సముద్ర వాణిజ్యానికి ‘భారత్’ రక్షా కవచం.
* రూ. 12,980 కోట్ల సార్వభౌమ హామీతో ‘బీఎంఐ పూల్’ ఏర్పాటు.
ఢిల్లీ, మహా.
ప్రపంచవ్యాప్తంగా నెలకొన్న భౌగోళిక రాజకీయ అనిశ్చితి, అస్థిరతల నడుమ భారతీయ సముద్ర వాణిజ్యానికి పటిష్ఠమైన భరోసా కల్పిస్తూ కేంద్ర ప్రభుత్వం చారిత్రాత్మక నిర్ణయం తీసుకుంది. విదేశీ బీమా సంస్థలపై ఆధారపడటాన్ని గణనీయంగా తగ్గిస్తూ, దేశీయంగా ‘భారత్ మారిటైమ్ ఇన్సూరెన్స్ పూల్’ (బీఎంఐ పూల్) ఏర్పాటుకు రూ. 12,980 కోట్ల భారీ సార్వభౌమ హామీతో కేంద్ర మంత్రివర్గం ఆమోదముద్ర వేసింది. ప్రధాన మంత్రి నరేంద్ర మోదీ అధ్యక్షతన జరిగిన కేంద్ర మంత్రివర్గ సమావేశం సముద్ర వాణిజ్యంలో సరికొత్త శకానికి నాంది పలికేలా ‘భారత్ మారిటైమ్ ఇన్సూరెన్స్ పూల్’ (బీఎంఐ పూల్) ఏర్పాటుకు పచ్చజెండా ఊపింది. ప్రపంచవ్యాప్త భౌగోళిక రాజకీయ అనిశ్చితులు, అస్థిర పరిస్థితుల నేపథ్యంలో భారతీయ వాణిజ్యం ఎటువంటి ఆటంకాలు లేకుండా నిరంతరాయంగా సాగాలనే లక్ష్యంతో రూ. 12,980 కోట్ల భారీ సార్వభౌమ హామీతో ఈ స్వదేశీ బీమా పూల్ను కేంద్రం ప్రవేశపెడుతోంది. అంతర్జాతీయ సముద్ర మార్గాల్లో నెలకొన్న అనిశ్చితి వల్ల సరుకు రవాణా నౌకలకు పెరిగిన ముప్పును ఎదుర్కోవడానికి, విదేశీ బీమా సంస్థలపై ఆధారపడటాన్ని గణనీయంగా తగ్గించడానికి ఈ నిర్ణయం అత్యంత కీలకం కానుంది.
ప్రస్తుతం భారతీయ నౌకలు చమురు కాలుష్య బాధ్యతలు, శిథిలాల తొలగింపు, సిబ్బంది గాయాలు వంటి తృతీయ పక్ష బాధ్యతలకు సంబంధించిన పీ-ఐ (ప్రొటెక్షన్ అండ్ ఇండెమ్నిటీ) బీమా కోసం ‘ఇంటర్నేషనల్ గ్రూప్ ఆఫ్ ప్రొటెక్షన్ అండ్ ఇండెమ్నిటీ’ (ఐజీపీ-ఐ) క్లబ్లపైనే ఎక్కువగా ఆధారపడుతున్నాయి. అయితే అంతర్జాతీయ ఆంక్షలు లేదా ఉద్రిక్తతల వల్ల బీమా కవరేజీ నిలిచిపోయే ప్రమాదం ఉన్నందున, దేశ సార్వభౌమాధికారాన్ని కాపాడుకుంటూ వాణిజ్య కార్యకలాపాలను కొనసాగించడానికి ఈ సొంత బీమా పూల్ అవసరమని ప్రభుత్వం భావించింది. ఈ పూల్ ద్వారా హల్, మెషినరీ, కార్గో, పీ-ఐ మరియు యుద్ధ ప్రమాదాల వంటి అన్ని రకాల సముద్రయాన ముప్పులకు సమగ్ర రక్షణ లభిస్తుంది.
భారత జెండా కలిగిన లేదా భారత నియంత్రణలో ఉన్న నౌకలతో పాటు, భారతీయ ఓడరేవుల నుంచి అంతర్జాతీయ గమ్యస్థానాలకు వచ్చి వెళ్లే సరుకు రవాణా నౌకలకు అస్థిరమైన మార్గాల్లో సైతం ఈ పూల్ భరోసా ఇస్తుంది. సముద్ర మార్గాలు ఎంత క్లిష్టంగా ఉన్నప్పటికీ సరసమైన ధరకే బీమా కవరేజీ లభించడం వల్ల వాణిజ్య వ్యయాలు తగ్గే అవకాశం ఉంది. పూల్ సభ్యులుగా ఉండే బీమా సంస్థలు దాదాపు రూ. 950 కోట్ల అండర్ రైటింగ్ సామర్థ్యంతో పాలసీలను జారీ చేస్తాయి. దీని పనితీరును పర్యవేక్షించేందుకు ఒక ప్రత్యేక పాలక మండలిని కూడా ఏర్పాటు చేయనున్నారు.
ఈ చారిత్రాత్మక నిర్ణయం వల్ల దేశీయంగా మెరైన్ అండర్ రైటింగ్, క్లెయిమ్స్ నిర్వహణ మరియు చట్టపరమైన నైపుణ్యాలు పెంపొందుతాయి. భారతీయ షిప్పింగ్ పరిస్థితులకు, స్థానిక నియంత్రణ అవసరాలకు అనుగుణంగా బీమా సేవలను రూపొందించడం దీనివల్ల సులభతరమవుతుంది. వెరసి, సముద్ర వాణిజ్యంలో స్వయం సమృద్ధిని సాధించడం, అంతర్జాతీయ ఆంక్షలను తట్టుకునే సామర్థ్యాన్ని పెంచుకోవడం మరియు మెరుగైన సార్వభౌమ నియంత్రణను నిర్ధారించడమే లక్ష్యంగా ఈ బీఎంఐ పూల్ రూపుదిద్దుకుంది.
