- సీఎం విజయ్ నిర్ణయాలపై ప్రతిపక్షాల ముప్పేట దాడి.
- ఏమో.. రేపు డిప్యూటీ సీఎంగా త్రిషను కూడా చేయొచ్చు!.
- దళపతి విజయ్పై అన్నాడీఎంకే పొలిటికల్ అటాక్.
- 8 కోట్ల మందిలో ఒక్క తమిళుడు దొరకలేదా?.
- సినిమా స్నేహాలకే పదవులంటూ విజయ్పై ప్రతిపక్షాల ఫైర్.
- విజయ్ నియామకాలపై చెలరేగిన పొలిటికల్ దుమారం
చెన్నై, మహా.
తమిళనాడు సెక్రటేరియట్లో ముఖ్యమంత్రి దళపతి విజయ్ పక్కన.. స్టార్ హీరోయిన్ త్రిష డిప్యూటీ సీఎంగా అధికారికంగా కొలువుదీరినా ఆశ్చర్యపోవాల్సిన అవసరం లేదు. ఇప్పుడు తమిళనాడు రాజకీయాల్లో తీవ్ర ప్రకంపనలు సృష్టిస్తున్న మాట ఇది. ముఖ్యమంత్రిగా బాధ్యతలు చేపట్టిన విజయ్ తీసుకుంటున్న నిర్ణయాలు, చేస్తున్న నియామకాలపై ప్రతిపక్షాలు ముప్పేట దాడికి దిగాయి. పాలనలో అనుభవం కంటే, సినీ రంగంలో తనకున్న స్నేహాలు, పరిచయాలకే సీఎం విజయ్ పెద్దపీట వేస్తున్నారంటూ అన్నాడీఎంకే మాజీ మంత్రి ఉదయకుమార్ చేసిన ఈ పొలిటికల్ సెటైర్ ఇప్పుడు స్టేట్ పాలిటిక్స్లో సెన్సేషన్గా మారింది.వివాదానికి అసలు కారణం ఆ నియామకమే
ఈ సరికొత్త పొలిటికల్ డ్రామాకు ముఖ్యమంత్రి విజయ్ తీసుకున్న ఒక కీలక నిర్ణయమే ప్రధాన కారణం. ఇటీవలే ఢిల్లీలో తమిళనాడు ప్రభుత్వం తరఫున ప్రత్యేక ప్రతినిధిగా కన్నడ నాటికి చెందిన ప్రముఖ సినీ నిర్మాత, కేవీఎన్ ప్రొడక్షన్స్ అధినేత వెంకట నారాయణను సీఎం విజయ్ నియమించారు. ఇక్కడే అసలు రాజకీయ వివాదం రాజుకుంది. కేవీఎన్ ప్రొడక్షన్స్ సంస్థ విజయ్ హీరోగా ‘జన నాయగన్’ అనే భారీ చిత్రాన్ని నిర్మించింది. ఆ సినిమా నిర్మించినందుకే, కేవలం ఆ కృతజ్ఞతతో పక్క రాష్ట్ర పౌరుడికి తమిళనాడు తరఫున ఢిల్లీలో అత్యంత కీలకమైన నామినేటెడ్ పోస్ట్ కట్టబెట్టారంటూ ప్రతిపక్షాలు తీవ్ర స్థాయిలో మండిపడుతున్నాయి.ఎనిమిది కోట్ల మందిలో ఒక్క తమిళుడు దొరకలేదా?
ఈ నామినేటెడ్ పోస్ట్ నియామకంపై తమిళ సెంటిమెంట్ రగులుకుంటోంది. దాదాపు 8 కోట్ల జనాభా ఉన్న తమిళనాడులో, ఢిల్లీ స్థాయిలో రాష్ట్రాన్ని ప్రాతినిధ్యం వహించడానికి విద్యావంతులు, రాజకీయ అనుభవజ్ఞులైన ఒక్క తమిళుడు కూడా దొరకలేదా అంటూ ప్రతిపక్షాలు నిలదీస్తున్నాయి. ప్రజల ప్రయోజనాల కంటే తన స్వంత సినిమా వ్యవహారాలు చూసుకున్న వారికే ప్రభుత్వ పదవులు రాసిచ్చేస్తున్నారనే విమర్శలు వెల్లువెత్తుతున్నాయి. ప్రజా సేవకులను కాదని, పక్క రాష్ట్రాలకు చెందిన సినీ వ్యాపారులకు ఎర్ర తివాచీ పరచడంపై స్థానికంగా తీవ్ర అభ్యంతరాలు వ్యక్తమవుతున్నాయి.తెరపైకి త్రిష పేరు తెచ్చిన ఉదయకుమార్
సరిగ్గా ఈ పరిణామాల నేపథ్యంలోనే ముఖ్యమంత్రి విజయ్ పరిపాలనా తీరును ఎండగట్టే క్రమంలో అన్నాడీఎంకే మాజీ మంత్రి ఉదయకుమార్ విమర్శల దాడిని తారాస్థాయికి తీసుకెళ్లారు. విజయ్ క్రేజీ ఆన్స్క్రీన్ కాంబినేషన్ అయిన నటి త్రిష పేరును ఆయన వ్యంగ్యంగా రాజకీయ తెరపైకి తెచ్చారు. సీఎం విజయ్ కేవలం తన స్నేహాలకు, సినీ బాంధవ్యాలకే ప్రభుత్వ ఉద్యోగాలు, పెద్ద పెద్ద పదవులు కట్టబెడుతున్నారని ఆయన ధ్వజమెత్తారు. ప్రభుత్వం అంటే సినిమా షూటింగ్ కాదని, ఇదే పద్ధతి కొనసాగితే రాబోయే రోజుల్లో మేడం త్రిషను ఏకంగా ఉపముఖ్యమంత్రి చేసినా ఆశ్చర్యపోవాల్సిన అవసరం లేదు అంటూ ఉదయకుమార్ వేసిన పొలిటికల్ పంచ్ హాట్ టాపిక్గా మారింది.టీవీకే శ్రేణులకు సరికొత్త సవాల్
ఉదయ్ కుమార్ చేసిన ఈ ‘డిప్యూటీ సీఎం త్రిష’ కామెంట్ ఇప్పుడు తమిళనాట టాక్ ఆఫ్ ది స్టేట్గా మారింది. సోషల్ మీడియాలో సైతం ఈ వ్యాఖ్యలు తీవ్ర దుమారం రేపుతున్నాయి. పరిపాలనను గాడిలో పెట్టాల్సిన ముఖ్యమంత్రి, కేవలం సినిమా కృతజ్ఞతలు తీర్చుకుంటున్నారనే ఆరోపణలు సామాన్య ప్రజల్లో కూడా తీవ్ర చర్చకు దారితీస్తున్నాయి. రాజకీయ ప్రత్యర్థులకు కౌంటర్ ఇవ్వడంలో ముందుండే విజయ్ సొంత పార్టీ టీవీకే శ్రేణులు ఈ విమర్శలను ఎలా తిప్పికొడతాయోనని రాజకీయ విశ్లేషకులు ఆసక్తిగా ఎదురుచూస్తున్నారు. పాలనాపరమైన నిర్ణయాలతో తన సత్తా చాటాలనుకుంటున్న సీఎం విజయ్కు, ప్రతిపక్షాలు విసురుతున్న ఈ సినీ సెటైర్లు ప్రారంభంలోనే ఒక పెద్ద సవాలుగా పరిణమించాయి.
