* నకిలీ విక్రేతలపై ‘జీరో టాలరెన్స్’.
* హెచ్టీ పత్తి విత్తనాలపై నిషేధం.
* సాగు సలహాల కోసం వినూత్న సాంకేతికత.
* అధికారులకు మంత్రి తుమ్మల కీలక ఆదేశాలు.
హైదరాబాద్, మహా
సచివాలయంలో వ్యవసాయ శాఖ, సీడ్ డెవలప్మెంట్ కార్పొరేషన్ మరియు వివిధ విత్తన కంపెనీ ప్రతినిధులతో మంత్రి తుమ్మల నాగేశ్వరరావు ఉన్నత స్థాయి సమీక్ష నిర్వహించారు. వానాకాలం 2026 సాగుకు ముందే రైతులకు అవసరమైన విత్తనాలను సిద్ధం చేయాలని అధికారులను ఆదేశించారు. రైతులకు కేవలం నాణ్యమైన, అధిక దిగుబడి ఇచ్చే విత్తనాలు మాత్రమే అందేలా చూడాలని, విత్తనాల లభ్యత విషయంలో ఎటువంటి కొరత రాకుండా కంపెనీల వారీగా ప్రణాళికలు రూపొందించాలని స్పష్టం చేశారు. ఈ సమీక్షలో విత్తన నిల్వలు, నాణ్యత పరీక్షలు మరియు నకిలీ విత్తనాల నియంత్రణ వంటి అంశాలపై సుదీర్ఘంగా చర్చించారు.
**అవసరానికి మించి విత్తన నిల్వలు**
రాష్ట్రంలో రాబోయే ఖరీఫ్ సీజన్లో సుమారు 134.66 లక్షల ఎకరాల్లో సాగు జరిగే అవకాశం ఉందని అంచనా వేయగా, ఇందుకు 19.42 లక్షల క్వింటాళ్ల విత్తనాలు అవసరమవుతాయని అధికారులు వివరించారు. దీనికి విరుద్ధంగా ప్రస్తుతం రాష్ట్రంలో 38.21 లక్షల క్వింటాళ్ల విత్తనాలు అందుబాటులో ఉన్నాయని, ఇది రైతుల అవసరానికి దాదాపు రెండింతలు అని మంత్రి తుమ్మల వెల్లడించారు. ముఖ్యంగా పత్తి సాగుకు అవసరమైన 104 లక్షల ప్యాకెట్లకు బదులుగా 212.11 లక్షల ప్యాకెట్లు అందుబాటులో ఉన్నాయని పేర్కొన్నారు. ఈ నిల్వలు రైతులకు సాగుపై పూర్తి విశ్వాసాన్ని కలిగిస్తాయని మంత్రి ఆశాభావం వ్యక్తం చేశారు.
**నకిలీ విత్తనాలపై ఉక్కుపాదం**
నకిలీ విత్తనాల విక్రయాలను అరికట్టేందుకు పోలీస్ శాఖతో సమన్వయం చేసుకుని కట్టుదిట్టమైన చర్యలు తీసుకోవాలని అధికారులకు మంత్రి దిశానిర్దేశం చేశారు. జిల్లా నుండి మండల స్థాయి వరకు ప్రత్యేక టాస్క్ఫోర్స్ బృందాలను ఏర్పాటు చేసి, అక్రమ నిల్వలు మరియు రవాణాపై నిరంతర నిఘా ఉంచాలని సూచించారు. ముఖ్యంగా నిషేధిత హెచ్టీ పత్తి విత్తనాలు రాష్ట్రంలోకి రాకుండా సరిహద్దుల్లో కఠిన భద్రత ఏర్పాటు చేయాలని ఆదేశించారు. నాణ్యత లేని విత్తనాల వల్ల రైతులకు నష్టం కలిగితే ఆ భారాన్ని సంబంధిత కంపెనీలే భరించాలని, నిబంధనలు ఉల్లంఘించే వారి లైసెన్సులు రద్దు చేయాలని హెచ్చరించారు.
**మార్కెటింగ్ వ్యవస్థలో సంస్కరణలు**
విత్తనాల సరఫరా మరియు అమ్మకాల ప్రక్రియలో పారదర్శకత పెంచేందుకు కో-మార్కెటింగ్ విధానంపై మంత్రి తుమ్మల తీవ్రంగా స్పందించారు. ఈ విధానం వల్ల ఏ కంపెనీ విత్తనాన్ని ఎవరు అమ్ముతున్నారో తెలియక రైతులు మభ్యపడుతున్నారని, అవసరమైతే కో-మార్కెటింగ్ విధానాన్ని పూర్తిగా రద్దు చేసే అవకాశాలను పరిశీలించాలని అధికారులను ఆదేశించారు. ప్రతి నెలాఖరులో కంపెనీలు తమ స్టాక్ వివరాలను ప్రభుత్వానికి తప్పనిసరిగా అందజేయాలని సూచించారు. సీడ్ టెస్టింగ్ ల్యాబ్ల ద్వారా విత్తనాల నాణ్యతను నిరంతరం పర్యవేక్షించాలని, రైతులకు నాణ్యమైన సేవలు అందించడంలో రాజీ పడకూడదని స్పష్టం చేశారు.
**మే 15 నుండి విత్తనాల పంపిణీ**
వానాకాలం సాగుకు కావలసిన విత్తనాల స్టాక్ను మే 15 నుండి రైతులకు అందుబాటులో ఉంచాలని విత్తన కంపెనీలను మంత్రి ఆదేశించారు. వరి సన్నరకాల ఎంపికలో అంతర్జాతీయ ఎగుమతి ప్రమాణాలు పాటించాలని, మిల్లర్లు మరియు వినియోగదారుల అభిప్రాయాలను పరిగణనలోకి తీసుకోవాలని సూచించారు. మట్టి సారాన్ని పెంచే పచ్చిరొట్ట విత్తనాల పంపిణీ కోసం ప్రభుత్వం 134 కోట్ల రూపాయలు వ్యయం చేస్తోందని వెల్లడించారు. రైతులకు అవగాహన కార్యక్రమాలు నిర్వహిస్తూ, సరైన సమయంలో విత్తనాలు అందేలా చూడటం ద్వారా వ్యవసాయ రంగాన్ని బలోపేతం చేయడమే ప్రభుత్వ లక్ష్యమని పేర్కొన్నారు.
**సాగులో సాంకేతికతకు పెద్దపీట**
డెవలప్మెంట్ ఇన్నోవేషన్ ల్యాబ్ ప్రతినిధులతో భేటీ అయిన మంత్రి తుమ్మల, రైతులకు వాతావరణ హెచ్చరికలు అందించే అంశంపై చర్చించారు. వర్షపాతం, వాతావరణ పరిస్థితుల వివరాలను ఎస్ఎమ్ఎస్ మరియు వాట్సాప్ ద్వారా సాగుకు ముందే రైతులకు చేరవేయడం వల్ల పంట నష్టాన్ని తగ్గించవచ్చని అభిప్రాయపడ్డారు. ఈ విధానం ద్వారా రైతులు నాట్లు వేయాల్సిన సమయం మరియు పంట కోతల సమయాన్ని పక్కాగా నిర్ణయించుకోగలరని ప్రతినిధులు వివరించారు. ఈ ప్రాజెక్టును తెలంగాణలో సమర్థవంతంగా అమలు చేసేందుకు ఉన్న అవకాశాలను పరిశీలించి నివేదిక ఇవ్వాలని వ్యవసాయ శాఖ డైరెక్టర్ను మంత్రి ఆదేశించారు.
