- ముగ్గురు మహిళల సజీవ సమాధి!
- భద్రతను గాలికొదిలేసి దొంగతనం నెపం నెడుతున్న సీసీఎల్ అధికారులు.
జార్ఖండ్‌,మహా.
జార్ఖండ్‌లోని బొకారో జిల్లాలో ఘోర విషాదం చోటుచేసుకుంది. పూట గడిచేందుకు బొగ్గు ఏరుకోవడానికి వెళ్లిన ఆ నిరుపేద మహిళల పాలిట అదే బొగ్గు కుప్ప మృత్యుపాశమైంది. సెంట్రల్ కోల్‌ఫీల్డ్స్ లిమిటెడ్‌ పరిధిలోని కథారా బొగ్గు గని వద్ద గురువారం తెల్లవారుజామున సుమారు 5 గంటల సమయంలో భారీ బొగ్గు కుప్ప ఒక్కసారిగా కుప్పకూలింది. ఈ దారుణ ఘటనలో బొగ్గు ఏరుకుంటున్న కౌశల్యా దేవి, పుష్పా దేవి, సోహ్రీ దేవి అనే ముగ్గురు మహిళలు బొగ్గు కింద నలిగిపోయి ప్రాణాలు కోల్పోగా.. మరో ముగ్గురు తీవ్రంగా గాయపడ్డారు. కథారా పోలీస్ ఔట్‌పోస్ట్ పరిధిలో జరిగిన ఈ ప్రమాద సమాచారం తెలుసుకున్న వెంటనే స్థానికులు పరుగులు తీసి సహాయక చర్యలు చేపట్టి, క్షతగాత్రులను హుటాహుటిన ఆస్పత్రికి తరలించారు.
అయితే, ప్రాణాలు గాల్లో కలిసిపోయిన ఈ విషాద ఘటనపై బొగ్గు గని అధికారుల తీరు తీవ్ర విమర్శల పాలవుతోంది. తమ భద్రతా వైఫల్యాలను కప్పిపుచ్చుకునేందుకు సీసీఎల్ అధికారులు దారుణమైన వాదన తెరపైకి తెచ్చారు. బాధిత మహిళలు బొగ్గు దొంగతనానికి పాల్పడుతున్నారని, అక్రమంగా గని ప్రాంతం నుంచి బొగ్గు తరలిస్తున్న క్రమంలోనే ఈ ప్రమాదం జరిగిందంటూ నెపాన్ని మృతులపైకి నెట్టే ప్రయత్నం చేశారు. కానీ పోలీసులు మాత్రం వాస్తవ పరిస్థితిని కుండబద్దలు కొట్టారు. స్థానిక గ్రామానికి చెందిన మహిళలు కేవలం రోజువారీ అవసరాల కోసం ఆ బొగ్గు కుప్ప వద్ద బొగ్గు సేకరిస్తుండగానే ఒక్కసారిగా అది విరిగిపడిందని బెర్మో సబ్‌డివిజనల్ పోలీస్ అధికారి రవీంద్ర సింగ్ స్పష్టం చేశారు. బొకారో డిప్యూటీ కమిషనర్ అజయ్ నాథ్ ఝా సైతం ఈ ప్రమాదాన్ని ధృవీకరించి, క్షతగాత్రులకు మెరుగైన వైద్యం అందిస్తున్నట్లు వెల్లడించారు.
ఈ హృదయ విదారక ఘటనతో సీసీఎల్ యాజమాన్య భద్రతా ప్రమాణాలపై సర్వత్రా తీవ్ర ఆగ్రహం వ్యక్తమవుతోంది. ఎప్పుడేం జరుగుతుందో తెలియని విధంగా ప్రమాదకరంగా పేరుకుపోయిన బొగ్గు నిల్వల వద్ద కనీస సెక్యూరిటీ ఎందుకు లేదన్నది ఇప్పుడు ప్రధాన ప్రశ్నగా మారింది. పేద మహిళలు తెల్లవారుజామునే గని ప్రాంతాలకు వెళ్లి ప్రాణాలకు తెగించి బొగ్గు ఏరుకోవాల్సిన దుస్థితి స్థానిక దయనీయ జీవన పరిస్థితులకు అద్దం పడుతోంది. హెచ్చరిక బోర్డులు, కాపలా లేకుండా గనులను గాలికొదిలేసిన అధికారులు.. ప్రమాదం జరగ్గానే దొంగతనం అంటూ నిందలు వేయడంపై స్థానికులు మండిపడుతున్నారు. మృతుల కుటుంబాల్లో తీవ్ర విషాదం అలుముకున్న వేళ.. ఈ దారుణంపై సమగ్ర విచారణ జరిపి బాధిత కుటుంబాలకు న్యాయం చేయాలని స్థానికులు డిమాండ్ చేస్తున్నారు.
