ఉద్యోగుల ‘భరోసా’కు సర్కార్‌ పెద్దపీట….

* జూన్‌ 1కల్లా హెల్త్‌ కార్డులు.
* 100 రోజుల్లో రూ.6 వేల కోట్ల బకాయిల విడుదల.
* ఉద్యోగ ఉపాధ్యాయ సంఘాల ప్రతినిధులతో ముఖ్యమంత్రి రేవంత్‌రెడ్డి.

హైదరాబాద్‌, మహా.
తెలంగాణ రాష్ట్ర సచివాలయంలో ఉద్యోగ ఉపాధ్యాయ సంఘాల ప్రతినిధులతో ముఖ్యమంత్రి రేవంత్‌రెడ్డి నిర్వహించిన సమావేశం రాష్ట్ర ప్రభుత్వ ఉద్యోగుల్లో కొత్త ఆశలు చిగురింపజేసింది. దశాబ్ద కాలంగా పెండింగ్‌లో ఉన్న కీలక సమస్యలపై ముఖ్యమంత్రి అత్యంత సానుకూలంగా స్పందించి, పలు కీలక నిర్ణయాలను ప్రకటించారు. ప్రధానంగా ఉద్యోగుల ఆరోగ్య భద్రతకు సంబంధించి జూన్‌ 1వ తేదీలోగా నూతన హెల్త్‌ కార్డులు పంపిణీ చేయాలని అధికారులను ఆదేశించారు. ఈ గడువులోగా ప్రక్రియ పూర్తి చేసి, ఉద్యోగులకు నగదు రహిత వైద్య సేవలు అందేలా చూడాలని స్పష్టం చేశారు. ఇది కేవలం మాటల ప్రభుత్వం కాదని, చేతల ప్రభుత్వమని నిరూపించే దిశగా తాము అడుగులు వేస్తున్నామని ఆయన ధీమా వ్యక్తం చేశారు.
రిటైర్డ్ ఉద్యోగుల పరిస్థితిని దృష్టిలో ఉంచుకుని వారి బకాయిల చెల్లింపుపై ముఖ్యమంత్రి ఒక భారీ ఆర్థిక ప్యాకేజీని ప్రకటించారు. రాబోయే 100 రోజుల్లో సుమారు రూ. 6,000 కోట్ల నిధులను విడుదల చేసి, రిటైర్మెంట్ బకాయిలన్నింటినీ సర్దుబాటు చేస్తామని హామీ ఇచ్చారు. ఆర్థిక సంక్షోభం ఉన్నప్పటికీ ఉద్యోగుల సంక్షేమం పట్ల తమకు ఉన్న చిత్తశుద్ధిని ఈ నిర్ణయం చాటుతుందని ముఖ్యమంత్రి పేర్కొన్నారు. ప్రభుత్వంపై నమ్మకంతో పనిచేస్తున్న ఉద్యోగులకు ఆర్థిక భరోసా కల్పించడం తమ బాధ్యతని ఆయన వివరించారు. ఈ నిధుల విడుదలతో వేలాది మంది విశ్రాంత ఉద్యోగుల కుటుంబాల్లో వెలుగులు నిండుతాయని ఉద్యోగ సంఘాలు హర్షం వ్యక్తం చేస్తున్నాయి.
మరోవైపు అత్యంత ఆసక్తిగా ఎదురుచూస్తున్న కొత్త వేతన సవరణ (పీఆర్‌సీ) అంశంపై కూడా రేవంత్‌రెడ్డి కీలక ఆదేశాలు జారీ చేశారు. పీఆర్‌సీ నివేదికను తక్షణమే సమర్పించాలని అధికారుల కమిటీని ఆదేశించినట్లు తెలిపారు. అధికారుల కమిటీ ఇచ్చే నివేదిక ఆధారంగా, ఉద్యోగులకు గరిష్ట ప్రయోజనం చేకూరేలా తగిన నిర్ణయం తీసుకుంటామని భరోసా ఇచ్చారు. పీఆర్‌సీ విషయంలో ఎలాంటి జాప్యం జరగకుండా చూడాలని, నివేదిక అందిన వెంటనే తుది నిర్ణయం ప్రకటిస్తామని చెప్పారు. గత పాలనలో పీఆర్‌సీ కోసం ఏళ్ల తరబడి నిరీక్షించాల్సి వచ్చేదని, కానీ తమ ప్రభుత్వం నిర్ణీత కాలపరిమితిలో సమస్యలను పరిష్కరించాలని లక్ష్యంగా పెట్టుకున్నట్లు స్పష్టం చేశారు.
ప్రభుత్వానికి, ఉద్యోగులకు మధ్య నిరంతర సమన్వయం ఉండాలనే ఉద్దేశంతో ఒక సరికొత్త విధానాన్ని ముఖ్యమంత్రి ప్రతిపాదించారు. ప్రతి రెండు నెలలకోసారి గుర్తింపు పొందిన ఉద్యోగ సంఘాలు తమ సమస్యలపై సమగ్ర నివేదికను ప్రభుత్వానికి అందజేయాలని సూచించారు. ఈ నివేదికల ఆధారంగా ఎప్పటికప్పుడు సమీక్షలు నిర్వహించి సమస్యల పరిష్కారానికి చర్యలు తీసుకుంటామన్నారు. తమది పూర్తిగా ‘ఫ్రెండ్లీ గవర్నమెంట్’ అని, ఉద్యోగులు ప్రభుత్వంలో భాగస్వాములని ఆయన కొనియాడారు. సచివాలయం తలుపులు ఎప్పుడూ ఉద్యోగుల కోసం తెరిచే ఉంటాయని, ప్రజా సంక్షేమ పథకాలను ప్రజల్లోకి తీసుకెళ్లడంలో ఉద్యోగుల పాత్ర అత్యంత కీలకమని రేవంత్‌రెడ్డి ఈ సందర్భంగా గుర్తు చేశారు. ఈ సమావేశంలో పలువురు మంత్రులు, ఉన్నతాధికారులు వివిధ సంఘాల నేతలు పాల్గొన్నారు.