ఢిల్లీ, మహా .
ఆర్టిఫిషియల్ ఇంటెలిజెన్స్ (ఏఐ) రంగంలో ఆధిపత్యం కోసం జరుగుతున్న పోరులో టెక్ దిగ్గజాల మధ్య కొత్త సవాళ్లు మొదలయ్యాయి. తన అత్యాధునిక ‘జెమినీ’ ఏఐ మోడళ్ల వినియోగంపై సోషల్ మీడియా దిగ్గజం మెటాకు గూగుల్ ఊహించని షాక్ ఇచ్చింది. గూగుల్ క్లౌడ్ సేవలను అత్యధికంగా వినియోగించుకుంటున్న మెటాకు, తమ ఏఐ మోడళ్లను వాడుకునే విషయంలో గూగుల్ కఠినమైన పరిమితులు విధించింది.
కారణం అదేనా?
ప్రధానంగా ఏఐ ప్రాజెక్టుల కోసం మెటా అడిగిన భారీ స్థాయిలో కంప్యూటింగ్ సామర్థ్యాన్ని అందించడంలో గూగుల్ విఫలం కావడమే ఈ సమస్యకు ప్రధాన కారణమని తెలుస్తోంది. ఈ ఏడాది మార్చి నుంచే ఈ పరిమితులు అమల్లోకి వచ్చాయని ఫైనాన్షియల్ టైమ్స్ కథనం పేర్కొంది. గూగుల్ ఏఐ సేవలను అత్యధికంగా వాడే కస్టమర్లలో మెటా ముందు వరుసలో ఉంటుంది. అయితే, మెటా నుంచి వస్తున్న అసాధారణ స్థాయి డిమాండ్ను గూగుల్ తన వద్ద ఉన్న వనరులతో తట్టుకోలేకపోతోంది.
మెటా ప్రాజెక్టులపై ప్రభావం
ఈ కంప్యూటింగ్ సామర్థ్య కొరత వల్ల మెటా చేపట్టిన పలు అంతర్గత ఏఐ ప్రాజెక్టుల పురోగతి కుంటుపడింది. కొన్ని ప్రాజెక్టులు వాయిదా పడగా, మరికొన్నింటికి తీవ్ర అంతరాయం ఏర్పడింది. పరిస్థితిని అర్థం చేసుకున్న మెటా, తమ ఉద్యోగులను అప్రమత్తం చేసింది. ఏఐ వాడకాన్ని కొలిచే ‘ఏఐ టోకెన్ల’ వినియోగాన్ని సాధ్యమైనంత మేరకు తగ్గించుకోవాలని, అందుబాటులో ఉన్న వనరులను అత్యంత సమర్థవంతంగా వినియోగించుకోవాలని యాజమాన్యం సూచించింది. కేవలం మెటాకే కాకుండా, గూగుల్ క్లౌడ్ వాడుతున్న మరికొన్ని కంపెనీలకు కూడా ఇటువంటి పరిమితులే ఎదురవుతున్నప్పటికీ, మెటాపై పడిన ప్రభావం అత్యధికంగా ఉందని నివేదికలు స్పష్టం చేస్తున్నాయి.
మౌలిక వసతుల కొరతే అసలు చిక్కు
ప్రస్తుతం టెక్ కంపెనీలన్నీ ఏఐ సామర్థ్యాలను పెంచుకునేందుకు డేటా సెంటర్లు, అధునాతన చిప్ల కోసం బిలియన్ల డాలర్లు ఖర్చు చేస్తున్నాయి. అయినప్పటికీ, ఏఐ కంప్యూటింగ్ శక్తికి పెరుగుతున్న భారీ డిమాండ్ను అందుకోవడంలో సరఫరా వ్యవస్థ వెనుకబడిపోతోంది. ఈ విషయాన్ని స్వయంగా గూగుల్ సీఈఓ సుందర్ పిచాయ్ సైతం అంగీకరించారు. కంప్యూటింగ్ సామర్థ్య పరిమితుల కారణంగా క్లౌడ్ విభాగంలో వృద్ధి ఆశించిన స్థాయిలో నమోదు కాలేదని, దీనివల్ల క్లౌడ్ విభాగం బ్యాక్లాగ్ గణనీయంగా పెరిగిందని ఆయన వివరించారు.
జనరేటివ్ ఏఐ రంగంలో కంపెనీలు వేగంగా దూసుకుపోతున్న తరుణంలో, అందుకు కావాల్సిన మౌలిక వసతుల కొరత పరిశ్రమకు అతిపెద్ద అవరోధంగా మారుతోంది. ఈ పరిణామం టెక్ ప్రపంచంలో ఏఐ వనరుల కోసం జరుగుతున్న తీవ్రమైన పోటీని, అలాగే సరఫరాకు, డిమాండ్కు మధ్య ఉన్న అంతరాన్ని కళ్లకు కట్టినట్లు చూపిస్తోంది. ఈ సమస్య రాబోయే కాలంలో ఏఐ అభివృద్ధిని ఏ మేరకు ప్రభావితం చేస్తుందో చూడాలి.
