* వడదెబ్బకు ఏడుగురు బలి.
* కన్నీరు మున్నీరవుతున్న కుటుంబాలు.
హైదరాబాద్, మహా.
రాష్ట్రంలో భానుడు రోజురోజుకూ తన ప్రతాపాన్ని చూపిస్తూ భగభగమంటున్నాడు. నిప్పుల కొలిమిని తలపిస్తున్న ఎండలకు తోడు వడగాల్పులు తోడవ్వడంతో జనం బయటకు రావాలంటేనే వణికిపోతున్నారు. ఉదయం పది గంటల నుంచే సూర్యుడు సెగలు కక్కుతుండటంతో జనజీవనం పూర్తిగా స్తంభించిపోతోంది. కొద్దిసేపు బయటకు వెళ్లాలంటేనే భయపడాల్సిన ఈ పరిస్థితుల్లో, సామాన్యుడి బతుకు బండి ముందుకు సాగడం కష్టతరంగా మారింది. ఆకాశం నుంచి నిప్పులు కురుస్తున్నట్లుగా ఉన్న ఈ వాతావరణం, ముఖ్యంగా వృద్ధులు మరియు శ్రమజీవుల పాలిట శాపంగా మారుతోంది. గురువారం ఒక్కరోజే రాష్ట్రవ్యాప్తంగా వేర్వేరు ప్రాంతాలలో ఏడుగురు వడదెబ్బ బారినపడి మృత్యువాత పడటం కలకలం రేపుతోంది. మృతుల్లో అధిక శాతం పొట్టకూటి కోసం ఎండలో కష్టపడే కూలీలే ఉండటం ఆవేదన కలిగిస్తోంది. ఖమ్మం, మహబూబాబాద్, భద్రాద్రి కొత్తగూడెం, నల్గొండ, హనుమకొండ, జగిత్యాల , మేడ్చల్ జిల్లాల్లో ఈ విషాద ఛాయలు అలుముకున్నాయి.
ఖమ్మం జిల్లా వైరా మండలం గరికపాడు గ్రామంలో ఒక విషాదకర సంఘటన చోటుచేసుకుంది. సుంకర వెంకటేశ్వర్లు అనే 70 ఏళ్ల వృద్ధుడు ఉపాధి పనుల కోసం వెళ్తుండగా మార్గం మధ్యలోనే ఎండ తీవ్రతకు తాళలేక ఒక్కసారిగా కుప్పకూలిపోయారు. వయసు భారానికి తోడు తీక్షణమైన సూర్యరశ్మి తోడవ్వడంతో ఆయన అక్కడికక్కడే ఊపిరి వదిలారు.
మహబూబాబాద్ జిల్లా గూడూరు మండలం బొద్దుగొండ గ్రామానికి చెందిన పుల్సం ఎల్లమ్మ (48) ఉదయాన్నే మిరప తోటలో కూలీ పనులకు వెళ్లారు. మండుతున్న ఎండలో పని చేస్తూ ఆమె ఒక్కసారిగా వాంతులకు గురయ్యారు. తోటి కూలీలు ఆమెను వెంటనే ఆసుపత్రికి తరలించినప్పటికీ, అప్పటికే ఆమె మృతి చెందినట్లు వైద్యులు ధృవీకరించారు. నిరుపేద కుటుంబానికి అండగా ఉండాల్సిన మహిళ ఇలా వడదెబ్బకు బలికావడం ఆ గ్రామంలో అందరినీ కలిచివేసింది.
భద్రాద్రి కొత్తగూడెం జిల్లా పినపాక మండలం పోతురెడ్డిపల్లికి చెందిన వెంకటేశ్వర్లు (51) తన గేదెలను మేపడానికి పంట పొలాల్లోకి వెళ్లారు. రోజంతా ఎండలో తిరగడంతో ఆయన శరీరం తీవ్రమైన ఉష్ణోగ్రతకు గురైంది. సాయంత్రం సురక్షితంగా ఇంటికి చేరుకున్నప్పటికీ, అప్పటికే వడదెబ్బ ప్రభావం ఆయనపై బలంగా పడింది. ఇంట్లోకి అడుగుపెట్టిన కొద్దిసేపటికే ఆయన ఒక్కసారిగా కుప్పకూలి అక్కడికక్కడే మృతి చెందారు. నల్గొండ జిల్లా మిర్యాలగూడ మండలం కాల్వపల్లిలో నేరెళ్ల లక్ష్మయ్య (50) వడదెబ్బతో ప్రాణాలు కోల్పోగా, హనుమకొండ జిల్లా కాజీపేట మండలం తరాలపల్లిలో 75 ఏళ్ల వూరుగొండ లచ్చమ్మ తెల్లవారేసరికి కుప్పకూలి మృతి చెందారు. మరోవైపు జగిత్యాల జిల్లా ధర్మపురిలో ఆంధ్రప్రదేశ్కు చెందిన 28 ఏళ్ల యువకుడు యోహన్ ఎలియాస్ మహేష్ వడదెబ్బతో ఒక చెట్టు కింద మృతి చెంది ఉండటం గమనార్హం. మేడ్చల్-మల్కాజిగిరి జిల్లా ఘట్కేసర్ పోలీస్ స్టేషన్ పరిధిలోని లాల్బహదూర్ స్మారక యువజన సంఘం భవనం వద్ద ఒక గుర్తు తెలియని వ్యక్తి (55) వడదెబ్బతో కుప్పకూలి ప్రాణాలు విడిచారు.
