స్థిరాస్తుల మార్కెట్ విలువల పెంపునకు సర్కార్ సన్నాహాలు!

స్థిరాస్తుల మార్కెట్ విలువల పెంపునకు సర్కార్ సన్నాహాలు!
* 20 రోజుల్లో కొత్త రేట్ల అమలుకు కసరత్తు.
* ఓఆర్‌ఆర్ పరిధిలో భారీగా పెరగనున్న భూముల ధరలు.
* సగటున 15-20 శాతం పెంపు.
* ప్రభుత్వ ఖజానాకు అదనంగా రూ.2,000 కోట్ల ఆదాయం.
* సామాన్యులపై పెరగనున్న రిజిస్ట్రేషన్ భారం.
హైదరాబాద్, మహా.
తెలంగాణ రాష్ట్రంలో స్థిరాస్తుల మార్కెట్ విలువల పెంపునకు ప్రభుత్వం రంగం సిద్ధం చేసింది. రిజిస్ట్రేషన్ మార్కెట్ విలువలకు, బహిరంగ మార్కెట్ లో అమ్ముడవుతున్న వాస్తవ ధరలకు మధ్య ఉన్న భారీ వ్యత్యాసాన్ని తగ్గించడమే లక్ష్యంగా రెవెన్యూ యంత్రాంగం ఈ నిర్ణయం తీసుకుంది. ముఖ్యంగా హైదరాబాద్ మహానగరం చుట్టూ ఉన్న ఔటర్ రింగు రోడ్డు (ఓఆర్‌ఆర్) పరిధిలో భూముల మార్కెట్ విలువలను సవరించేందుకు ప్రభుత్వం కసరత్తును వేగవంతం చేసింది. రెవెన్యూ శాఖ మంత్రి పొంగులేటి శ్రీనివాస్ రెడ్డి రాబోయే 20 రోజుల్లో కొత్త మార్కెట్ విలువలను అమలు చేస్తామని ప్రకటించడంతో రియల్ ఎస్టేట్ రంగంలో తీవ్ర చర్చ మొదలైంది. ఈ నిర్ణయంతో ప్రభుత్వ ఆదాయం భారీగా పెరగనుండగా, సామాన్య కొనుగోలుదారులపై మాత్రం అదనపు భారం పడటం ఖాయంగా కనిపిస్తోంది.
**ప్రభుత్వ ఆదాయానికి భారీ గండి**
రాష్ట్ర ప్రభుత్వానికి, ప్రత్యేకించి స్టాంపులు మరియు రిజిస్ట్రేషన్ శాఖకు హైదరాబాద్ మెట్రో ప్రాంతమే ప్రధాన ఆదాయ వనరుగా ఉంది. మొత్తం రిజిస్ట్రేషన్ల ద్వారా వచ్చే రాబడిలో సుమారు 60 శాతం కేవలం ఔటర్ రింగ్ రోడ్ పరిధిలోని ప్రాంతాల నుంచే సమకూరుతోంది. అయితే, ప్రభుత్వం నిర్దేశించిన రిజిస్ట్రేషన్ మార్కెట్ విలువలు, బహిరంగ మార్కెట్‌లో వాస్తవంగా జరుగుతున్న క్రయవిక్రయాల ధరల కంటే చాలా తక్కువగా ఉండటం తీవ్ర నష్టానికి దారి తీస్తోంది. ఉదాహరణకు కోకాపేట, నర్సింగి, గచ్చిబౌలి లాంటి హాట్ స్పాట్ ప్రాంతాల్లో ప్రైవేట్ మార్కెట్‌లో ఎకరం భూమి ధర రూ.150 కోట్లకు పైగానే పలుకుతుంటే, రిజిస్ట్రేషన్ వాల్యూ మాత్రం దానికి ఏమాత్రం పొంతన లేకుండా అత్యల్పంగా ఉంటోంది. ఈ వ్యత్యాసం వల్ల ప్రాపర్టీల అండర్ వాల్యుయేషన్ జరిగి ప్రభుత్వ ఖజానాకు పెద్ద ఎత్తున గండిపడుతోందని అధికారులు స్పష్టం చేస్తున్నారు. గతంలో 2022, 2025 సంవత్సరాల్లో మార్కెట్ విలువలను సవరించి కొన్ని హై గ్రోత్ జోన్లలో 30 నుంచి 50 శాతం వరకు పెంచినప్పటికీ, బహిరంగ మార్కెట్ ధరలతో పోలిస్తే ఆ గ్యాప్ ఇంకా భారీగానే కొనసాగుతోంది. ఈ గ్యాప్‌ను భర్తీ చేసేందుకు స్టాంపులు, రిజిస్ట్రేషన్ శాఖ ఇప్పటికే రెండుసార్లు సమగ్ర సర్వేలు నిర్వహించింది. జిల్లా స్థాయిలో ఫీల్డ్ ఇన్‌పుట్స్ తీసుకుని ప్రతిపాదనలు సిద్ధం చేసినప్పటికీ, వరుసగా వచ్చిన ఎన్నికల వల్ల ఆ ప్రక్రియ నిలిచిపోయింది. ఒకట్రెండు రోజుల్లో ప్రభుత్వ ఆర్థిక సలహాదారుతో సమావేశమై పాత డేటాను అవసరమైతే మళ్లీ సవరించాలని అధికారులు నిర్ణయించారు.
**సగటున 15 నుంచి 20 శాతం పెంపు**
రిజిస్ట్రేషన్లు, బహిరంగ మార్కెట్ విలువలను సమన్వయం చేస్తూ ప్రస్తుతం రాష్ట్ర ప్రభుత్వం సగటున 15 నుంచి 20 శాతం వరకు రిజిస్ట్రేషన్ మార్కెట్ విలువలను పెంచే దిశగా కసరత్తు చేస్తోంది. డిమాండ్ ఎక్కువగా ఉన్న కొన్ని ప్రాంతాల్లో ఈ పెంపు 50 శాతం లేదా అంతకంటే ఎక్కువగా కూడా ఉండే అవకాశం ఉందని అధికార వర్గాలు చెబుతున్నాయి. ఇటీవల జరిగిన మంత్రి మండలి సమావేశంలో ఈ అంశంపై కూలంకషంగా చర్చ జరిగినట్లు మంత్రి పొంగులేటి శ్రీనివాస్ రెడ్డి వెల్లడించారు. ఈ నెల 26వ తేదీ తర్వాత ఎప్పుడైనా ఈ కొత్త రిజిస్ట్రేషన్ మార్కెట్ విలువలు అమలులోకి వచ్చే అవకాశాలు మెండుగా ఉన్నాయి.
**కొత్త శోభను సంతరించుకోనున్న ఐటీ, గ్రోత్ కారిడార్లు**
ఈ కొత్త సవరణలతో ఓఆర్‌ఆర్ కారిడార్, జీహెచ్‌ఎంసీ కోర్ ఏరియా, అర్బన్ గ్రోత్ జోన్లలోని ప్రాంతాలు ప్రధానంగా ప్రభావితం కానున్నాయి. వేగంగా అభివృద్ధి చెందుతున్న కొంపల్లి, మేడ్చల్, నర్సింగి, మానికొండ, అదిభట్ల, శంషాబాద్, తుక్కుగూడ, టెల్లాపూర్, అమీన్‌పూర్, బొల్లారం తదితర ప్రాంతాలు ఈ విలువల సవరణలో కీలకంగా మారనున్నాయి. ఐటీ రంగం విస్తరణ, ఫార్మా సిటీ, ఏరోసిటీ ప్రాజెక్టుల రాక, మెట్రో ఎక్స్‌పాన్షన్, రింగ్ రోడ్లు, రేడియల్ రోడ్ల నిర్మాణం వంటి మౌలిక వసతుల అద్భుతమైన అభివృద్ధే ఈ ప్రాంతాల్లో భూముల ధరలు ఆకాశాన్ని తాకడానికి ప్రధాన కారణాలుగా నిలుస్తున్నాయి. తాజా సవరణల ద్వారా ప్రభుత్వానికి సుమారు రూ.2,000 కోట్ల అదనపు ఆదాయం సమకూరుతుందని అధికారులు అంచనా వేస్తున్నారు.
**కొనుగోలుదారులపై భారం.. కార్యాలయాల్లో రద్దీ**
ప్రస్తుతం తెలంగాణలో స్థిరాస్తి రిజిస్ట్రేషన్ మార్కెట్ విలువపై మొత్తం 6 శాతం చార్జీలు అమల్లో ఉన్నాయి. ఇందులో స్టాంప్ డ్యూటీ 4 శాతం, ట్రాన్స్‌ఫర్ డ్యూటీ 1.5 శాతం, రిజిస్ట్రేషన్ ఫీజు 0.5 శాతంగా ఉన్నాయి. రిజిస్ట్రేషన్ మార్కెట్ విలువ పెరిగితే ఈ శాతం మారకపోయినా, ప్రాథమిక విలువ పెరగడం వల్ల కట్టాల్సిన మొత్తం గణనీయంగా పెరుగుతుంది. ఉదాహరణకు, ఇప్పటివరకు రూ.50 లక్షలుగా ఉన్న ఒక ఆస్తి రిజిస్ట్రేషన్ మార్కెట్ విలువ, పెంపు తర్వాత రూ.70 లక్షలకు చేరితే.. రిజిస్ట్రేషన్ ఖర్చు రూ.3 లక్షల నుంచి రూ.4.2 లక్షల వరకు అమాంతం పెరుగుతుంది. దీని ప్రభావం మొదటిసారి ఇళ్లు కొనుగోలు చేసే మధ్యతరగతి వారిపై తీవ్రంగా పడే అవకాశం ఉంది. చిన్న పెట్టుబడిదారులు వెనకడుగు వేసే పరిస్థితి ఏర్పడి, రియల్ ఎస్టేట్ రంగంలో డిమాండ్ తాత్కాలికంగా మందగించవచ్చని నిపుణులు భావిస్తున్నారు. అయితే, లావాదేవీల్లో పారదర్శకత పెరగడం, అండర్ రిజిస్ట్రేషన్ల బెడద తగ్గడం వల్ల దీర్ఘకాలంలో ప్రయోజనం ఉంటుందని అంచనా. కాగా, ధరలు పెరగకముందే పెండింగ్‌లో ఉన్న డీల్స్ ను పూర్తి చేసుకునేందుకు కొనుగోలుదారులు బారులు తీరుతుండటంతో సబ్ రిజిస్ట్రార్ కార్యాలయాలన్నీ రద్దీగా మారుతున్నాయి.