గాంధీలో ‘సంజీవని’.

* కార్పొరేట్ స్థాయిలో ఆర్గాన్ ట్రాన్స్‌ప్లాంట్ సెంటర్!
* నేడు ప్రారంభించనున్న వైద్యారోగ్య శాఖ మంత్రి దామోదర రాజనర్సింహ.
* అత్యాధునిక వసతులతో మాడ్యులర్ ఆపరేషన్ థియేటర్లు, ఐసీయూల ఏర్పాటు.
* పేదలకు మరింత చేరువ కానున్న అవయవ మార్పిడి సేవలు.
* ‘ధాత్రి’ సహకారంతో మదర్ మిల్క్ బ్యాంక్ కూడా షురూ.
హైదరాబాద్, మహా.
పేదలకు కార్పొరేట్ స్థాయి వైద్యాన్ని ఉచితంగా అందించే దిశగా రాష్ట్ర ప్రభుత్వం మరో కీలక అడుగు వేసింది. సికింద్రాబాద్‌లోని గాంధీ ఆసుపత్రిలో అత్యంత ప్రతిష్టాత్మకంగా నిర్మించిన అత్యాధునిక ఆర్గాన్ ట్రాన్స్‌ప్లాంట్ సెంటర్ (అవయవ మార్పిడి కేంద్రం) సేవలు నేటి నుంచి అందుబాటులోకి రానున్నాయి. ఈ కేంద్రాన్ని, అలాగే చిన్నారుల కోసం ప్రత్యేకంగా ఏర్పాటు చేసిన మదర్ మిల్క్ బ్యాంక్‌ను శుక్రవారం రాష్ట్ర వైద్యారోగ్య శాఖ మంత్రి దామోదర రాజనర్సింహ లాంఛనంగా ప్రారంభించనున్నారు.
**కార్పొరేట్‌ను తలదన్నే సదుపాయాలు**
ప్రభుత్వ ఆసుపత్రి అనగానే పెదవి విరిచే పరిస్థితిని మార్చేలా ఈ కేంద్రంలో అద్భుతమైన వసతులు కల్పించారు. ఒక విశాలమైన ఆడిటోరియంతో పాటు, 3 ప్రత్యేక ట్రాన్స్‌ప్లాంట్ ఐసోలేషన్ గదులు, 25 పడకల సామర్థ్యంతో కూడిన 3 అధునాతన ఐసీయూలను సిద్ధం చేశారు. అత్యంత సంక్లిష్టమైన శస్త్రచికిత్సలు చేసే సర్జన్లు, అనస్థీషియా నిపుణులు విశ్రాంతి తీసుకునేందుకు వీలుగా ప్రత్యేక లాంజ్‌లు ఏర్పాటు చేశారు. అంతేకాకుండా, ఇన్ఫెక్షన్ల ముప్పు లేకుండా ట్రాన్స్‌ప్లాంట్ రోగులను అత్యంత సురక్షితంగా తరలించేందుకు ప్రత్యేకమైన లిఫ్ట్ సదుపాయాన్ని సైతం అందుబాటులోకి తెచ్చారు.
**అంతర్జాతీయ ప్రమాణాలతో ఇన్‌ఫెక్షన్ కంట్రోల్**
అవయవ మార్పిడి శస్త్రచికిత్సల్లో ఇన్‌ఫెక్షన్ నియంత్రణ, నిరంతర విద్యుత్ సరఫరా అత్యంత కీలకం. ఈ సెంటర్‌కు ఏమాత్రం విద్యుత్ అంతరాయం లేకుండా చూసేందుకు ఏకంగా ఒక ప్రత్యేక ట్రాన్స్‌ఫార్మర్‌ను, పవర్ కట్ సమయంలో క్షణాల్లో ఆన్ అయ్యే ఆటోమేటిక్ పవర్ బ్యాకప్ జనరేటర్లను ఏర్పాటు చేశారు. మాడ్యులర్ ఆపరేషన్ థియేటర్లు, ఐసోలేషన్ గదుల్లో 24 గంటల పాటు స్వచ్ఛమైన గాలి సరఫరా అయ్యేలా 9 ఎయిర్ హ్యాండ్లింగ్ యూనిట్లను అమర్చారు. తద్వారా ఇన్‌ఫెక్షన్ల నియంత్రణలో అంతర్జాతీయ ప్రమాణాలను పాటిస్తున్నారు.
**సనత్‌నగర్ టిమ్స్‌లోనూ మరో కేంద్రం**
గాంధీలో ఈ భారీ సెంటర్ ప్రారంభంతో ఇకపై అవయవ మార్పిడి, అత్యవసర చికిత్సల కోసం లక్షలు వెచ్చించి ప్రైవేటు ఆసుపత్రుల చుట్టూ తిరగాల్సిన అవసరం ప్రజలకు గణనీయంగా తప్పుతుందని వైద్యులు సంతోషం వ్యక్తం చేస్తున్నారు. మరోవైపు, సనత్‌నగర్‌లోని టిమ్స్ లోనూ అత్యాధునిక వసతులతో మరో ఆర్గాన్‌ ట్రాన్స్‌ప్లాంటేషన్ సెంటర్‌ను ప్రభుత్వం శరవేగంగా ఏర్పాటు చేస్తోంది. బ్రెయిన్ డెత్ కేసుల్లో అత్యంత విలువైన అవయవాలు వృథా కాకుండా చూసేందుకు, జిల్లాల్లో సైతం ఆర్గాన్ రిట్రైవల్ (అవయవ సేకరణ) సెంటర్లను ప్రభుత్వం విస్తృతంగా నెలకొల్పుతోంది.
**అందుబాటులోకి మదర్ మిల్క్ బ్యాంక్**
ఆర్గాన్ ట్రాన్స్‌ప్లాంట్ సెంటర్‌‌తో పాటే, గాంధీ ఆసుపత్రిలో నూతనంగా ఏర్పాటు చేసిన ‘మదర్ మిల్క్ బ్యాంక్’ (తల్లి పాల నిల్వ కేంద్రం)ను కూడా మంత్రి ప్రారంభించనున్నారు. ‘ధాత్రి’ అనే స్వచ్ఛంద సంస్థ సహకారంతో ప్రభుత్వం ఈ కేంద్రాన్ని అందుబాటులోకి తీసుకొచ్చింది. ఇక్కడ దాతల నుంచి తల్లి పాలను సేకరించి, అత్యంత సురక్షితమైన ఉష్ణోగ్రతల్లో నిల్వ చేసేందుకు అత్యాధునిక ఏర్పాట్లు చేశారు. తల్లిపాలు నోచుకోని ఎందరో అభాగ్య, అనారోగ్య చిన్నారులకు ఇక్కడి నుంచి పాలను అందించి వారి ప్రాణాలకు రక్షణ కవచంగా నిలవనున్నారు.