*‘మీ టికెట్’తో తెలంగాణలో డిజిటల్ విప్లవం.
హైదరాబాద్, మహా.
ప్రజా రవాణా మరియు పర్యాటక రంగాల్లో అత్యాధునిక సాంకేతికతను జోడిస్తూ తెలంగాణ ప్రభుత్వం ప్రతిష్ఠాత్మకంగా తీసుకువచ్చిన ‘మీ టికెట్’ మొబైల్ అప్లికేషన్ రాష్ట్రంలో కొత్త డిజిటల్ ఒరవడిని సృష్టిస్తోంది. “ఒకే ఒక్క యాప్.. అన్ని రకాల టికెట్లు” అనే నినాదంతో ఐటీ శాఖ, మీసేవ ఆధ్వర్యంలో రూపొందించిన ఈ అప్లికేషన్ పౌరుల ప్రయాణ అవసరాలను తీర్చడమే కాకుండా, వినోద పర్యటనలను కూడా అత్యంత సులభతరం చేస్తోంది. రవాణా శాఖ మంత్రి పొన్నం ప్రభాకర్ ప్రారంభించిన ఈ యాప్, అతి స్వల్ప కాలంలోనే ప్రజల నుంచి అద్భుతమైన స్పందనను మూటగట్టుకుంది. ఇప్పటివరకు సుమారు 2.5 లక్షల మందికి పైగా దీనిని డౌన్లోడ్ చేసుకోగా, ఆరు లక్షలకు పైగా సేవల బుకింగ్స్ జరగడం దీని విజయానికి నిదర్శనంగా నిలుస్తోంది. రూ. 4 కోట్లకు పైగా లావాదేవీలు ఈ ప్లాట్ఫామ్ ద్వారా జరగడం విశేషం.
ఈ స్మార్ట్ యాప్ కేవలం బస్సు టికెట్లకే పరిమితం కాకుండా, మెట్రో రైలు సేవలు, దేవాలయాల దర్శన టికెట్లు, పార్కులు, మ్యూజియంలు, ఫారెస్ట్ సఫారీలు వంటి దాదాపు 219 ప్రాంతాల ప్రవేశ టికెట్లను ఇంటి నుంచే బుక్ చేసుకునే వెసులుబాటు కల్పిస్తోంది. ముఖ్యంగా వేసవి సెలవుల దృష్ట్యా పర్యాటక ప్రాంతాల వద్ద గంటల తరబడి క్యూలైన్లలో వేచి ఉండే ఇబ్బందులను ఇది దూరం చేసింది. గోల్కొండ కోట వంటి చారిత్రక కట్టడాల నుంచి జూ పార్కులు, సైన్స్ మ్యూజియంల వరకు అన్నింటికీ మొబైల్ ద్వారానే ఈ-టికెట్లు పొందే అవకాశం కలగడం ప్రయాణికులకు పెద్ద ఊరటగా మారింది. దీనితో పాటు ఎలక్ట్రిక్ వాహనదారుల కోసం సమీపంలోని ఈవీ ఛార్జింగ్ స్టేషన్లను గుర్తించే ఫీచర్ను కూడా ఇందులో చేర్చడం ద్వారా ప్రభుత్వం దీనిని ఒక మల్టీ-సర్వీస్ ప్లాట్ఫామ్గా తీర్చిదిద్దింది.
ఆర్టీసీ ప్రయాణికుల కోసం ఈ యాప్లో తీసుకువచ్చిన డిజిటల్ బస్ పాస్ సదుపాయం ఒక చారిత్రక ముందడుగు. నగర ప్రయాణికులు తమ పాస్ల కోసం ఇకపై డిపోల వద్ద వేచి ఉండాల్సిన అవసరం లేకుండా, కేవలం రెండు నిమిషాల్లోనే అప్లికేషన్ ద్వారా పాస్ను పొందవచ్చు లేదా పాత పాస్ను రీన్యువల్ చేసుకోవచ్చు. ఈ డిజిటల్ పాస్లలో డైనమిక్ క్యూఆర్ కోడ్, స్క్రీన్షాట్ ప్రొటెక్షన్ మరియు లైవ్ వాలిడిటీ ఇండికేటర్ వంటి భద్రతా ఫీచర్లు ఉన్నాయి. దీనివల్ల పాస్ల దుర్వినియోగాన్ని అరికట్టడంతో పాటు, కండక్టర్లు స్మార్ట్గా ధ్రువీకరించుకోవడానికి వీలు కలుగుతుంది. ఐటీ మరియు పరిశ్రమల శాఖ మంత్రి దుద్దిళ్ల శ్రీధర్ బాబు పేర్కొన్నట్లుగా, భవిష్యత్తులో ఈ యాప్ పరిధిని మరింత విస్తరించి, మరిన్ని ప్రభుత్వ సేవలను ఒకే గొడుగు కిందకు తీసుకురావాలని ప్రభుత్వం భావిస్తోంది. డిజిటల్ పరిపాలనలో తెలంగాణ మరో మైలురాయిని అధిగమించినట్లయింది.
