ప్రభుత్వ సలహాదారుగా కాంగ్రెస్‌ ‘దిగ్గజం’ వీహెచ్‌…

*రాష్ట్ర మంత్రి హోదా.. సముచిత ప్రొటోకాల్‌.
* అధికారికంగా ఉత్తర్వులు జారీ చేసిన సర్కార్.

హైదరాబాద్‌, మహా.

రాష్ట్రంలోని వెనుకబడిన తరగతుల సంక్షేమం, అభివృద్ధిని మరింత పరుగులు పెట్టించే లక్ష్యంతో తెలంగాణ ప్రభుత్వం కీలక నిర్ణయం తీసుకుంది. కాంగ్రెస్ పార్టీ సీనియర్ నాయకులు, మాజీ ఎంపీ వి. హన్మంతరావును బీసీ సంక్షేమ మరియు అభివృద్ధి విభాగంలో ప్రభుత్వ సలహాదారుగా నియమిస్తూ సంచలన ఉత్తర్వులు జారీ చేసింది. రాజకీయాల్లో దశాబ్దాల అనుభవం, బీసీ సామాజిక వర్గాల సమస్యలపై నిరంతర పోరాటం చేస్తున్న వీహెచ్‌కు ప్రభుత్వం ఈ బాధ్యతలు అప్పగించడం పట్ల సర్వత్రా హర్షం వ్యక్తమవుతోంది. ఈ మేరకు ప్రభుత్వ ప్రధాన కార్యదర్శి కె. రామకృష్ణారావు గవర్నర్ పేరిట బుధవారం జీఓ ఎంఎస్ నంబర్ 560ని విడుదల చేశారు. రాష్ట్ర అభివృద్ధి పథంలో వీహెచ్ అనుభవాన్ని ఉపయోగించుకోవాలని ప్రభుత్వం ఈ నిర్ణయం తీసుకున్నట్లు అధికార వర్గాలు వెల్లడించాయి.
ఈ నియామకంలో హన్మంతరావుకు అత్యంత ప్రాధాన్యతనిస్తూ ప్రభుత్వం ఆయనకు రాష్ట్ర మంత్రిహోదాను కల్పించింది. ప్రొటోకాల్ విషయంలోనూ ఆయనకు సముచిత స్థానాన్ని కేటాయిస్తూ, వారెంట్ ఆఫ్ ప్రిసిడెన్స్‌లో ఆర్టికల్ 18 కింద ఆయన హోదాను ఖరారు చేసింది. దీనివల్ల రాష్ట్ర ప్రభుత్వ అధికారిక కార్యక్రమాల్లో ఆయనకు విశిష్ట గౌరవం లభించనుంది. కేవలం పదవిని అప్పగించడమే కాకుండా, ఆయన కార్యకలాపాల నిర్వహణ కోసం ప్రభుత్వం అన్ని రకాల వసతులను కల్పించింది. నెలకు ఒక లక్ష రూపాయల వేతనంతో పాటు, 50 వేల రూపాయల ప్రత్యేక అలవెన్స్, మరో 30 వేల రూపాయల విందు అలవెన్స్‌ను ప్రభుత్వం మంజూరు చేసింది. దీనికి తోడు అద్దె లేని ప్రభుత్వ నివాసం లేదా అద్దె భత్యం, సొంత కారు వాడితే కన్వేయన్స్ అలవెన్స్, ఇంధన ఖర్చులు వంటి వసతులను పొందుపరిచారు.
పరిపాలనలో ఆయనకు తోడ్పాటు అందించేందుకు ఐఏఎస్ అధికారులకు సమానమైన సిబ్బందిని కూడా ప్రభుత్వం కేటాయించింది. ఒక ప్రైవేట్ సెక్రటరీ, ఒక డీఈఓ, ఇద్దరు ఆఫీస్ సబార్డినేట్లు మరియు వాహనంతో కూడిన డ్రైవర్‌ను నియమించారు. వీరికి అయ్యే వేతనాలు, ఇతర వ్యయాలను బీసీ సంక్షేమ శాఖ బడ్జెట్ నుంచి భరించనున్నట్లు ఉత్తర్వుల్లో పేర్కొన్నారు. బీసీల స్థితిగతులను మెరుగుపరచడం, ప్రభుత్వ పథకాలు అట్టడుగు వర్గాలకు చేరేలా ప్రణాళికలు రూపొందించడంలో వీహెచ్ కీలక పాత్ర పోషించనున్నారు. ప్రజా క్షేత్రంలో ఉంటూ బీసీల గళంగా మారిన వీహెచ్‌కు ఈ పదవి దక్కడం వల్ల ప్రభుత్వానికి, సామాన్య ప్రజలకు మధ్య ఒక బలమైన వారధి ఏర్పడినట్లయిందని రాజకీయ విశ్లేషకులు భావిస్తున్నారు.