద్రబిందువైన జయశంకర్ భూపాలపల్లి జిల్లాలో సోమవారం ముఖ్యమంత్రి రేవంత్ రెడ్డి సుడిగాలి పర్యటన చేయనున్నారు. అనేక కీలక పరిణామాల మధ్య జరుగుతున్న ఈ పర్యటనపై రాష్ట్రవ్యాప్తంగా తీవ్ర ఉత్కంఠ నెలకొంది. మధ్యాహ్నం జిల్లాకు చేరుకోనున్న ముఖ్యమంత్రి, ముందుగా సుప్రసిద్ధ పుణ్యక్షేత్రం శ్రీ కాళేశ్వర ముక్తేశ్వర స్వామి వారిని దర్శించుకుని ప్రత్యేక పూజలు నిర్వహించనున్నారు. అనంతరం, కాళేశ్వరం ఆలయ అభివృద్ధి కోసం అత్యంత ప్రతిష్టాత్మకంగా చేపట్టనున్న పనులకు ఆయన స్వయంగా భూమిపూజ చేసి ఆ కార్యక్రమాలను లాంఛనంగా ప్రారంభించనున్నారు. ఆధ్యాత్మిక కార్యక్రమాల అనంతరం ఆయన నేరుగా రాష్ట్ర రాజకీయాలను కుదిపేస్తున్న కాళేశ్వరం ప్రాజెక్టులోని కీలకమైన మేడిగడ్డ బ్యారేజీ సైట్ కు పయనం కానున్నారు.
మేడిగడ్డ బ్యారేజీ వద్ద ముఖ్యమంత్రి పర్యటన రాజకీయ వర్గాల్లో తీవ్ర ఆసక్తిని రేకెత్తిస్తోంది. గతంలో కుంగిన మేడిగడ్డ డ్యామ్ సైట్ ను ఆయన స్వయంగా క్షేత్రస్థాయిలో నిశితంగా పరిశీలించనున్నారు. అక్కడికక్కడే రాష్ట్ర ఇరిగేషన్ శాఖ ఉన్నతాధికారులతో అత్యంత కీలకమైన సమీక్షా సమావేశం నిర్వహించి, ప్రాజెక్టు ప్రస్తుత స్థితిగతులు, భద్రతా ప్రమాణాలపై ఆరా తీయనున్నారు. ఈ హైలెవల్ రివ్యూ ముగిసిన వెంటనే బ్యారేజీ వద్దే ముఖ్యమంత్రి మీడియాతో ముఖాముఖి మాట్లాడనున్నారు. మేడిగడ్డ డ్యామ్ సైట్ వేదికగా విపక్షాలపై ముఖ్యమంత్రి ఏ విధమైన సంచలన వ్యాఖ్యలు చేయబోతున్నారు, ప్రాజెక్టు భవితవ్యం, విచారణల పురోగతిపై ఎలాంటి కీలక ప్రకటన చేయబోతున్నారన్న దానిపై సర్వత్రా ఉత్కంఠ నెలకొంది.
ప్రాజెక్టు పరిశీలన అనంతరం ముఖ్యమంత్రి రేవంత్ రెడ్డి నేరుగా కాటారం మండలం నస్తురపల్లిలో భారీ ఎత్తున ఏర్పాటు చేసిన బహిరంగ సభకు చేరుకుంటారు. వేలాది మంది ప్రజలు, రైతుల సమక్షంలో సభను ఉద్దేశించి ఆయన ప్రసంగించనున్నారు. ఇదే భారీ బహిరంగ సభ వేదికగా రాష్ట్ర రైతాంగానికి ప్రభుత్వం తరఫున అత్యంత ప్రతిష్టాత్మకమైన ‘రైతు భరోసా’ రెండో విడత నిధులను ముఖ్యమంత్రి లాంఛనంగా విడుదల చేయనున్నారు. అన్నదాతలకు అండగా నిలిచేలా ప్రభుత్వం తీసుకుంటున్న చర్యలను ఆయన ఈ సందర్భంగా ప్రజాక్షేత్రంలో వివరించనున్నారు. ఒకవైపు కాళేశ్వరం ప్రాజెక్టు వైఫల్యాలపై క్షేత్రస్థాయి పరిశీలన, మరోవైపు వ్యవసాయ రంగ అభివృద్ధిపై ప్రభుత్వ నయా కార్యాచరణ.. ఈ రెండు కీలక అంశాల నడుమ సాగుతున్న సీఎం రేవంత్ రెడ్డి తాజా పర్యటన జిల్లా రాజకీయాల్లో తీవ్ర కాక రేపుతోంది.
