* విదేశీ స్మగ్లర్ల కోసం డిటెన్షన్ సెంటర్లు సిద్ధం.
*జైలు నుంచి నేరుగా నిర్బంధ కేంద్రానికే.
* ఎంఆర్వో అస్త్రంతో విదేశీ నేరస్థులకు చెక్.
* సిగ్నల్, సెషన్ యాప్ల ద్వారా సాగుతున్న చీకటి వ్యాపారంపై నిఘా.
హైదరాబాద్, మహా.
రాష్ట్రంలో మాదకద్రవ్యాల మహమ్మారిని తరిమికొట్టేందుకు తెలంగాణ ఈగల్ పోలీసులు అత్యంత కఠినమైన చర్యలు చేపడుతున్నారు. ముఖ్యంగా డ్రగ్స్ దందాలో పట్టుబడి, జైలు శిక్ష అనుభవించి విడుదలవుతున్న విదేశీ నేరస్థులపై పోలీసులు ప్రత్యేక నిఘా ఏర్పాటు చేశారు. మత్తుపదార్థాల కేసుల్లో చిక్కుకున్న విదేశీయులు జైలు నుంచి బయటకు వచ్చిన వెంటనే మళ్లీ తమ పాత దందాను కొనసాగించకుండా ఉండేలా ముందస్తు చర్యలు తీసుకుంటున్నారు. ఇందులో భాగంగా వారు జైలు నుంచి విడుదలైన క్షణమే అదుపులోకి తీసుకుని, ప్రత్యేకంగా ఏర్పాటు చేసిన డిటెన్షన్ సెంటర్లకు (నిర్బంధ కేంద్రాలు) తరలిస్తున్నారు. ఈ విధానం వల్ల నేరస్థుల తదుపరి కదలికలను పూర్తిగా నియంత్రించడమే కాకుండా, వారు మళ్లీ నేరాల బాట పట్టకుండా అడ్డుకోగలుగుతున్నారు.
**ఎంఆర్వో అస్త్రంతో నేరస్థులకు కళ్లెం**
విదేశీ నేరస్థులను నియంత్రించేందుకు పోలీసులు ‘మూవ్మెంట్ రిస్ట్రిక్షన్ ఆర్డర్’ (ఎంఆర్వో) అనే శక్తివంతమైన అస్త్రాన్ని ప్రయోగిస్తున్నారు. తొలుత సదరు నేరస్థుడి నేర చరిత్రపై పూర్తిస్థాయి నివేదికను రూపొందించి, దానిని ఫారినర్స్ రీజినల్ రిజిస్ట్రేషన్ ఆఫీసర్కు (ఎఫ్ఆర్ఆర్వో) అందజేస్తారు. ఈ నివేదిక ఆధారంగా ఎఫ్ఆర్ఆర్వో ఎంఆర్వో ఉత్తర్వులను జారీ చేస్తుంది. ఈ ఉత్తర్వులు ఉండటం వల్ల నేరస్థుడు జైలు నుంచి విడుదలైన వెంటనే పోలీసులు వారిని పట్టుకుని నిర్బంధ కేంద్రాలకు తరలించే చట్టబద్ధమైన అధికారం లభిస్తుంది. ప్రస్తుతం ఈగల్ పోలీసు బృందాలు ఇప్పటికే పలువురిని నిర్బంధించగా, మరో 20 మందికి పైగా స్మగ్లర్లను ఇదే తరహాలో నిర్బంధ కేంద్రాలకు తరలించేందుకు ప్రణాళికలు సిద్ధం చేశాయి.
**చట్టంలోని లొసుగుల దుర్వినియోగం**
కొంతమంది విదేశీ నేరస్థులు చట్టంలోని సాంకేతిక అంశాలను ఆసరాగా చేసుకుని కుయుక్తులు పన్నుతున్నట్లు పోలీసు దర్యాప్తులో తేలింది. వీసా గడువు ముగిసిన విదేశీయులను పోలీసులు సాధారణంగా స్వదేశానికి పంపిస్తుంటారు (డిపోర్టేషన్). అయితే, తమను దేశం నుంచి పంపించి వేయకుండా ఉండేందుకు వీరు కావాలనే చిన్నపాటి డ్రగ్స్ కేసులు లేదా ఇతర నేరాల్లో చిక్కి జైలుకు వెళ్తున్నారు. న్యాయస్థానంలో విచారణ పెండింగ్లో ఉన్నప్పుడు డిపోర్టేషన్ చేయడం సాధ్యం కాదనే లొసుగును వీరు వాడుకుంటున్నారు. ఇలా జైలుకు వెళ్లి, ఆ తర్వాత బెయిలుపై బయటకు వచ్చి మళ్లీ మత్తు దందాను యథేచ్ఛగా కొనసాగిస్తున్నారు. ఈ తరహా పన్నాగాన్ని పసిగట్టిన ఈగల్ పోలీసులు ఇప్పుడు వారిని నేరుగా డిటెన్షన్ సెంటర్లకు పంపడం ద్వారా ఆ ముఠాల ఆశలపై నీళ్లు చల్లుతున్నారు.
**తీరప్రాంతం దాటి దేశంలోకి చొరబాటు**
మత్తుపదార్థాల దందా కోసం ప్రధానంగా నైజీరియా, ఘనా, సూడాన్ వంటి ఆఫ్రికా దేశాల నుంచి వస్తున్న వారు దేశంలోని వివిధ ప్రాంతాల్లో తిష్ఠ వేస్తున్నారు. సాధారణంగా విదేశీయులు భారత్కు వచ్చినప్పుడు వారి వివరాలను ఎఫ్ఆర్ఆర్వో కార్యాలయంలో నమోదు చేయాల్సి ఉంటుంది. హైదరాబాద్కు వచ్చే వారు శంషాబాద్లోని కార్యాలయంలో రిజిస్టర్ చేసుకుంటారు. అయితే, వీసా గడువు ముగిసిన తర్వాత వీరు నమోదు చేసిన చిరునామాలో ఉండకుండా, మారుమూల ప్రాంతాల్లో ఉంటూ తమ కార్యకలాపాలను సాగిస్తున్నారు. దర్యాప్తు సంస్థల కళ్లుగప్పి మత్తు పదార్థాలను సరఫరా చేస్తున్న ఇలాంటి వారిని పట్టుకోవడం పోలీసులకు సవాలుగా మారింది. ముఖ్యంగా బంజారాహిల్స్, మాదాపూర్ వంటి ప్రాంతాల్లో ఇలాంటి ముఠాల కదలికలు ఎక్కువగా ఉన్నట్లు గుర్తించారు.
**టెక్నాలజీ మాటున చీకటి వ్యాపారం**
పోలీసు నిఘా పెరగడంతో డ్రగ్స్ ముఠాలు తమ వ్యాపార శైలిని పూర్తిగా మార్చేశాయి. గతంలో వాట్సాప్, ఫేస్బుక్ ద్వారా లావాదేవీలు నిర్వహించి పట్టుబడటంతో, ఇప్పుడు సిగ్నల్ మరియు సెషన్ వంటి అత్యంత గోప్యత కలిగిన యాప్లను వేదికగా చేసుకుంటున్నారు. వీటిలో జరిగే సంభాషణలను పసిగట్టడం పోలీసులకు క్లిష్టంగా మారుతోంది. గతంలో వినియోగదారులకు నేరుగా లేదా ఏజెంట్ల ద్వారా సరుకు అందించే ‘డెడ్ డ్రాప్’ పద్ధతిని వాడేవారు. కానీ ఇప్పుడు అంతర్జాతీయ స్థాయిలో ఉండే డ్రగ్ నెట్వర్క్ల సహాయంతో ప్రత్యేక యాప్లను రూపొందించుకుని స్మగ్లింగ్ సాగిస్తున్నారు. నగరంలో పట్టుబడిన మత్తుబాబుల మొబైల్ ఫోన్లను విశ్లేషించినప్పుడు 90 శాతం సింథటిక్ డ్రగ్స్ మరియు గంజాయి సరఫరా అంతా ఈ యాప్ల ద్వారానే జరుగుతున్నట్లు వెల్లడైంది.
భక్తిపారవశ్యంలో విజయవాడ….
Editor
