వాషింగ్టన్/టెహ్రాన్,మహా.
మధ్యప్రాచ్య దేశాల్లో మరోసారి యుద్ధ మేఘాలు అలముకున్నాయి. అమెరికా, ఇరాన్ దేశాల మధ్య కుదిరిన తాత్కాలిక సంధి కాలం ముగియడంతో, ఇరు దేశాల మధ్య ఘర్షణలు ఉగ్రరూపం దాల్చాయి. హార్మూజ్ జలసంధి వేదికగా జరిగిన ఘటనలతో ప్రారంభమైన ఈ వివాదం, ఇప్పుడు మిసైల్ దాడుల స్థాయికి చేరుకుంది. దీనిపై అమెరికా అధ్యక్షుడు డొనాల్డ్ ట్రంప్ అత్యంత తీవ్రస్థాయిలో స్పందించారు. “అమెరికా గనుక పూర్తిస్థాయి సైనిక చర్యకు దిగాల్సి వస్తే, ఇస్లామిక్ రిపబ్లిక్ ఆఫ్ ఇరాన్ అనే దేశమే ప్రపంచ పటం నుంచి కనుమరుగవుతుంది” అని ఆయన సోషల్ మీడియా వేదికగా హెచ్చరించారు.
ఘర్షణలకు దారితీసిన నేపథ్యం
వ్యూహాత్మక హార్మూజ్ జలసంధి గుండా సుమారు 20 లక్షల బారేళ్ల ముడి చమురుతో వెళ్తున్న ‘కికు’ అనే వాణిజ్య నౌకపై ఇరాన్ డ్రోన్లతో దాడి చేయడంతో వివాదం భగ్గుమంది. కాల్పుల విరమణ ఒప్పందాన్ని ఇరాన్ ఉల్లంఘించిందని అమెరికా మిలిటరీ సెంట్రల్ కమాండ్ తీవ్రంగా పరిగణించింది. వెంటనే స్పందించిన అమెరికా సేనలు, ఇరాన్ తీరంలోని రాడార్ వ్యవస్థలు, వైమానిక రక్షణ కేంద్రాలు, డ్రోన్ నిల్వ కేంద్రాలను లక్ష్యంగా చేసుకుని భారీ వైమానిక దాడులు నిర్వహించాయి. దీనిపై ట్రంప్ స్పందిస్తూ, చర్చలకు కూడా ఒక హద్దు ఉంటుందని, ఇరాన్ పదేపదే ఒప్పందాలను ఉల్లంఘిస్తూ రెచ్చగొట్టే చర్యలకు పాల్పడుతోందని ఆగ్రహం వ్యక్తం చేశారు.
ప్రతీకార దాడులతో బహ్రెయిన్, కువైట్లో కలకలం
అమెరికా వైమానిక దాడులకు ప్రతీకారంగా ఇరాన్ పారామిలిటరీ ‘రెవల్యూషనరీ గార్డ్’ బలగాలు బహ్రెయిన్, కువైట్లోని అమెరికా సైనిక స్థావరాలను లక్ష్యంగా చేసుకుని బాలిస్టిక్ క్షిపణులు, డ్రోన్లతో విరుచుకుపడ్డాయి. దీంతో ఆయా దేశాల్లో వైమానిక హెచ్చరిక సైరన్లు మోగాయి. బహ్రెయిన్, కువైట్ రక్షణ దళాలు తమ గగనతలంలోకి ప్రవేశించిన ఇరాన్ క్షిపణులను, డ్రోన్లను మార్గమధ్యలోనే కూల్చివేసినట్లు ప్రకటించాయి. ప్రస్తుతానికి ప్రాణ, ఆస్తి నష్టం గురించి ఎటువంటి సమాచారం అందలేదు. అయితే, అమెరికా తన దాడులను ఆపకపోతే, కొనసాగుతున్న రాయబార చర్చలను పూర్తిగా నిలిపివేస్తామని ఇరాన్ హెచ్చరించింది.
ప్రపంచ దేశాల్లో ఆందోళన
ఈ దాడుల నేపథ్యంలో అంతర్జాతీయ చమురు రవాణా మార్గాలపై తీవ్రమైన ఆందోళన నెలకొంది. చమురు ధరలు పెరిగే అవకాశం ఉందని మార్కెట్ విశ్లేషకులు భయపడుతున్నారు. ఇప్పటికే రష్యా-ఉక్రెయిన్ వంటి యుద్ధాల కారణంగా సతమతమవుతున్న ప్రపంచ ఆర్థిక వ్యవస్థకు, ఇప్పుడు మధ్యప్రాచ్యంలో తలెత్తిన ఈ సంక్షోభం మరింత భారాన్ని మోపనుంది. అమెరికా, ఇరాన్ మధ్య దౌత్యపరమైన పరిష్కారం లభించకపోతే, పరిస్థితి మరింత చేయి దాటిపోయే ప్రమాదం ఉందని అంతర్జాతీయ రాజకీయ విశ్లేషకులు హెచ్చరిస్తున్నారు.
